હૃદય કંપાવતું સત્ય: 'તું કલ ચલા જાયેગા...' ગીત બન્યું ભવિષ્યવાણી, ઉત્તર ગુજરાતના ૧૮ લોકોના પ્લેન ક્રેશમાં મોત

અમદાવાદ ઇન્ટરનેશનલ ઍરપોર્ટ પરથી લંડન જવા રવાના થયેલા એર ઇન્ડિયાના બોઇંગ વિમાનના મેઘાણીનગર વિસ્તારમાં થયેલા ક્રેશમાં મોટાભાગના મુસાફરોએ પોતાના જીવ ગુમાવ્યા છે. આ હૃદયદ્રાવક દુર્ઘટનામાં ઉત્તર ગુજરાતના મહેસાણા, પાટણ, બનાસકાંઠા અને અરવલ્લી જિલ્લાના ૧૮ જેટલા લોકો પણ કાળનો કોળિયો બન્યા છે. મૃતકોમાં વિસનગર, કડી, ચંદુમાણા, ઉંઝાના ઐઠોર, ધાનેરા, પાલનપુર, મોડાસા, ખંભીસર, બાયડ, અને દાંતા વિસ્તારના મુસાફરોનો સમાવેશ થાય છે.

આ કરુણાંતિકાએ ગુજરાત સહિત સમગ્ર દેશને સ્તબ્ધ કરી દીધો છે. લંડન જવા નીકળેલા આ વિમાનમાં ૧૨ ક્રૂ મેમ્બર, રાજ્યના પૂર્વ મુખ્યમંત્રી વિજય રૂપાણી સહિત કુલ ૨૪૨ મુસાફરો સવાર હતા. ટેક ઓફના થોડા જ સમય બાદ આ બોઇંગ વિમાન મેઘાણીનગરમાં એકાએક ક્રેશ થઈ જતાં અકલ્પનીય કરુણાંતિકા સર્જાઈ હતી. એરપોર્ટ પર સ્વજનોને મૂકવા આવેલા મોટાભાગના પરિજનો જ્યારે પોતાના ઘરે પરત ફરી રહ્યા હતા, ત્યારે જ તેમને પ્લેન ક્રેશના આઘાતજનક સમાચાર મળ્યા હતા.

નવ યુગલનો વિદેશ સ્થાયી થવાનો અધૂરો સ્વપ્ન

આ દુર્ઘટનામાં બનાસકાંઠા જિલ્લાના ધાનેરા તાલુકાના થાવર ગામના એક નવ યુગલનું કરુણ મૃત્યુ થયું છે. થાવર ગામના કમલેશ ચૌધરી અને તેમની પત્ની ધાપુબહેન ચૌધરી વિદેશ સ્થાયી થવા માટે લંડન જઈ રહ્યા હતા. તેમના અકાળ અવસાનથી પરિવારજનો પર જાણે આભ તૂટી પડ્યું છે.

'તું કલ ચલા જાયેગા તો મેં કયા કરુંગા...' ગીત બન્યું અંતિમ સંભારણું

વિમાન દુર્ઘટનામાં જીવ ગુમાવનાર વિસનગરના દિનેશકુમાર પટેલે આખી જિંદગી ખેતી કરી હતી. તેમનો દીકરો લંડન હોવાથી તેણે માતા-પિતાને ફરવા માટે બોલાવ્યા હતા. પહેલીવાર વિદેશયાત્રાએ જતાં હોવાથી, તેમના મિત્રોએ દિનેશકુમાર પટેલને ખેતરમાં એક વિદાય પાર્ટી આપી હતી. આ પાર્ટીમાં જૂના મિત્રોએ હિન્દી ફિલ્મનું હૃદયસ્પર્શી ગીત 'તુ કલ ચલા જાયેગા તો મેં ક્યા કરુંગા' વગાડ્યું હતું. ત્યારે મિત્રોને ક્યાં ખબર હતી કે વિદેશ જઈ રહેલા મિત્ર સાથેની આ તેમની છેલ્લી મુલાકાત હશે.

