એર ઇન્ડિયા હવે ‘AI 171’ ફ્લાઇટ નંબરનો ઉપયોગ નહીં કરે, તેની જગ્યાએ નંબર AI 159 રહેશે

એર ઇન્ડિયા (AI) એક્સપ્રેસે જીવલેણ દુર્ઘટનાને પગલે ફ્લાઇટ નંબર ‘171’નો ઉપયોગ બંધ કરવાનો નિર્ણય કર્યો છે. ગુરુવારે અમદાવાદથી લંડન જતી બોઈંગ 787-8 ડ્રીમલાઈનર ફ્લાઇટ AI 171 ટેક ઓફ બાદ તરત જ મેઘાણી નગર નજીક દુર્ઘટનાગ્રસ્ત થઈ હતી. વિમાનમાં 242 મુસાફરો સવાર હતા, જેમાંથી માત્ર એક - વિશ્વાસકુમાર રમેશ  જ જીવિત બચ્યા હતા. મોતનો આંકડો હવે 274 સુધી પહોંચ્યો છે.

સૂત્રોના જણાવ્યા મુજબ, હવે 17 જૂનથી ફ્લાઇટ નંબર ‘AI 171’ની જગ્યાએ AI 159નો ઉપયોગ થશે. આ નિર્ણય દુર્ઘટનાગ્રસ્ત લોકો પ્રત્યે શ્રદ્ધાંજલિ રૂપે લેવામાં આવ્યો છે. એમ્બાર્ક મેનૂઅલ અને બુકિંગ સિસ્ટમમાં પણ આ ફેરફાર શુક્રવારે અમલમાં લાવાયો છે.

આ ઉપરાંત, એર ઇન્ડિયા એક્સપ્રેસે પણ તેનો ફ્લાઇટ નંબર ‘IX 171’ બંધ કરવાનો નિર્ણય લીધો છે. એ અગાઉ, 2020માં કોઝિકોડ ક્રેશ પછી પણ તે ફ્લાઇટ નંબર દૂર કર્યો હતો.

એર ઇન્ડિયાએ DGCAના આદેશ મુજબ, બોઈંગ 787 ડ્રીમલાઈનરના 9 વિમાનોની સેફ્ટી ચકાસણી પૂર્ણ કરી છે, અને બાકીના 24 વિમાનોનું ઓડિટ ચાલુ છે. કુલ 33 બોઇંગ 787 વિમાનો એર ઇન્ડિયાના ફલિટમાં છે. DGCAએ વધુમાં તમામ વિમાનોનું સેફ્ટી ઓડિટ અને મેન્ટેનન્સ ચેક વધારવાનો આદેશ આપ્યો છે.