હાંસોટમાં દારૂની મહેફિલ માણતા પોલીસકર્મીઓ સહિત 7 વિરુદ્ધ ગુનો નોંધાયો, વીડિયો વાયરલ

ભરૂચ જિલ્લાના હાંસોટ તાલુકા પોલીસ મથકે ફરજ બજાવતા 2 પોલીસકર્મીઓ સહિત 7 લોકો દારૂની મહેફિલ માણતા હોવાનો વીડિયો સોશિયલ મીડિયા પર વાયરલ થતા પોલીસ વિભાગમાં ખળભળાટ મચી ગયો છે. આ ઘટના ભરૂચ પોલીસ હેડક્વાટરના વર્કશોપમાં 2 પોલીસકર્મીઓ દારૂનું સેવન કરતા ઝડપાયા બાદ 48 કલાકની અંદર જ બની છે, જેના કારણે ભરૂચ પોલીસની આબરૂ ધૂળમાં મળી છે. જિલ્લા પોલીસ વડાએ ઘટનાની ગંભીરતાને ધ્યાને લઈ તાત્કાલિક તપાસના આદેશ આપ્યા હતા, અને 7 લોકો વિરુદ્ધ પ્રોહિબિશન એક્ટ હેઠળ ગુનો નોંધવામાં આવ્યો છે.

આ ઘટનામાં હાંસોટ પોલીસ મથકના PIના રાઈટર હિતેશ પરમાર (ASI) અને પોલીસ જીપના ડ્રાઈવર ઠાકોરભાઈ ગોમાનભાઈ પટેલ (GRD) સહિત મુજાદ મોહંમદ ઝફર શેખ, મોહંમદ સફીક શેખ, નાસીરભાઈ, મહંમદ અનીસ મેમણ અને રઈશભાઈનો સમાવેશ થાય છે. આ લોકો એક મકાનમાં દારૂની મહેફિલ જમાવી નશામાં ડાન્સ કરતા હોવાનો વીડિયો કોઈએ રેકોર્ડ કરીને સોશિયલ મીડિયા પર શેર કર્યો હતો, જે ઝડપથી વાયરલ થયો.

આ ઘટના પહેલાં ભરૂચ LCB પોલીસે ભરૂચ હેડક્વાર્ટરના 2 પોલીસકર્મીઓને ફરજ દરે દારૂ પીવાના આરોપસર ઝડપ્યા હતા, જેની ફરિયાદ નોંધાઈ હતી. તપાસ દરમિયાન જાણવા મળ્યું કે, અમેરિકાની આવેલા એક મિત્ર દ્વારા આ પાર્ટીનું આયોજન કરવામાં આવ્યું હતું. જિલ્લા પોલીસ વડાએ આ મામલે તપાસનો દોર શરૂ કર્યો, હાંસોટ પોલીસ મથકે ઉપરોક્ત 7 લોકો વિરુદ્ધ ગુનો નોંધી કઠોર કાર્યવાહી હાથ ધરી છે. ભવિષ્યમાં આવી ઘટનાઓ ન બને તે માટે પોલીસતંત્ર દ્વારા કડક પગલાં લેવામાં આવી રહ્યા છે.