કોરોનાના લક્ષણો હોય તો રથયાત્રામાં જવાનું ટાળો, ઋષિકેશ પટેલે લોકોને કરી અપીલ

ગુજરાતના આરોગ્ય મંત્રી અને ભાજપના પ્રવક્તા ઋષિકેશ પટેલે રાજ્યમાં સતત વધી રહેલા કોરોના કેસ અને આગામી જગન્નાથ રથયાત્રાને લઈને મહત્વનું નિવેદન આપ્યું છે. તેમણે જણાવ્યું કે, રાજ્યમાં રોજબરોજ વધતા કોરોનાના કેસને લહેર કે સુનામી ગણી શકાય નહિ. વિશ્વભરમાં કોરોના ફેલાયા બાદ આ ચોથી વખત છે જ્યારે કેસમાં વધારો નોંધાયો છે, અને આ અંગે રાજ્ય સરકાર કેન્દ્ર સરકારના સતત સંપર્કમાં છે.

ઋષિકેશ પટેલે સ્પષ્ટ કર્યું કે, કોરોનાનો વર્તમાન વેરિયન્ટ ઘાતક નથી. ભૂતકાળમાં કોરોનાના કેસમાં વધારો થયા બાદ ઘટાડો થયો હતો, પરંતુ છેલ્લા 25 દિવસથી કેસમાં ફરી વધારો જોવા મળી રહ્યો છે. જોકે, આ વેરિયન્ટથી જીવનું જોખમ નથી. તેમણે સૂચન કર્યું કે, કોરોનાના લક્ષણો દેખાતાં તાત્કાલિક સારવાર શરૂ કરવી જોઈએ.

વધુમાં, તેમણે જણાવ્યું કે વર્તમાન કોવિડ વેરિયન્ટ ગંભીર નથી, પરંતુ શરદી, ખાંસી કે ગળામાં દુખાવા જેવા સામાન્ય લક્ષણો દેખાય તો વ્યક્તિએ પોતાને કોરેન્ટાઈન કરીને સારવાર લેવી જોઈએ અને સાવચેતી રાખવી જરૂરી છે.

રથયાત્રાના સંદર્ભમાં ઋષિકેશ પટેલે લોકોને અપીલ કરી કે, જેમને શરદી-ખાંસીના લક્ષણો હોય, કોમોર્બિડ રોગોવાળા દર્દીઓ અને વૃદ્ધ લોકોએ રથયાત્રામાં ભાગ લેવાનું ટાળવું જોઈએ. તેમણે ભલામણ કરી કે આવા લોકોએ ઘરે રહીને ભગવાન જગન્નાથના દર્શન કરવા જોઈએ અને ભીડવાળા સ્થળોએ જવું ટાળવું જોઈએ.