ફોન કોલ, ફેક જજ અને ડિજિટલ એરેસ્ટથી ONGCની અધિકારી પાસેથી 1.36 કરોડની ઠગાઈ

 અમદાવાદની ONGCમાં કામ કરતી 51 વર્ષની મહિલા સાથે છેતરપિંડીની દુર્લભ ઘટના બની છે. 31 મેના રોજ TRAIનો અધિકારી બની અજાણ્યા કોલર દ્વારા મહિલા સાથે સંપર્ક સાધવામાં આવ્યો અને તેને ભયભીત કરીને 'ડિજિટલ એરેસ્ટ' કરી.

આ રીતે થયો છેતરપિંડીની શરૂઆતો ખેલ

કોલરે કહ્યું કે, તમારો ફોન બંધ થવાના આદેશ મળ્યા છે અને પછી વોટ્સએપ વીડિયો કોલ પર “પોલીસના યુનિફોર્મ”માં જણાતા શખ્સે કહ્યું કે, બોમ્બે CBIમાંથી બોલી રહ્યા છીએ. જણાવાયું કે, કેનેરા બેંકમાં 2 કરોડની બ્લેક મની છે જેમાં તેમનું આધારકાર્ડ લિંક છે. મહિલાને કહ્યું કે, ધરપકડનું વોરંટ છે અને પૂછપરછ કરવાની જરૂર છે.

મહિલાને એમ પણ કહેવામાં આવ્યું કે, "તમારો મોબાઈલ ટ્રેક પર છે, કોઈનો ફોન ન લેતા, ઘર છોડતા નહીં, તમારા ઘરના સભ્યો વિશે કહો." બાદમાં તેમની માતાનો નંબર પણ લેવામાં આવ્યો અને એક ઍપ્લિકેશન ઇન્સ્ટોલ કરાવી તેનો ફોટો પણ મગાવ્યો.

RTGS, FD અને કોર્ટ ઓર્ડરનું નાટક

2 જૂને ફરીથી વોટ્સએપ કોલ પર નકલી જજ ‘ગોગાઈ’ સાહેબના નામે બોલાવાયું અને મહિલાને કોર્ટ ઓર્ડર વોટ્સએપ પર મોકલાયો. બાદમાં મહિલાને કહ્યું કે, તમારું ખાતું વેરિફાય કરવા 35 લાખ ટ્રાન્સફર કરો. ત્યાર પછી 3 જૂને FDનું વેરિફિકેશન બતાવીને 35 લાખ અને 15 લાખ વધુ પડાવવામાં આવ્યા.

આ રીતે 1.36 કરોડ થયા ટ્રાન્સફર 

આ રીતે કુલ મળીને મહિલાએ પોતાની અને માતાની FD તથા એકાઉન્ટમાંથી રૂપિયા 1.36 કરોડની રકમ અલગ-અલગ ટ્રાન્ઝેક્શન દ્વારા આપેલી હતી. ત્યારબાદ જ્યારે આરોપીઓએ વધુ રૂપિયા 50 લાખની માંગણી કરી, ત્યારે મહિલાએ તેમના સંબંધી સાથે વાત કરતા છેતરપિંડીની જાણ થઈ હતી. મહિલાએ સાયબર ક્રાઈમમાં ફરિયાદ દાખલ કરતા પોલીસ દ્વારા કેસની તપાસ હાથ ધરવામાં આવી છે.