પુત્રનું નવું ઘર જોવા જતાં પિતાનો કરુણ અંત

અમદાવાદના મેઘાણીનગર પાસે પ્લેન ક્રેશની દુર્ઘટનામાં કડીથી પોતાના પુત્રને યુકે મળવા માટે જઈ રહેલા ૭૧ વર્ષીય સિનિયર સિટીઝન રતિલાલ પટેલનું પણ મૃત્યુ થયું છે, જેનાથી તેમના પરિવારમાં શોકનો માહોલ છવાઈ ગયો છે. કડીના દેત્રોજ રોડ પર રહેતા રતિલાલ પટેલના ત્રણ દીકરા પૈકી તેજસ છેલ્લા ૧૮ વર્ષથી યુકેમાં સિટીઝન તરીકે પોતાના પરિવાર સાથે વસવાટ કરે છે. તેણે ત્યાં નવું મકાન લીધું હોવાથી પોતાના પિતા રતિલાલ પટેલને બોલાવ્યા હતા. તેમને મૂકવા માટે તેમનો પુત્ર તેમજ પરિવારજનો ગુરુવારે અમદાવાદ ઍરપોર્ટ ગયા હતા. લંડન જવા તેઓ જે વિમાનમાં સવાર થયા હતા, તે એકાએક અમદાવાદ શહેરના મેઘાણીનગર વિસ્તારમાં તૂટી પડતાં વયોવૃદ્ધ રતિલાલ પટેલ પણ દુર્ઘટનાનો ભોગ બન્યા. મૃતકના સંબંધી શૈલેષભાઈ પટેલે જણાવ્યું કે, "અમારા વિસ્તારમાં રહેતા રતિભાઈ તેમના દીકરાને મળવા માટે આજે સવારે નીકળ્યા હતા."

દીકરાના તેડાંથી પતિ-પત્નીની અધૂરી યાત્રા

લંડનમાં રહેતા પોતાના દીકરાએ પાટણ તાલુકાના ચંદ્રુમાણા ગામે રહેતા સિનિયર સિટીઝન કુબેરભાઈ પટેલ અને તેમના ધર્મપત્ની બબીબહેનને ફરવા માટે બોલાવ્યા હતા. ઉત્સાહભેર પુત્રને મળવા માટે લંડન જવા નીકળેલા આ દંપતી બપોરે અમદાવાદ ઇન્ટરનેશનલ ઍરપોર્ટ પરથી ટેક ઑફ થયેલા એર ઇન્ડિયાના બોઇંગ વિમાનમાં સવાર થયા હતા. થોડા જ કલાકોમાં લંડન જઈ દીકરાને મળીશું તેવા વિચારો કરતા હશે, ત્યાં જ વિમાન ક્રેશ થઈ જતાં કરુણાંતિકા સર્જાઈ હતી.

છ મહિના પહેલાં પરણેલી યુવતી પતિને ન મળી શકી

વિસનગરના ગંજી વિસ્તારના અંકિતાબહેન પટેલના લગ્ન હજુ છ મહિના પહેલાં જ લંડનમાં રહેતા વસંતકુમાર પટેલ સાથે થયા હતા. ત્યારબાદ લંડનના વિઝા મળતાં જ તેઓ પતિને મળવા જવા માટે ખૂબ ઉત્સુક હતા. ફ્લાઇટની ટિકિટ કન્ફર્મ થતાં ગુરુવારે ગંજીના નાકે આવેલા ઉંચી ફળીના માઢ પાસે યુવતીના સ્નેહીજનોએ હોંશેહોંશે વિદાય આપી હતી. પરંતુ સ્નેહીજનોને ક્યાં ખબર હતી કે દીકરીને આપેલી આ વિદાય છેલ્લી હશે.

પુત્રવધૂના સીમંતના પ્રસંગે જતાં દંપતીનો કરુણ અંત

પાલનપુરની લક્ષ્મણ ટેકરી વિસ્તારમાં રહેતા રમેશભાઈ ઠક્કરના લંડન રહેતા પુત્રની ધર્મપત્નીનો સીમંતનો પ્રસંગ હોવાથી તેમાં હાજરી આપવા માટે તેઓ પોતાના પત્ની લાભુબહેન સાથે સવારે અમદાવાદ ઍરપોર્ટ ઉપર ગયા હતા. અહીં તેઓ એર ઇન્ડિયાના લંડન રવાના થયેલા વિમાનમાં બેઠા જ હતા, ત્યાં થોડીક જ વારમાં આ પ્લેન ક્રેશ થઈ ગયું હતું.