‘કિંગ્સ ઓફ સાળંગપુર’ના કોપીરાઈટ મામલે છેડાયો વિવાદ

બોટાદના સાળંગપુર સ્થિત કષ્ટભંજન દેવ હનુમાનજી મહારાજના દિવ્ય સ્વરૂપો અને ‘કિંગ્સ ઓફ સાળંગપુર’ના કૉપીરાઇટ અને ટ્રેડમાર્ક મામલે વિવાદ છેડાયો છે. સનાતન સંત સમિતિના રાષ્ટ્રીય અધ્યક્ષ જ્યોતિર્નાથ મહારાજ અને જૂનાગઢના મેંદરડાના સુખરામદાસ બાપુએ કોપીરાઈટ અને ટ્રેડમાર્ક મામલે વિરોધ કરતાં મામલો ગરમાયો છે. જ્યારે હિન્દુ ધર્મના પ્રતિકોના ટ્રેડમાર્ક મામલે બ્રહ્મસમાજના અગ્રણી અશ્વિન ત્રિવેદી અને હેમાંગ રાવલે પણ સ્વામિનારાયણ સંપ્રદાયને આડે હાથ લીધો છે.  

મંદિરના કોઠારી વિવેકસાગર સ્વામીએ શુક્રવારે(12 જૂન) જણાવ્યું હતું કે, સાળંગપુર ધામ ખાતે શ્રી કષ્ટભંજન દેવ હનુમાનજી મહારાજના દિવ્ય સ્વરૂપો અને 'કિંગ ઓફ સાળંગપુર' સહિતના વિવિધ કોપીરાઈટ તથા ટ્રેડમાર્ક સર્ટીફીકેટ પ્રાપ્ત થયા છે. આ તમામ પ્રમાણપત્રો દાદાના પવિત્ર ચરણોમાં ભાવપૂર્વક સમર્પિત કરવામાં આવ્યા છે.

સનાતન સંત સમિતિના રાષ્ટ્રીય અધ્યક્ષનો વિરોધ
સાળંગપુર કષ્ટભંજન હનુમાનજીના મંદિરમાં હનુમાનજીને કોપીરાઈટ કરવા મામલે સનાતન સંત સમિતિના રાષ્ટ્રીય અધ્યક્ષ જ્યોતિર્નાથ બાપુએ વિરોધ કર્યો છે. તેમણે કહ્યું કે, શું હનુમાનજી કોપીરાઈટ કરી શકાય?, શું કોઈપણ દેવતાં કોપીરાઈટ થાય?, ધર્મ ક્યાં જઈ રહ્યો છે તે સમજાતું નથી, કાલે કોઈ શિવને કોપીરાઈટ કરશે, અંબાજી માતાજીને કોપી રાઈટ કરશે, માતાજીને કોપીરાઈટ કરશે, શું ચાલી રહ્યુ છે અને આપણે ધર્મને ક્યાં લઈ જઈ રહ્યા છીએ, સનાધન ધર્મની પ્રણાલીમાં કોપીરાઈટ જેવી સિસ્ટમ ન લાવી ધર્મની લાગણી ન દુભાવવી જોઈએ.

તેમણે ઉમેર્યુ કે, સુપ્રીમ કોર્ટની ગાઈડલાઈન પ્રમાણે ટ્રેડમાર્ક લઈ શકાય નહી, કષ્ટભંજન ભગવાનનું નામ આદિકાળથી ચાલતું આવે છે. સનાતન તેમજ બ્રહ્મસમાજ તેનો સખત વિરોધ કરે છે. આ મામલે સંબંધિત વિભાગોમાં રજૂઆત કરી સુપ્રીમકોર્ટ સુધી લડી લેવામાં આવશે.

મેંદરડાના સુખરામદાસ બાપુ પણ બગડ્યાં
મેંદરડા ખાખીમઢી રામજી મંદિરના ગાદીપતિ સુખરામદાસ બાપુએ પણ વિરોધ કરતાં કહ્યું કે, સાળંગપુર હનુમાનજી મંદિરના કોપીરાઈટની માહિતી મળતાં દુખ થયું છે. ભગાવનને ક્યારેય કોપીરાઈટ ન હોય, ભગવાન તમામ 18 વરણના છે. પોતાને સનાતની અને સાધુ કહેતા લોકોએ ભગવાનને કોપીરાઈટ તરીકે ઉભા કર્યા જે દુઃખદ છે. સાળંગપુર હનુમાન દાદાને 18 વરણના લોકો ખૂબ જ માને છે. સ્વામિનારાયણના સાધુઓ પોતાને સંત કહેવડાવે છે તેમને ધિક્કાર છે. ભગવાનને પણ તમે વેપારી બનાવી દીધા. ભગવાનને તમે માનતા હોય તો તમે તમારા ભગવાન પૂરતા સીમીત રહો. 

બ્રહ્મ સમાજે પણ આંદોલનની ચીમકી આપી 
બ્રહ્મ સમાજના અગ્રણી અશ્વિન ત્રિવેદી અને હેમાંગ રાવલે વિરોધ કરતાં કહ્યું કે, ભગવાન પર ભક્તોનો અધિકાર છે. કોઈ ટ્રસ્ટનો એકાધિકાર નહીં. સનાતન ધર્મ કોઈ બ્રાન્ડ નથી. કોઈ કોર્પોરેટ સંપત્તિ નથી અને કોઈની ખાનગી જાગીર પણ નથી. તે કરોડો હિંદુઓની સામૂહિક આસ્થા, પરંપરા અને ધરોહર છે. સારંગપુર સ્વામિનારાયણ ટ્રસ્ટ દ્વારા કષ્ટભંજન દેવ, કિંગ્સ ઓફ સાળંગપુર, હનુમાનજી દાદાના પ્રતિકો અને પ્રસાદની મૌલિક સંપત્તિને ટ્રેડમાર્ક અને કોપીરાઇટ કરવા બાબતે વર્લ્ડ બ્રાહ્મણ ઓર્ગેનાઈઝેશન અને સનાતન સંસ્થાઓ વિરોધ કરે છે. આ બાબતે વિરોધ પ્રદર્શનના કાર્યક્રમો જાહેર કરાશે.

સાળંગપુરના સ્વામિનારાયણ સંપ્રદાયના સાધુઓને વિવાદ સાથે નાતો 
વર્ષ 2023માં ૩૦ ફૂટ ઊંચી 'કિંગ ઓફ સાળંગપુર' હનુમાનજીની મૂર્તિના નીચેના ભાગે એવા ભીંતચિત્રો લગાવવામાં આવ્યા હતાં. જેમાં હનુમાનજી સ્વામિનારાયણ સંતોને પ્રણામ કરતા કે તેમની સેવામાં હોય તેવું દર્શાવવામાં આવ્યું હતું. જેના કારણે હિન્દુ સંગઠનો અને અન્ય સંપ્રદાયોના સાધુ-સંતોએ સનાતન ધર્મની પરંપરાનું અપમાન ગણાવ્યું હતું. વિવાદ વકરતા વિરોધના પાંચમા દિવસે મોડી રાત્રે મંદિર પ્રશાસને વિવાદીત ભીંતચિત્રો હટાવી લીધા હતા.