અમદાવાદ વિમાન દુર્ઘટનાઃ મૃતક ડોક્ટર્સ અને સ્ટાફના પરિવારજનોની સુપ્રીમકોર્ટમાં અરજી

અમદાવાદમાં ગુરૂવારે બનેલી વિમાન દુર્ઘટના અંગે અલગ અલગ એજન્સીઓએ તપાસ શરૂ કરી છે. તેવા સમયે એર ઈન્ડિયા ફ્લાઈટ AI-171 દુર્ઘટનાની તપાસ અને વળતર મામલે સુપ્રીમ કોર્ટમાં અરજી કરવામાં આવી છે. દુર્ઘટનામાં મૃત્યુ પામેલા બી.જે. મેડિકલ કોલેજના વિદ્યાર્થીઓ, સ્ટાફ તેમજ રેસિડન્ટ ડોક્ટર્સના  પરિવારજનોને રૂપિયા 50 લાખનું વચગાળાનું વળતર આપવા બે ડોક્ટર્સે સુપ્રીમ કોર્ટમાં માગ કરી છે.  

સુપ્રીમકોર્ટમાં કરાયેલી અરજીમાં માગ કરી છે કે, સુપ્રીમકોર્ટ પ્રત્યેક મૃતકના પરિવારજનો (બી.જે.મેડિકલ કોલેજ હોસ્ટેલ)ને રૂપિયા 50 લાખ સુધીનું વચગાળાનું વળતર ચૂકવવા કેન્દ્ર સરકારને આદેશ આપે.  કેન્દ્ર સરકારને આ મામલે એક ઉચ્ચ સ્તરીય નિષ્ણાતની સમિતિની રચના કરવા પણ ફરજ પાડે. જેમાં સુપ્રીમકોર્ટ તથા હાઈકોર્ટના નિવૃત જજ, વિમાન તજજ્ઞ, અર્થશાસ્ત્રી અને વીમા નિષ્ણાતોનો સમાવેશ કરવામાં આવે. આ સમિતિ અસરગ્રસ્ત પરિવારોને વળતર આપવાનો નિર્ણય લે. આ નિર્ણય લેવા માટે તેઓ ત્રિવેણી કોડકની વર્સીસ એર ઈન્ડિયા લિમિટેડ કેસમાં સુપ્રીમ કોર્ટના સ્થાપિત સિદ્ધાંતોનું અનુસરણ કરે.

અપીલમાં પીડિતો માટે ઝડપથી વળતર નિર્ધારિત કરવાની માગ કરવામાં આવી છે. જેથી અસરગ્રસ્ત પરિવારોએ લાંબી કાયદાકીય પ્રક્રિયાનો સામનો કરવો પડે નહીં. બિલ્ડિંગ અને રહેણાંક વિસ્તારના મૃતકોના પરિવારજનોને પુનર્વસન સહાયતા અને રોજગારીની તકો પણ પ્રદાન કરે. અરજદારોએ સુપ્રીમ કોર્ટ સમક્ષ અપીલ કરી છે કે, આ દુર્ઘટનાના કારણોની ઊંડી અને સચોટ તપાસ માટે સંબંધિત અધિકારીઓને નિર્દેશ આપે તેમજ ભવિષ્યમાં આ પ્રકારની દુર્ઘટના ન બને તે માટે આવશ્યક પગલાં લે.

ઉલ્લેખનીય છે કે, વિમાન દુર્ઘટનામાં વિમાનમાં સવાર બે પાયલોટ, 10 ક્રૂ મેમ્બર્સ અને 230 પેસેન્જર્સ પૈકી 229 પેસેન્જર્સના મોત થયા છે. આ ઉપરાંત બી.જે.મેડિકલ કોલેજમાં અભ્યાસ કરતાં 4 વિદ્યાર્થીઓ, એક રેસીડેન્સ ડોક્ટરના સગર્ભા પત્ની, એક ટિફિન આપવા આવતા મહિલા, એક ચાની કીટલીવાળા મહિલાના દીકરાનું મોત થયું હોવાની પુષ્ટિ થઈ છે. જ્યારે આ કેમ્પસમાં હાજર અન્ય 50 જેટલા લોકો હોસ્પિટલમાં સારવાર હેઠળ હોવાનું જાણવા મળ્યું છે.