ગુજરાતમાં જેઠ મહિનામાં અષાઢી માહોલઃ દક્ષિણ ગુજરાત અને સૌરાષ્ટ્રમાં વરસાદ

રાજ્યમાં સૌરાષ્ટ્ર અને દક્ષિણ ગુજરાતમાં શનિવારે(14 જૂન) મોડી સાંજથી ધોધમાર વરસાદ શરૂ થયો છે. હવામાન વિભાગે આપેલી આગાહી અનુસાર ભારે પવન સાથે વરસાદ શરૂ થયો છે. હવામાન વિભાગે 14 થી વધુ જિલ્લામાં ભારે વરસાદ થવાની આગાહી કરી હતી. અમરેલી, ડાંગ, દાહોદ, છોટા ઉદેપુર, વડોદરા સહિતના વિસ્તારોમાં ભારે પવન અને વીજળીના કડાકા સાથે વરસાદ પડ્યો હતો. જેના કારણે જેઠ માસમાં અષાઢ મહિના જેવો માહોલ થયો છે. દાહોદ જિલ્લાના મુવાલિયા ગામમાં વરસાદ દરમિયાન આકાશી વીજળી પડતાં પિતા-પુત્રનું મોત થયું છે. 

રાજ્યમાં હવે પ્રિમોનસૂન એક્ટિવિટી શરૂ થઈ ગઈ છે. શનિવારે બપોર બાદ દક્ષિણ ગુજરાત અને સૌરાષ્ટ્રમાં વરસાદ શરૂ થયો હતો. સુરત, ડાંગ, નવસારી, દાહોદ, છોટાઉદેપુર, વડોદરા, રાજકોટ અને અમરેલી જિલ્લામાં ગાજવીજ સાથે વરસાદ તૂટી પડ્યો હતો.

વડોદરા જિલ્લાના સાવલીમાં ભારે પવન સાથે વરસાદ શરૂ થયો હતો. સાવલીમાં ગાજવીજ સાથે વરસાદી માહોલ જામ્યો હતો. સાવલી પંથકના ગામડાઓમાં મેઘરાજાની ધમાકેદાર એન્ટ્રી થઈ છે. શેરપુરા,વાંકાનેર,પોઇચા,ગોઠડા,બહુથા સહિતના ગામોમાં ધોધમાર વરસાદ વરસ્યો છે. જેના કારણે વાહન વ્યવહાર ખોરવાયો હતો.

રાજકોટ-શહેરમાં મેઘરાજાનું રૌદ્ર સ્વરૂપ જોવા મળ્યું હતું. વીજળીના કડાકા ભડાકાં સાથે વરસાદ પડ્યો હતો. વરસાદ શરૂ થતાની સાથે અનેક વિસ્તારોમાં વીજળી ગુલ થઈ હતી. આકાશી વીજળીના ભયાનક દ્રશ્યો સામે આવ્યા છે. લોધિકા, નાઘુપીપળીયા અને ગ્રામ્ય વિસ્તારમાં વાવણી લાયક વરસાદ વરસ્યો છે. સારા વરસાદના પગલે ખેડૂતોમાં ખુશીનો માહોલ જોવા મળ્યો છે.

ગોંડલ પંથકમાં પણ ભારે પવન સાથે વરસાદ થતાં વરસાદી માહોલ જોવા મળ્યો હતો. માર્કેટયાર્ડ, બસ સ્ટેશન, રેલ્વે સ્ટેશન, જેલ ચોક, માંડવી ચોક સહિતના વિસ્તારોમાં વરસાદ વરસ્યો છે. સુરતમાં પણ છેલ્લાં બે દિવસના અસહ્ય બફારા બાદ મોડી સાંજે વરસાદી ઝાપટાં પડ્યા હતા. વરસાદ પડતા વાતાવરણમાં ઠંડક પ્રસરી હતી. કતારગામ, અડાજણ, અઠવા, અમરોલી સહિતના વિસ્તારમાં વરસાદ પડતાં રસ્તાઓ પાણીથી તરબોળ થયા હતા. જેના કારણે નોકરી પરથી ઘરે જતા લોકો અટવાયા હતા.

અમરેલી જિલ્લાના બગસરા, ધારી, ખાંભા ગીર, વડિયા સહિતના અનેક વિસ્તારોમાં ભારે પવન સાથે વરસાદ ખાબક્યો હતો. અમરેલી જિલ્લાના મોટાભાગના તાલુકાઓમાં વરસાદ વરસ્યો હતો. ખાંભા-ગીરના લાસા, ધાવડીયા, ભાણિયા, બાબાપુર, બગસરા પંથકમાં હાલરીયા, હુલરીયા, હામાપુર, રફાળા સહિત આસપાસના ગામડાંઓમાં વરસાદ થયો હતો. ધારી ગીરના ગોપાલગ્રામ, સરંભડામાં વરસાદ પડ્યો હતો. વડિયા આસપાસના મોરવાડા, તોરી, રામપુર, કુંકાવાવ, મેઘાપીપલીયા,  અમરાપુર, ખાખરીયા સહિતના ગામડાંઓમાં ભારે પવન સાથે વરસાદ ખાબક્યો હતો. 

દાહોદમાં વીજળી પડતાં પિતા-પુત્રનું મોત

દાહોદ જિલ્લાના મુવાલિયા ગામે ફળિયામાં બેઠેલા 30 વર્ષીય સંજયભાઈ અને 7 વર્ષીય આયુષ પર વીજળી પડી હતી. પિતા-પુત્ર પર વીજળી પડતાં આસપાસના લોકો દ્વારા તાત્કાલિક દાહોદની સિવિલ હોસ્પિટલ ખાતે લાવવામાં આવ્યા હતા. જ્યાં ડૉક્ટરોએ પિતા-પુત્રને મૃત જાહેર કર્યા હતા.

રાજ્યમાં ભારેથી અતિભારે વરસાદની આગાહી

હવામાન વિભાગે રવિવારે(15 જૂન) 15 જિલ્લામાં અતિભારે વરસાદની આગાહી કરી છે. જેમાં અમરેલી, ભાવનગર, નવસારી, વલસાડ જિલ્લાના છૂટાછવાયા સ્થળોએ ગાજવીજ સાથે ભારે વરસાદ પડવાની આગાહીના પગલે ઑરેન્જ ઍલર્ટ તેમજ રાજકોટ, જૂનાગઢ, ગીર સોમનાથ, અરવલ્લી, મહીસાગર, દાહોદ, ભરૂચ, નર્મદા, સુરત, તાપી, ડાંગ જિલ્લામાં ભારે વરસાદને લઈ યલો ઍલર્ટ જાહેર કર્યું છે. આગામી 5 દિવસ દરમિયાન હવામાન વિભાગે સૌરાષ્ટ્ર, દક્ષિણ ગુજરાત સહિત રાજ્યના 15થી વધુ જિલ્લામાં 30-40 કિ.મી.ની ઝડપે પવન ફૂંકાવવાની અને ગાજવીજ સાથે ભારે વરસાદની આગાહી કરી છે.