ગુજરાત રાજ્ય પંચાયત કર્મચારી મહાસંઘ અને તલાટી મંત્રી મહામંડળ સરકાર સામે ફરી મેદાને

ગુજરાત રાજ્ય પંચાયત કર્મચારી મહાસંઘ અને ગુજરાત રાજ્ય તલાટી મંત્રી મહામંડળે રાજ્ય સરકાર સામે બાયો ચઢાવી છે. પંચાયત વિભાગના વર્ગ-3 કર્મચારીઓની સમાન કામ સમાન વેતન હેઠળ પગાર વિસંગતતા દૂર કરી ઉચ્ચતર પગાર ધોરણ આપવા માંગ કરી છે.

જ્યારે તલાટી કમ મંત્રીઓની હડતાળ સમયના પડતર પ્રશ્નો તાકીદે ઉકેલવાની માગણી કરી છે. પંચાયત કર્મચારી મહાસંઘ અને તલાટી મંત્રી મહામંડળે મુખ્યમંત્રી સહિત વિભાગના મંત્રીઓને આવેદનપત્ર પાઠવી તાકીદે ઉકેલ લાવવાની માંગ કરી છે.

પડતર પ્રશ્નોનો ઉકેલ નહીં આવે તો અચોક્કસ મુદતની હડતાળ કરવાની કર્મચારી અગ્રણીઓએ ચીમકી ઉચ્ચારી છે.

ગુજરાત રાજ્ય પંચાયત કર્મચારી મહાસંઘના પ્રમુખ પંકજ મોદી, મહામંત્રી સુરેશ ગામીત અને કન્વીનર રોહિત ગઢવીએ જણાવ્યુ કે, પંચાયત વિભાગના વર્ગ-3 ના કર્મચારીઓને પગારમાં ભેદભાવ થતો હોવાની રાજ્ય સરકારને અગાઉ રજૂઆત કરવામાં આવી હતી.

ક્લાર્ક, ગ્રામસેવક, તલાટી, મલ્ટીપર્પઝ હેલ્થ વર્કર, ફિમેલ હેલ્થ વર્કર, વેબ ટેકનિશન, ફાર્માસિસ્ટ, નાયબ ચીટનીસ જેવી વિવિધ કેડરના કર્મચારીઓને પાંચમા પગાર પંચથી પગાર સુધારણા વખતે એક સમાન લાયકાત હોવા છતાં એક સમાન પગાર રાખેલ નથી.

રાજ્ય સરકારના કર્મચારીઓ કરતાં એક પગાર સ્લેબનો સ્તર ઉપર કરી દેવાતા પંચાયત વિભાગના કર્મચારીઓને પગાર ઘટાડી દેવાતા પંચાયત સેવા વર્ગ-3ના કર્મચારીઓ સાથે અન્યાય થયો છે.

સચિવાલયના અન્ય અને રેવન્યુ વિભાગના ઓફિસ આસીસ્ટન્ટ અને જુનિયર ક્લાર્કને 1900 ગ્રેડ પે આપી બીજુ ઉચ્ચતર પગાર ધોરણ 2400 કે 2800ના બદલે 4400 કરી દેવામાં આવ્યુ છે.જ્યારે પંચાયત વિભાગના ક્લાર્ક, મલ્ટી પર્પઝ હેલ્થ વર્કર, ફિમેલ હેલ્થ વર્કર, ગ્રામ સેવકને અનુક્રમે ઉચ્ચતર પગાર ધોરણ પ્રથમ 2400, બીજુ 2800 અને ત્રીજુ 4200 આપી ભારોભાર અન્ય કરવામાં આવ્યો છે. 

રાજ્ય સરકારને 31 ઓગસ્ટ 2024 સુધીનું તલાટી મંત્રી મહામંડળનું અલ્ટીમેટમ :

ગુજરાત રાજ્ય તલાટી મંત્રી મહામંડળના પ્રમુખ પંકજ મોદીએ ઉમેર્યુ કે, તલાટી કમ મંત્રીઓના પડતર પ્રશ્નો બાબતે હડતાળ કર્યા બાદ રાજ્ય સરકારે 22 ઓગસ્ટ 2022ના રોજ લેખિત સમાધાન થયુ હતુ.

જેમાં 1 થી 5 પ્રશ્નો પૈકી દ્વિતિય ઉચ્ચતર પગાર ધોરણ અને જોબ ચાર્ટ નક્કી કરવા બાબતે રાજ્ય સરકારે ખાતરી આપી હોવા છતાં આજદિન સુધી તેનો અમલ થયો નથી. તેથી બંને પડતર પ્રશ્નો બાબતે મુખ્યમંત્રી, નાણામંત્રી અને પંચાયત મંત્રીને લેખિત રજૂઆત કરી તાત્કાલિક નિરાકરણ લાવવા માંગ કરી છે.

આ પ્રશ્નોના નિરાકરણ બાબતે સરકારને 31 ઓગસ્ટ 2024 સુધીમાં પડતર પ્રશ્નોનો નિકાલ કરવા અલ્ટીમેટમ આપ્યુ છે. 31 ઓગસ્ટ 2024 સુધીમાં અમારી માગણીઓ પૂરી કરવામાં નહીં આવે તો તલાટી મંત્રીઓ તમામ મહેસૂલી કામગીરીથી અળગા રહેશે અને જરૂર પડ્યે અચોક્કસ મુદતની હડતાળ પાડવાની અમને ફરજ પડશે