મિડલ ઈસ્ટના તણાવની અસર અમદાવાદ એરપોર્ટ પર, 5 આંતરરાષ્ટ્રીય ફ્લાઇટ થઈ રદ

મિડલ ઈસ્ટમાં ઈરાન અને ઈઝરાયલ વચ્ચે વધતાં તણાવના પગલે ઘણા દેશોએ પોતાનું એર સ્પેસ બંધ કરી દીધું છે, જેના કારણે હવે તેની સીધી અસરકારક અસર ભારતના અમદાવાદ એરપોર્ટ પર જોવા મળી રહી છે. કતાર, યુએઈ, ઈરાક, બહેરીન અને ઈરાને પોતાની હવાઈ હદ બંધ કરતાં અમદાવાદની 5 આંતરરાષ્ટ્રીય ફ્લાઈટ્સ રદ્દ કરવામાં આવી છે.

રદ્દ થયેલી ફ્લાઈટ્સમાં એર ઈન્ડિયાની લંડનથી આવતી ફ્લાઈટ નંબર AI-160 (બોઇંગ 788), ઈન્ડિગોની દુબઈથી આવતી ફ્લાઇટ 6E-1478 અને આબુધાબીથી આવતી ફ્લાઇટ 6E-1432 (બન્ને બોઇંગ 20N), કુવૈત એરવેઝની કુવૈત સિટીથી આવતી ફ્લાઇટ KU-345 (બોઇંગ 32N), તથા કતાર એરવેઝની દોહાથી આવતી ફ્લાઇટ QR-534 (બોઇંગ 320)નો સમાવેશ થાય છે.

આ અંગે SVPI (સર્દાર વલ્લભભાઈ પટેલ આંતરરાષ્ટ્રીય હવાઈમથક)ના પ્રવક્તાએ જણાવ્યું હતું કે, મિડલ ઇસ્ટ એર સ્પેસના બંધ હોવાના કારણે અમુક ફ્લાઈટ ઓપરેશન્સ પર અસર થઈ છે. મુસાફરોને વિનંતી કરવામાં આવી છે કે, તેઓ એરપોર્ટ તરફ જતા પહેલાં પોતાની ફ્લાઈટની સ્થિતિ સંબંધિત એરલાઈન પાસેથી ચોક્કસપણે તપાસી લે. સતત ફેરફાર થતી પરિસ્થિતિને કારણે મુસાફરોને અસુવિધાનો સામનો કરવો પડી રહ્યો છે.