બોરસદ નગરપાલિકામાં ભાજપ-કોંગ્રેસના પૂર્વ નગરસેવકો વિકાસમંચના નેજા હેઠળ ચૂંટણી લડશે

તાજેતરમાં 138 નગરપાલિકાના પ્રમુખપદનું રોટેશન જાહેર કરાતા સ્થાનિક સ્વરાજની સંસ્થાઓની ચૂંટણીની તૈયારીઓ શરૂ થઈ છે. આણંદ જિલ્લાની બોરસદ નગરપાલિકામાં ભાજપને ઉમેદવારો શોધવા તકલીફ પડે તેવી સ્થિતિ સર્જાય તેવી શક્યતા છે. દોઢ વર્ષ પહેલાં કરાયેલા ભાજપના 14 નગરસેવકોએ કોંગ્રેસ અને અપક્ષના નગરસેવકો સાથે મળી વિકાસમંચની રચના કરી છે. વિકાસ મંચના નેજા હેઠળ પાલિકાની ચૂંટણી લડવાનો નિર્ણય કરાતાં જિલ્લાનું રાજકારણ ગરમાયુ છે. ઉલ્લેખનીય છે કે, ભાજપના નગરસેવકોની આંતરીક જૂથબંધીના કારણે બોરસદ નગરપાલિકા દોઢ વર્ષ પહેલાં સુપરસીડ થઈ હતી.

બોરસદની એક હોટલમાં ભાજપના સસ્પેન્ડ થયેલા નગરસેવકો સાથે કોંગ્રેસ અને અપક્ષ નગરસેવકોની બેઠક યોજાઈ હતી. આ બેઠકમાં ભાજપ, કોંગ્રેસ અને અપક્ષના 25 જેટલાં પૂર્વ નગરસેવકો જોડાયા હતા.  પૂર્વ નગરસેવકોએ વિકાસ મંચની રચના કરી વિકાસમંચના નેજા હેઠળ એક સંપ થઈ પાલિકાની ચૂંટણી લડવાનો નિર્ણય કર્યો છે. છેલ્લી 3 ટર્મથી ભાજપના નગરસેવક રહેલાં શૈલેષ શાહને વિકાસ મંચના કન્વીનર બનાવવામાં આવ્યા છે. વિકાસ મંચે બોરસદના 9 વોર્ડની 36 બેઠકોના ઉમેદવારો તૈયાર કરવાની કામગીરી શરૂ કરી દીધી છે. વિકાસ મંચની રચનાથી સ્થાનિક તેમજ જિલ્લાના રાજકારણમાં ગરમાવો આવી ગયો છે.

એકહથ્થુ શાસનથી કંટાળ્યા હતાઃ શૈલેષ શાહ :

ભાજપના પૂર્વ નગરસેવક શૈલેષ શાહે જણાવ્યુ કે, 2020માં ભાજપે 20 બેઠકો જીતીને સત્તા મેળવી હતી. એક વર્ષ બાદ કમિટીઓની રચના નહી કરી કોંગ્રેસના સભ્યો સાથે મળી એકહથ્થુ શાસન ચલાવ્યે રાખ્યુ હતુ. ભાજપના 20 માંથી 17 સભ્યોએ પાલિકાના વહીવટથી કંટાળીને પ્રદેશના નેતાઓ સુધી રજૂઆતો કરી હતી. પરંતુ, તમામ નેતાઓએ ચૂંટાયેલા પ્રતિનિધિઓની વાત નહી સાંભળતા અવિશ્વાસની દરખાસ્ત લાવ્યા હતા. તેથી અમારા 14 સભ્યોને સસ્પેન્ડ કરીને નગરપાલિકા સુપરસીડ કરી હતી. બોરસદ શહેરનો વહીવટ બોરસદના લોકો કરી શકે તે માટે વિકાસ મંચની રચના કરીને ચૂંટણી લડવાનો નિર્ણય કર્યો છે. અમારી બેઠકમાં ભાજપના 9 સહિત 25 સભ્યો હાજર હતા.

વિકાસ મંચની બેઠકમાં ભાજપના માત્ર 3 સભ્યો હાજર હતાઃ શહેર ભાજપ પ્રમુખ :

બોરસદ શહેર ભાજપ પ્રમુખ દિપક પટેલે જણાવ્યુ કે, વિકાસ મંચની બેઠકમાં ભાજપના માત્ર 3 સભ્યો હાજર હતા. જ્યારે બાકીના સભ્યો અમારી સાથે જોડાઈ ગયા છે. તેથી વિકાસ મંચની રચનાથી અમને કોઈ ફરક પડવાનો નથી. જરૂર જણાશે તો બેઠક અંગે જિલ્લા પ્રમુખને જાણ કરીશું.

ભાજપની આંતરીક જૂથબંધની કારણે પાલિકામાં વહીવટદારનું શાસન :

વર્ષ 2020માં યોજાયેલી બોરસદ નગરપાલિકાની ચૂંટણીમાં કુલ 36 બેઠકોમાંથી ભાજપે 20 બેઠકો મેળવી સત્તા હાંસલ કરી હતી. એક વર્ષ બાદ કમિટીઓની રચનાને લઈ શાસક પક્ષના સભ્યોમાં હૂંસાતૂંસી શરૂ થઈ હતી. 20 સભ્યો પૈકી 17 સભ્યોએ પાલિકા પ્રમુખ સામે અસંતોષ વ્યક્ત કરી પ્રદેશ કક્ષાના નેતાઓને રજૂઆત કરી હતી. પ્રદેશના નેતાઓએ સભ્યોને નહી સાંભળતા ભાજપના 14 સભ્યોએ કોંગ્રેસના સભ્યો સાથે મળી અવિશ્વાસની દરખાસ્ત મૂકી હતી. તેથી બોરસદ નગરપાલિકાને સુપરસીડ કરવામાં આવી હતી. જ્યારે ભાજપના 14 સભ્યોને 6 વર્ષ માટે પક્ષમાંથી સસ્પેન્ડ કરવામાં આવ્યા હતા.