બનાસ નદી પર બનાવેલા રેલવે બ્રિજના પિલ્લરો 10 વર્ષમાં જ જર્જરિત

કાંકરેજના ઉંબરી ગામમાં બનાસ નદી પર બનાવેલા રેલવે બ્રિજના પિલ્લરો માત્ર 10 વર્ષમાં જ જર્જરિત થઇ ગયા છે. આ બ્રિજનું કામ 2013માં અજય ઇન્ફ્રા મહેસાણા દ્વારા પૂર્ણ કરવામાં આવ્યું હતું. પરંતુ, 10 વર્ષમાં જ પિલ્લરોથી લોખંડ દેખાવા લાગ્યું અને કેટલાક પિલ્લરોમાંથી કપચીઓ ખરવાલાગી છે.

રેલવે વિજિલન્સની તપાસ દરમિયાન, આ બ્રિજના પિલ્લરોનુ નિર્માણ કરતી વખતે સિમેન્ટ અને કોંક્રેટની ગુણવત્તામાં ખામી હોવાનો ખુલાસો થયો છે. તેના પરથી અનુમાન લગાવી શકાય કે હલકી ગુણવત્તાવાળા સામગ્રીના ઉપયોગને કારણે આ પિલ્લરો ઝર્જરીત થઇ ગયા હતા.

મળતી માહિતી અનુસાર, અજય ઇન્ફ્રા મહેસાણા દ્વારા હાલ આ રેલવે બ્રિજના સમારકામની પ્રક્રિયા શરૂ કરવામાં આવી છે, પરંતુ હાલની સ્થિતિ એવી છે કે, અહીંથી પસાર થતી ટ્રેનો 10 કિ.મી.ની સ્પીડમાં જ પસાર કરવામાં આવી રહી છે, જેના કારણે સંકટ ઊભું થતું જાય છે. આ બ્રિજ કોઈ પણ સમયે તૂટી શકે છે, જે ખૂબ જ ખતરનાક સાબિત થઈ શકે છે.

રેલવે વિજિલન્સ તપાસના પગલે, વેસ્ટર્ન રેલવે હેડ ઓફિસ, ચર્ચગેટ, મુંબઈની સુચના પર, ડેપ્યુટી ઇજનેર અશોક કુમાર સિંગે અજય એન્જિનિયર્સ મહેસાણા વિરુદ્ધ ફરિયાદ નોંધાવી છે.