રાજકોટમાં 19 બંગાળી બાળમજૂરોને મુક્તિ, શરીર પર ઇજાના નિશાન જોઈ પોલીસ પણ ચોંકી ગઈ

રાજકોટના બેડી ચોક પાસે આવેલા ગોપાલ રેસિડેન્સી શેરી નંબર 1ના એક મકાનમાંથી 19 બંગાળના બાળમજૂરોને મુક્ત કરાવવામાં આવ્યા છે. 5 જૂન, ગુરુવારે રાત્રે શહેર પોલીસ અને SOG તથા એન્ટી હ્યુમન ટ્રાફિકિંગ સેલની ટીમે સંયુક્ત રીતે કાર્યવાહી કરી હતી.

ઈમિટેશન કામ માટે ગોંધી રાખેલા બાળકો

પ્રાથમિક તપાસમાં ખુલ્યું છે કે, આ તમામ બાળકો પશ્ચિમ બંગાળના રહેવાસી છે અને છેલ્લા 2 વર્ષથી અલગ-અલગ સમયે કોન્ટ્રાક્ટર દ્વારા રાજકોટ લાવવામાં આવ્યા હતાં. તેમને ઈમિટેશનના કામ માટે વાપરવામાં આવતા હતા.

શરીરે ઈજાના નિશાન જોઈ તપાસ શરુ

બાળકોને મુક્ત કર્યા બાદ પોલીસને તેમના શરીરે હાથ અને પીઠ પર ઇજાના નિશાન જોવા મળ્યા, જેનાથી તેઓને માર માર્યો હોવાનું અનુમાન લગાવવામાં આવ્યું છે. તમામ બાળકોને મેડિકલ ચેકઅપ માટે મોકલવામાં આવ્યા છે.

મકાન માલિક સામે તપાસ

જે ઘરમાંથી બાળકો મળી આવ્યા તે મકાનના માલિક બાબુભાઈ બાળા હોવાનું ખુલ્યું છે. હાલ તપાસ કરવામાં આવી રહી છે કે, મકાન ભાડે આપવામાં ભાડાકરાર થયો હતો કે નહીં. જો નહિ થયો હોય તો જાહેરનામા ભંગનો ગુનો પણ નોંધાશે.