અમદાવાદ: સરસપુર મોસાળ મંદિરે જગન્નાથજીને ભવ્ય મામેરું અર્પણ, ભક્તો ઉમટ્યા

અમદાવાદ: ગુજરાતની સૌથી મહત્ત્વપૂર્ણ ધાર્મિક શોભાયાત્રાઓમાંની એક એવી ભગવાન જગન્નાથની 148મી રથયાત્રા આ વર્ષે 27 જૂન, 2025 ના રોજ યોજાવાની છે, ત્યારે તેની પૂર્વ તૈયારીઓ પૂરજોશમાં ચાલી રહી છે. આજે, રવિવારે (22 જૂન), સરસપુર મોસાળ મંદિરે ભગવાન જગન્નાથને ભવ્ય મામેરું અર્પણ કરવામાં આવ્યું. વાસણાના મનીષભાઈ ત્રિવેદીના યજમાન પરિવારે આ મામેરું અર્પણ કર્યું હતું, જેના દર્શન માટે મોટી સંખ્યામાં ભક્તો ઉમટી પડ્યા હતા.

ભવ્ય મામેરું અને ભાવિકોનો ઉમંગ

અમદાવાદના સરસપુર મોસાળ ખાતે આવેલા મંદિરે ભગવાન જગન્નાથને ભવ્ય મામેરું અર્પણ કરાતા, સરસપુરથી શારદાબહેન હોસ્પિટલ સુધી ભાવિકોની ભારે ભીડ જોવા મળી હતી. ભગવાન જગન્નાથ માટે ખાસ ફૂલોની ડિઝાઈનના સુંદર વાઘા અને સોના-ચાંદીના આભૂષણો તૈયાર કરાયા હતા, જેમના દર્શન કરવા માટે મંદિર આગળ ભક્તોની લાંબી કતાર લાગી હતી.

મામેરુ ભગવાનને અર્પણ કરનાર યજમાન પરિવારે જણાવ્યું કે, વાસણાની અરિહંત સોસાયટી ખાતે આવતીકાલે સોમવારે (23 જૂન) સવારે 7:30 વાગ્યે આ મામેરું લાવવામાં આવશે. ત્યાંથી સમગ્ર વિસ્તારને આવરી લેતી એક ભવ્ય શોભાયાત્રાનું આયોજન કરવામાં આવ્યું છે. આ શોભાયાત્રામાં ભજન મંડળીઓ, ઘોડા-ઊંટના દળો અને સાંસ્કૃતિક ઝાંખીઓનો સમાવેશ થશે, જેમાં મોટી સંખ્યામાં શ્રદ્ધાળુઓ જોડાશે.

રથયાત્રાને લઈને પોલીસ તંત્ર સજ્જ અમદાવાદ શહેર પોલીસ કમિશનર જી. એસ. મલિકે રથયાત્રાની સુરક્ષા વ્યવસ્થા અંગે માહિતી આપતા જણાવ્યું કે, આગામી 27 જૂનના રોજ યોજાનારી રથયાત્રા માટે રૂટ પર નિરીક્ષણ અને રિહર્સલ કરવામાં આવશે. 24 જૂને સવારે 6 વાગ્યે અને 25 જૂને બે વખત રિહર્સલનું આયોજન છે. આ ઉપરાંત, શાંતિ સમિતિની બેઠકો, ક્રિકેટ મેચ અને વોલીબોલ મેચનું પણ આયોજન કરવામાં આવ્યું છે. પોલીસ દ્વારા અસામાજિક તત્ત્વોને પકડવાની કામગીરી પણ સતત ચાલી રહી છે, જેથી રથયાત્રા સુપેરે સંપન્ન થઈ શકે.