લગ્નના બે દિવસ બાદ જ માતમમાં ફેરવાઈ ખુશીઓ

Ahmedabad plane crash : અમદાવાદમાં બનેલી દેશને હચમચાવી દેનારી ભયાનક વિમાન દુર્ઘટનાને આજે એક વર્ષ પૂર્ણ થયું છે. સમયના ચક્રે એક વર્ષ પૂરું કરી દીધું હોવા છતાં આ દુર્ઘટનામાં પોતાના સ્વજનોને ગુમાવનાર પરિવારો માટે સમય જાણે થંભી ગયો હોય તેવી સ્થિતિ છે. આ ગોઝારી ઘટનામાં જીવ ગુમાવનારાઓમાં વડોદરાના 25 વર્ષીય ભાવિક મહેશ્વરી પણ સામેલ હતા, જેમના અચાનક અવસાનથી સમગ્ર પરિવારની દુનિયા જ બદલાઈ ગઈ હતી.

આજે પણ ભાવિકના માતા-પિતા પોતાના પુત્રની યાદોમાં જીવી રહ્યા છે. સરકાર અને વિવિધ સંસ્થાઓ તરફથી મળેલી સહાય તેમના જીવનનો આધાર બની હશે, પરંતુ પુત્રની ખોટ કોઈ પણ વળતરથી ભરાઈ શકે તેમ નથી. એક વર્ષ બાદ પણ ઘરના દરેક ખૂણે ભાવિકની હાજરીનો અહેસાસ થાય છે અને પરિવાર માટે તેની યાદો આજે પણ જીવંત છે.

લગ્નના 2 દિવસમાં જ કાળ બનીને તૂટી પડી દુર્ઘટના
વડોદરા શહેરના મહાદેવ તળાવ નજીક આવેલી મધુકુંજ સોસાયટીમાં રહેતા મુકેશ મહેશ્વરી અને તેમના પરિવાર માટે વર્ષ 2025નો જૂન મહિનો જીવનનો સૌથી દુઃખદ સમય સાબિત થયો હતો. પરિવારના એકમાત્ર આશા સમાન પુત્ર ભાવિક મહેશ્વરી લાંબા સમયથી લંડનમાં નોકરી કરી રહ્યો હતો. દર વર્ષે તે થોડા દિવસ માટે પરિવારને મળવા વડોદરા આવતો હતો.

આ વખતે પણ ભાવિક પોતાના જીવનની સૌથી ખુશીની ક્ષણો માણવા ભારત આવ્યો હતો. પરિવારની સહમતિથી તેની સગાઈ અગાઉ થઈ ચૂકી હતી અને 10 જૂનના રોજ તેણે પોતાની જીવનસાથી સાથે કોર્ટ મેરેજ કર્યા હતા. આખો પરિવાર નવા સંબંધો અને નવા સપનાઓને લઈને ઉત્સાહિત હતો. ઘરમાં ખુશીઓનો માહોલ હતો અને ભાવિ જીવનની અનેક યોજનાઓ ઘડાઈ રહી હતી. પરંતુ લગ્નના માત્ર બે દિવસ બાદ જ એક એવી દુર્ઘટના બની કે જેણે આખા પરિવારને આજીવન ન ભૂલાય તેવો ઘા આપી દીધો.

'મારા માટે 13 નહીં, 12 જૂન અપશુકનિયાળ છે'
ભાવિકના પિતા મુકેશ મહેશ્વરી આજે પણ તે દિવસને યાદ કરતાં ભાવુક થઈ જાય છે. તેમનું કહેવું છે કે લોકો કદાચ 13 તારીખને અપશુકનિયાળ માને, પરંતુ તેમના માટે 12 જૂન જ જીવનનો સૌથી ખરાબ દિવસ છે. તેઓ કહે છે કે આ તારીખે તેમણે માત્ર પુત્ર જ નહીં, પરંતુ પરિવારનો આધારસ્તંભ ગુમાવ્યો હતો.
જે પુત્ર પરિવારના ભવિષ્યના સપના સાકાર કરવાનો હતો, તે જ અચાનક દુનિયા છોડીને ચાલ્યો ગયો. મુકેશભાઈના જણાવ્યા મુજબ, એક વર્ષ વીતી ગયું હોવા છતાં આજે પણ ઘરમાં દરેક વાતમાં ભાવિકની યાદ આવી જાય છે. તેની સાથે વિતાવેલી ક્ષણો અને ભવિષ્ય માટેના સપનાઓ હવે માત્ર સ્મૃતિ બની ગયા છે.

