અમદાવાદ વિમાન દુર્ઘટનામાં 241 પેસેન્જર્સ ઉપરાંત 4 ઈન્ટર્ન ડોક્ટરોનાં મોત

અમદાવાદના મેઘાણીનગરમાં ગુરૂવારે વિમાન તૂટી પડ્યું હતું. ટેકઓફ કરી રહેલા વિમાનમાં ખામી સર્જાતા બી.જે.મેડિકલ કોલેજની હોસ્ટેલ બિલ્ડીંગ ઉપર ક્રેશ થયું હતું. આ દુર્ઘટનામાં વિમાનના ક્રૂ મેમ્બર સહિત 242 લોકોમાંથી 241 ના મોત થયા છે. દિવનો એક મુસાફર બચી ગયો છે. વિમાનના મુસાફરો ઉપરાંત મેડિકલ કોલેજમાં અભ્યાસ કરતાં ચાર ઈન્ટર્ન ડોક્ટરોના મોત થયા છે. જ્યારે 29 ઈન્ટર્ન ડોક્ટરો ઈજાગ્રસ્ત થતાં હોસ્પિટલમાં સારવાર હેઠળ છે. જેમાંથી 2 ઈન્ટર્ન ડોક્ટર્સની હાલત ગંભીર હોવાનું જાણવા મળ્યું છે. 

અમદાવાદથી લંડન જઈ રહેલું વિમાન ટેકનિકલ ખામીના કારણે બી.જે.મેડિકલ કોલેજના ક્વાર્ટર્સ અને કેન્ટીન બિલ્ડીંગ ઉપર તૂટી પડ્યું હતું. વિમાનમાં સવા લાખ લીટર ઈંધણ ભરેલું હોવાથી હોસ્ટેલ બિલ્ડીંગ અને કેન્ટીનમાં આગ લાગી હતી. જેના કારણે મેડિકલ કોલેજમાં અભ્યાસ કરતાં વિદ્યાર્થીઓ ઘાયલ થયા હતા. સૂત્રોના જણાવ્યા અનુસાર આ દુર્ઘટનામાં 33 જેટલાં વિદ્યાર્થીઓ ઈજાગ્રસ્ત થયા હતા. જેમાંથી 4 વિદ્યાર્થીઓ એટલે કે ઈન્ટર્ન ડોક્ટરોના મોત થયા છે. જ્યારે 29 ઈન્ટર્ન ડોક્ટરો સારવાર હેઠળ છે. જેમાંથી બે ની હાલત ગંભીર બતાવાઈ રહી છે. 

દુર્ઘટનામાં બી.જે.મેડિકલ કોલેજમાં બીજા વર્ષમાં અભ્યાસ કરતા રાકેશ દિયોરા અને જયપ્રકાશ ચૌધરી તેમજ પહેલા વર્ષમાં અભ્યાસ કરતા આર્યન રાજપુત અને માનવ ભાદુનું મોત થયું છે. જ્યારે બીજા વર્ષમાં અભ્યાસ કરતા ભાવેશ શેઠ અને પહેલા વર્ષમાં અભ્યાસ કરતા આશિષ મીનાની હાલત ગંભીર બતાવવામાં આવી રહી છે. આ ઘટનાથી મેડિકલ કોલેજ અને તબીબી ક્ષેત્રમાં શોકનું મોજું ફરી વળ્યું છ. વિદ્યાર્થીઓ અને તેમના પરિવારોમાં ભારે દુઃખ સાથે ચિંતા પ્રસરી ગઈ છે.

વડાપ્રધાન નરેન્દ્ર મોદીએ શુક્રવારે સવારે(13 જૂન) પરિસ્થિતિની સમીક્ષા કરવા અમદાવાદ પહોંચ્યા હતા. તેમણે ઘટના સ્થળની રૂબરૂ મુલાકાત લીધી હતી. ત્યારબાદ સિવિલ હોસ્પિટલમાં સારવાર લઈ રહેલા ઇજાગ્રસ્તોને મળ્યા હતા. વડાપ્રધાને પ્લેન ક્રેશ થવાના કારણે ક્ષતિગ્રસ્ત થયેલી મેડિકલ કોલેજ હોસ્ટેલ અને કેન્ટીન બિલ્ડિંગનું નિરીક્ષણ કર્યું હતું. આ સમયે મુખ્યમંત્રી ભૂપેન્દ્ર પટેલ, કેન્દ્રીય ઉડ્ડયન મંત્રી કિંજારાપ્પુ રામ મોહન નાયડુ, કેન્દ્રીય જળશક્તિ મંત્રી સી. આર. પાટીલ, કેન્દ્રીય રાજ્ય ઉડ્ડયન મંત્રી મુરલીધર મોહોલ જોડાયા હતા. વડાપ્રધાને ઘટના સ્થળ અને સિવિલ હોસ્પિટલની મુલાકાત બાદ મુખ્યમંત્રી તેમજ કેન્દ્ર અને રાજ્ય સરકારના મંત્રીઓ, સચિવો સાથે બેઠક કરી ઘટનાની સમીક્ષા કરી હતી.

ઉલ્લેખનીય છે કે, વિમાન દુર્ઘટનામાં પેસેન્જર અને ડોક્ટર્સ ઉપરાંત મેડિકલ કોલેજની કેન્ટીનમાં રસોઈ બનાવવાનું કામ કરતા સરલાબેન પણ દુર્ઘટનાનો ભોગ બન્યા હતા. સરલાબેનના પતિ દુર્ઘટના પહેલાં નીકળી ગયા હતા. ત્યારબાદ દુર્ઘટના ઘટી હતી. શુક્રવારે સરલાબેનના પતિએ મૃતદેહની ઓળખ માટે DNA સેમ્પલ આપ્યા છે. અહીંયા અંડરગ્રેજ્યુએટ અને પોસ્ટ ગ્રેજ્યુએટ ડોકટરો રહેતા હતા. બપોરે લંચ બ્રેક શરૂ થયાની થોડી મિનિટોમાં દુર્ઘટના બની હતી.