વડોદરામાં ચોમાસાની શરૂઆત સાથે વકર્યો રોગચાળો, 24 કલાકમાં મેલેરિયા, ટાઈફોઈડ સહિતના કેસમાં વધારો

ગુજરાતમાં ચોમાસાની સિઝનની જોરદાર શરૂઆત થઈ છે અને વડોદરામાં ભારે વરસાદની સાથે જ વિવિધ રોગચાળાઓ વકરવા લાગ્યા છે. શહેરમાં સતત વરસાદ પડી રહ્યો છે, જેના પગલે મેલેરિયા, ટાઈફોઇડ, ડેન્ગ્યુ અને તાવ જેવા રોગોમાં વધારો નોંધાયો છે.

છેલ્લા 24 કલાક દરમિયાન વડોદરામાં તાવના 571 કેસ, ઝાડા-ઉલ્ટીના 51 કેસ, શંકાસ્પદ ડેન્ગ્યુના 128 કેસ અને મેલેરિયાના 1139 શંકાસ્પદ કેસ નોંધાયા છે. આ ઉપરાંત દૂષિત પાણીના કારણે થતો ટાઈફોઈડ પણ વધી રહ્યો છે, જેમાં 41 નવા કેસ નોંધાયા છે. સુરત શહેરમાં પણ રોગચાળાની સ્થિતિ ચિંતાજનક બની છે, જ્યાં ડીંડોલી વિસ્તારમાં 7 વર્ષીય અને મોટા વરાછા વિસ્તારમાં 4 વર્ષીય બાળકીનું તાવ-ઉલ્ટી જેવી બીમારીના કારણે મૃત્યુ થયું છે.

આ ગંભીર સ્થિતિને પગલે આરોગ્ય તંત્રએ લોકોને માર્ગદર્શિકા આપી છે. તંત્રે ઘરમાં અને આસપાસ સ્વચ્છતા જાળવવા, પાણી સંગ્રહ માટેના વાસણો રોજ બદલવા અને મચ્છર પેદા ન થાય તેવી સૂચનાઓ આપી છે. મચ્છરજન્ય રોગથી બચવા મચ્છરદાનીનો ઉપયોગ કરવા અને લારીઓ પરનો ખુલ્લો ખોરાક ટાળવા જણાવાયું છે. તંત્રે લોકોને ભંગાર, પ્લાસ્ટિક અને નકામા સામાનની સમયસર સફાઈ રાખવા વિનંતી કરી છે.