જુનિયર, સિનિયર ક્લાર્ક પરીક્ષાની મેરીટ યાદીને લઈ ઉમેદવારોમાં રોષઃ આંદોલનની ચીમકી

ગાંધીનગર: ગુજરાત ગૌઁણ સેવા પસંદગી મંડળે જુનિયર અને સિનિયર ક્લાર્કની પ્રાથમિક કસોટીનું પરિણામ જાહેર કર્યુ છે. ગૃપ એ અને ગૃપ બીમાં કેટેગરી પ્રમાણે ભરવાની થતી જગ્યાના 7 ગણા ઉમેદવારોની મેરીટ યાદી જાહેર કરી છે. ગૌણ સેવા પસંદગી મંડળે નોટિફિકેશન કરતાં અલગ મેરીટ યાદી જાહેર કરવાનો આક્ષેપ કરી કેટલાક ઉમેદવારોએ વિરોધ શરૂ કર્યો છે. યુવરાજસિંહ જાડેજાની આગેવાની હેઠળ ગૌણ સેવા પસંદગી મંડળની સચિવને રજૂઆત કરી જીપીએસપી પેટર્ન મુજબ મેરીટ યાદી બનાવવા માગ કરી છે. જીપીએસસી પેટર્ન મુજબ મેરીટ યાદી નહી બનાવાય તો કાયદાકીય કાર્યવાહી તેમજ આંદોલન કરવાની ચીમકી ઉચ્ચારી છે. 

GSSSB(ગુજરાત સબઓર્ડીનેટ સર્વિસ સિલેક્શન બોર્ડ) એટલે કે ગુજરાત ગૌણ સેવા પસંદગી મંડળે જુનિયર અને સિનિયર ક્લાર્કની જાહેર કરેલી મેરીટ યાદી સામે વિરોધ શરૂ થયો છે. યુવરાજસિંહ જાડેજાની આગેવાની હેઠળ ઉમેદવારોએ ગૌણ સેવા પસંદગી મંડળની કચેરી પાસે વિરોધ પ્રદર્શન કર્યુ હતુ. ત્યારબાદ ગૌણ સેવા પસંદગી મંડળના સચિવ હસમુખ એચ. પટેલને મળીને જીપીએસસી પેટર્ન મુજબ મેરીટ યાદી બનાવવાની રજૂઆત કરી હતી. 

કાયદાકીય લડત આપી ગ્રાઉન્ડ લેવલે આંદોલન કરીશુઃ યુવરાજસિંહ જાડેજા
યુવરાજસિંહ જાડેજાએ જણાવ્યુ કે, ગૌણ સેવા પસંદગી મંડળે ગૃપ એ અને ગૃપ બીનું મેરીટ ઉંચુ જાહેર કર્યુ છે. 85 માર્કસનું મેરીટ જાહેર કર્યુ છે. પહેલાં તો અમે સીબીઆરટી નોર્મલાઈઝેશન સિસ્ટમ રદ કરવા માગ કરી છે. 50 માર્કસવાળો ઉમેદવાર 80 માર્કસ સુધી પહોંચી જાય છે. એટલે કે ડકવર્થ લૂઈસ જેવી પદ્ધતિ રદ કરવી જોઈએ. આ લોટરીવાળી પ્રથા બંધ થવી જોઈએ. નોટિફિકેશનમાં જણાવાયુ હતુ કે કેટેગરીના 7 ગણા ઉમેદવારને મુખ્ય પરીક્ષામાં બોલાવાશે. 

પરંતુ હાલમાં મેરીટ યાદી જાહેર કરી છે તેમાં જગ્યાના 7 ગણા ઉમેદવારોને લીધા છે. 5500 ઉમેદવારો છે એને ગુણ્યા 7 ઉમેદવારોને લીધા છે. આ મેરીટ યાદીમાં જનરલ પુરૂષ અને જનરલ મહિલા ઉમેદવારોને અન્યાય થયો છે. મંડળના સચિવને મળી પ્રાથમિક કસોટીની મેરીટ પદ્ધતિ ખોટી હોવાની રજૂઆત કરીને મેરીટ પદ્ધતિ રદ કરવાની માગ કરી છે. જીપીએસ પેટર્નમાં મેરીટ યાદી જાહેર કરવામાં નહી આવે તો કાયદાકીય લડત આપીને ગ્રાઉન્ડ લેવલે આંદોલન કરીશું. 

જનરલ કેટેગરીના ઉમેદવારોને અન્યાયઃ દિનેશ બાંભણીયા
બિન અનામત સંકલન સમિતિના અગ્રણી દિનેશ બાંભણિયાએ જણાવ્યુ કે, ગુજરાત ગૌણ સેવા પસંદગી મંડળે સિનિયર અને જુનિયર ક્લાર્કની ભરતી માટે જાહેર કરેલી મેરીટ યાદીમાં જનરલ કેટેગરીના ઉમેદવારોને અન્યાય કરવામાં આવ્યો છે. ગૌણ સેવા પસંદગી મંડળના ચેરમેનને રજૂઆત કરવાનો પ્રયાસ કર્યો હતો. પરંતુ તેઓ મળતા નથી. તેવા સમયે જનરલ કેટેગરીના ઉમેદવારોનો અન્યાય દૂર નહી કરાય તો હાઈકોર્ટના દ્વાર ખટખટાવીને આંદોલન કરીશું.

ઉમેદવારોની રજૂઆત અંગે અધ્યક્ષને જાણ કરીશુઃ સચિવ
ગુજરાત ગૌણ સેવા પસંદગી મંડળના સચિવ હસમુખ એચ. પટેલને મળતાં તેઓએ જણાવ્યુ કે, મેરીટ યાદીમાં એસસી, એસટી, ઓબીસી અને ઈડબલ્યુએસની કેટેગરી પ્રમાણે 7 ગણા ઉમેદવારોની મેરીટ યાદી મુખ્ય પરીક્ષા માટે જાહેર કરી છે. જનરલની કોઈ કેટેગરી નથી. તેમાં કોમન ઉમેદવારો આવી જાય છે. જ્યારે સીબીઆરટી સિસ્ટમ રદ કરવાની ઉમેદવારોએ રજૂઆત કરી છે. ઉમેદવારોની તમામ રજૂઆત અંગે મંડળના અધ્યક્ષને જાણ કરવામાં આવશે. 

5554 જગ્યા માટે 3.40 લાખ ઉમેદવારોએ પ્રિલિમ પરીક્ષા આપી હતી
ગુજરાત ગૌણ સેવા પસંદગી મંડળની વર્ગ-3 સિનિયર અને જુનિયર ક્લાર્કની 5554 જગ્યા માટે 5,00,819 ઉમેદવારો પૈકી 66 ટકા ઉમેદવારો એટલે કે 3.40 લાખ ઉમેદવારોએ પરીક્ષા આપી હતી. 1 એપ્રિલથી 20 મે સુધીમાં 71 શિફ્ટમાં અલગ-અલગ 21 કેડરની 5554 જગ્યા માટે પરીક્ષા લેવામાં આવી હતી. ગૃપ એ અને ગૃપ બી માટે સંયુક્ત પ્રિલિમ પરીક્ષા 20 મેના રોજ પૂર્ણ થઈ હતી. પ્રિલિમ પરીક્ષાની મેરીટ યાદી આવનાર ઉમેદવારો મુખ્ય પરીક્ષા આપી શકશે.