રાજુલા પંથકમાં સિંહે પરપ્રાંતીય યુવકને ફાડી ખાધો

કોવાયા ગામ નજીક હચમચાવી દેનારી ઘટના
અમરેલી જિલ્લાના રાજુલા તાલુકાના કોવાયા ગામ નજીક અત્યંત દુઃખદ ઘટના બની છે. રાત્રિના સમયે સિંહના હુમલામાં એક પરપ્રાંતીય યુવકનું મોત નીપજ્યું હતું. ઘટનાસ્થળેથી મળેલા અવશેષોના આધારે સમગ્ર વિસ્તારમાં ભય અને ચિંતાનો માહોલ ફેલાયો છે. સ્થાનિક લોકોમાં વનવિભાગની કામગીરી સામે નારાજગી જોવા મળી રહી છે.

વતન જવા નીકળેલો યુવક બન્યો હુમલાનો ભોગ
મૃતક યુવાન ઉત્તરાખંડના પિથૌરાગઢ જિલ્લાના રહેવાસી પ્રકાશચંદ્ર છે. તે સ્થાનિક રેસ્ટોરન્ટમાં કામ કરતો હતો અને ગામની બહાર રહેતો હતો. રાત્રિના સમયે પોતાના વતન તરફ જવા નીકળેલા યુવક પર જંગલ વિસ્તારમાં સિંહે હુમલો કર્યો હતો. સિંહ યુવકને ઢસડીને ઝાડીઓમાં લઈ ગયો હતો, જ્યાં તેણે યુવકનું માથું ધડથી અલગ કરી નાખ્યું હતું અને આખું શરીર ફાડી ખાધું હતું. સવારે ઘટનાની જાણ થતાં જ સ્થાનિક લોકો ઘટનાસ્થળે દોડી આવ્યા હતાં. બીજા દિવસે ઘટનાની જાણ થતાં લોકો અને તંત્ર સ્થળ પર પહોંચી ગયું હતું.

વનવિભાગે શરૂ કર્યું રેસ્ક્યૂ ઓપરેશન
ઘટનાની ગંભીરતાને ધ્યાનમાં રાખી રાજુલા અને જાફરાબાદ રેન્જની ટીમો તાત્કાલિક સ્થળ પર તહેનાત કરવામાં આવી હતી. સમગ્ર વિસ્તારનું સ્કેનિંગ હાથ ધરાયું હતું અને આસપાસના વિસ્તારમાંથી બે સિંહને પાંજરે પુરવામાં આવ્યા છે. અન્ય વન્યપ્રાણીઓની હિલચાલ પર પણ નજર રાખવામાં આવી રહી છે.

વૈજ્ઞાનિક તપાસ બાદ થશે ઓળખ
વન વિભાગના અધિકારીઓના જણાવ્યા અનુસાર, વિવિધ સેમ્પલ એકત્ર કરીને વૈજ્ઞાનિક તપાસ કરવામાં આવશે. તેના આધારે હુમલા માટે જવાબદાર વન્ય પ્રાણીની ઓળખ થઈ શકશે. હાલ નિષ્ણાતોની દેખરેખ હેઠળ સમગ્ર પ્રક્રિયા ચાલી રહી છે.

સ્થાનિકોમાં ભય અને રોષ

ઘટનાને પગલે સ્થાનિક લોકોમાં વનવિભાગ સામે ભારે રોષ જોવા મળી રહ્યો છે. ખાનગી કંપનીના કર્મચારી અમરુભાઈ વાઘે જણાવ્યું હતું કે, અહીં આસપાસ પાંચ-સાત કંપની આવેલી છે. જ્યાં લોકો દિવસ-રાત શિફ્ટમાં નોકરી કરે છે. અહીં અવારનવાર સિંહો કુતરાની જેમ આંટા મારતા હોય છે. જેના કારણે અવરજવર કરવામાં ભારે તકલીફ પડે છે.

કોઈની પાસે ફોર-વ્હીલર ગાડી હોય તો જ તે સુરક્ષિત છે. બાકી ટુ-વ્હીલર પર કે પગપાળા જતાં લોકો માટે કોઈ સેફ્ટી નથી. વનવિભાગ તાત્કાલિક એક્શન લે અને લોકોની સુરક્ષા માટે વનકર્મીઓ તહેનાત કરે તે જરૂરી છે. અહીં સિંહોની અવરજવર સતત ચાલુ જ રહે છે. દિવસે કે રાતે ગમે ત્યારે સિંહો જોવા મળે છે. અત્યારની જ વાત કરીએ તો કંપનીના ગેટની બિલકુલ આગળ જ આઠ સિંહ બેઠા છે.

સરપંચે સરકાર સમક્ષ કરી માંગ
કોવાયા ગામના સરપંચે રાજ્ય સરકાર અને વન વિભાગને રજૂઆત કરી છે કે આવા બનાવો અટકાવવા માટે વધુ ટ્રેકર્સ અને વનકર્મીઓની નિમણૂક કરવામાં આવે. પીડિત પરિવારને તાત્કાલિક આર્થિક સહાય આપવામાં આવે અને ભવિષ્યમાં સુરક્ષા માટે અસરકારક પગલાં લેવામાં આવે.

ધારાસભ્યે કર્મચારીઓની સંખ્યા વધારવા કરી અપીલ
રાજુલાના ધારાસભ્ય હીરા સોલંકીએ જણાવ્યું હતું કે, સિંહોની સંખ્યા વધવી ગૌરવની બાબત છે. પરંતુ માનવ જીવનની સુરક્ષા પણ એટલી જ મહત્વપૂર્ણ છે. તેમણે રાજ્ય સરકારને વન વિભાગના કર્મચારીઓ અને કેરટેકરોની સંખ્યા વધારવા અપીલ કરી છે.

અગાઉ પણ બની ચૂક્યા છે આવા બનાવ

અમરેલી જિલ્લાના જાફરાબાદ તાલુકામાં 20 દિવસ અગાઉ પણ આવી જ ઘટના બની હતી. ભાકોદર ગામ નજીક બાવળની ઝાડીઓમાંથી એક યુવાનનો ક્ષત-વિક્ષત મૃતદેહ મળી આવ્યો હતો. પ્રાથમિક તપાસમાં યુવાન પર સિંહે હુમલો કરી તેને ફાડી ખાધો હોવાની આશંકા વ્યક્ત કરવામાં આવી હતી.

રોગચાળાના કારણે 12 સિંહના મોત થયા હતા

ગીર પશ્ચિમ રેન્જની બાબરીયા અને પૂર્વની જસાધાર રેન્જમાં છેલ્લા 15 દિવસથી સિંહોમાં બેબેસિયા અને સીવીડી વાયરસની આશંકા વચ્ચે રોગચાળો ફાટી નીકળ્યો હતો. આ રોગના કારણે અંદાજે 12 સિંહના મોત થયા હતા. જો કે થોડા સમય પહેલાં જ વનમંત્રીએ કહ્યું હતું કે, પરિસ્થિતિ નિયંત્રણમાં છે.