પાસપોર્ટ સેવા દિવસ પર વિદેશમંત્રી જયશંકરની ઈ-પાસપોર્ટ રોલઆઉટની જાહેરાત 

વિદેશ મંત્રાલય (MEA) 24 જૂને 13મો પાસપોર્ટ સેવા દિવસ ઉજવી રહ્યું છે. આ પ્રસંગે વિદેશ મંત્રી એસ. જયશંકરે X પર અભિનંદન પાઠવ્યા છે. પાસપોર્ટ દિવસ પર જયશંકરે કહ્યું કે મારા માટે ખૂબ જ આનંદની વાત છે કે હું 13મા પાસપોર્ટ સેવા દિવસ નિમિત્તે દેશ અને વિદેશમાં કાર્યરત આપણા તમામ પાસપોર્ટ જારી કરનારા અધિકારીઓ સાથે જોડાઈ રહ્યો છું.

24 જૂન 1967ના રોજ પસાર થયેલા પાસપોર્ટ કાયદાના માનમાં વિદેશ મંત્રાલય છેલ્લા કેટલાક વર્ષોથી તેને પાસપોર્ટ સેવા દિવસ તરીકે ઉજવી રહ્યું છે. એસ. જયશંકરે કહ્યું કે, "સેવા, સુશાસન અને ગરીબ કલ્યાણ" એ શાસનના ત્રણ મુખ્ય સ્તંભો છે, જે આપણને વિકસિત ભારત તરફ દોરી જશે. આ બધા આપણા પાસપોર્ટ સેવા કાર્યક્રમમાં મુખ્ય રીતે સામેલ છે. છેલ્લા 11 વર્ષમાં જાહેર સેવા વિતરણમાં મોટો ફેરફાર થયો છે. 2014માં ફક્ત 91 લાખ પાસપોર્ટ હતા. જે 2024માં આપણે 1.46 કરોડ પાસપોર્ટ સુધી પહોંચી ગયા છીએ." 

વધુમાં જણાવ્યું કે, "ભારત સરકારની નાગરિકોને આગામી પેઢીની સેવાઓ પૂરી પાડવાની પ્રતિબદ્ધતાને અનુરૂપ અમે દેશભરમાં 'PSP V 2.0' (પાસપોર્ટ સેવા કાર્યક્રમ 2.0) લાગુ કર્યું છે. આ સિસ્ટમ અદ્યતન અને અત્યાધુનિક તકનીકોનો ઉપયોગ કરશે. વૈશ્વિક 'PSP V 2.0'નું પાયલોટ પરીક્ષણ ચાલુ છે અને તે તમામ ભારતીય દૂતાવાસો અને કોન્સ્યુલેટમાં તબક્કાવાર રીતે લાગુ કરવામાં આવશે."

જયશંકરે બીજી મહત્વપૂર્ણ સિધ્ધીનો ઉલ્લેખ કરતાં કહ્યું કે તે ઈ-પાસપોર્ટનો અમલ છે. ચિપમાં સંગ્રહિત ડેટાનું કોન્ટેક્ટલેસ સ્કેનિંગ ભારતીય નાગરિકોની મુસાફરીને વધુ અનુકૂળ બનાવે છે અને અધિકારીઓ સાથેનો તેમનો અનુભવ વધુ સરળ બનાવે છે. વધુમાં ઈ-પાસપોર્ટ એપના લોન્ચથી 25 રાજ્યો/કેન્દ્રશાસિત પ્રદેશોમાં પોલીસ વેરિફિકેશન માટેનો સમય ઘટાડીને 5-7 દિવસ કરવામાં આવ્યો છે જ્યાં આ એપ લાગુ કરવામાં આવશે. ઉપરાંત મોબાઇલ વાન સુવિધા દ્વારા દેશના સૌથી દૂરના વિસ્તારોમાં આ સેવા પહોંચી છે જેનાથી ત્યાંના નાગરિકો માટે પાસપોર્ટ સેવાઓ સરળ અને સુલભ બની છે.