માતા આજે પણ દરવાજા તરફ જુએ છે
ભાવિકની માતા કવિતા મહેશ્વરી માટે આ દુઃખ શબ્દોમાં વ્યક્ત કરવું મુશ્કેલ છે. તેઓ કહે છે કે માતા માટે સંતાનનું વિયોગ ક્યારેય સહન કરી શકાય તેમ નથી. આજે પણ રાત્રિના સમયે ઘણીવાર એવું લાગે છે કે ભાવિક દરવાજો ખખડાવીને ઘરમાં પ્રવેશ કરશે. તેની યાદો, તેની વાતો અને તેનો હસતો ચહેરો આંખો સામે ફરી વળે છે.કવિતાબેન જણાવે છે કે પુત્રના લગ્ન બાદ ઘરમાં આવનારી ખુશીઓની કલ્પના કરી હતી, પરંતુ માત્ર બે દિવસમાં જ બધું ખતમ થઈ ગયું. એક રીતે પરિવારને એવું લાગે છે કે પુત્ર સાથે ઘરમાં આવનારી નવી લક્ષ્મી પણ છીનવાઈ ગઈ.

એરપોર્ટથી ઘરે પહોંચ્યા અને આવી ગયો કાળજું કંપાવી દેનારો ફોન
લગ્ન બાદ ભાવિક ફરી પોતાની નોકરી માટે લંડન જવા નીકળ્યો હતો.પરિવારજનો તેને એરપોર્ટ સુધી મૂકવા ગયા હતા. પુત્રને વિદાય આપીને પરિવાર વડોદરા પરત ફરી રહ્યો હતો અને મનમાં એ જ વિચાર હતો કે થોડા મહિનાઓ બાદ ભાવિક ફરી ઘરે આવશે.પરંતુ ઘરે પહોંચ્યા બાદ થોડા જ સમયમાં વિમાન દુર્ઘટનાના સમાચાર આવ્યા. શરૂઆતમાં પરિવારને વિશ્વાસ જ નહોતો આવ્યો કે જે વિમાનમાં તેમનો પુત્ર બેઠો હતો તે જ દુર્ઘટનાગ્રસ્ત થયું છે. ધીમે ધીમે માહિતી સ્પષ્ટ થતી ગઈ અને આખરે સૌથી ભયાનક સત્ય સામે આવ્યું – ભાવિક હવે આ દુનિયામાં રહ્યો નહોતો. એક જ ક્ષણમાં પરિવારની તમામ ખુશીઓ માતમમાં ફેરવાઈ ગઈ. લગ્નના માત્ર બે દિવસમાં જ નવપરિણીત દંપતીના સપનાઓ તૂટી ગયા અને ઘરમાં આવનાર નવી વહુ સાથે જોડાયેલા તમામ અરમાનો અધૂરા રહી ગયા.

એક વર્ષ બાદ પણ જીવંત છે યાદો
અમદાવાદ પ્લેન ક્રેશની ઘટનાએ માત્ર અનેક લોકોના જીવ જ લીધા નહોતા, પરંતુ અસંખ્ય પરિવારોના સપનાઓ પણ તોડી નાખ્યા હતા. વડોદરાના ભાવિક મહેશ્વરીનો પરિવાર પણ આજે એ જ પીડા સાથે જીવન પસાર કરી રહ્યો છે. સમય ભલે આગળ વધી ગયો હોય, પરંતુ પરિવાર માટે ઘડિયાળ જાણે તે દિવસ પર જ અટકી ગઈ છે. સહાય, વળતર અને સાંત્વનાના શબ્દો મળી શકે, પરંતુ સંતાનની ખોટ કોઈ ક્યારેય પૂરી કરી શકતું નથી.એક વર્ષ બાદ પણ ભાવિકના માતા-પિતા માટે દરેક દિવસ પોતાના પુત્રની યાદમાં પસાર થાય છે. તેઓ આજે પણ ભાવિકને યાદ કરે છે, તેની રાહ જુએ છે અને તેની સ્મૃતિઓના સહારે જીવન જીવવાનો પ્રયાસ કરી રહ્યા છે.