નવસારી જિલ્લામાં ભાઈ-બહેનના સંબંધો શર્મસાર!

નવસારી જિલ્લામાં ભાઈ-બહેનના પવિત્ર સંબંધો શર્મસાર થયા છે. સગા મોટાભાઈએ નાની સગીર બહેન પર દુષ્કર્મ આચર્યાની ઘટના સામે આવી છે. દુષ્કર્મના કારણે નાની બહેનને ગર્ભ રહી ગયો હતો. ગર્ભ રહ્યાને 8 મહિના થઈ ગયા હોવાથી ગુજરાત હાઈકોર્ટે ગર્ભપાતની અરજી નામંજૂર કરી છે. આ તબક્કે ગર્ભપાત કરવાથી સગીરાના જીવને જોખમ હોવાના મેડિકલ રિપોર્ટના આધારે કોર્ટે કુદરતી પ્રસૂતિ સુધી ગર્ભાવસ્થા ચાલુ રાખવા આદેશ કર્યો છે. જ્યારે બાળકના જન્મથી લઈને દત્તક આપવા સુધીની તમામ પ્રક્રિયા અંગે રાજ્ય સરકારને હાઈકોર્ટે નિર્દેશ આપ્યા છે. 

કેવી રીતે થયો ગર્ભાવસ્થાનો ખુલાસો?
ભોગ બનનાર સગીરા તેની મોટી બહેનના બાળકને પોલિયોના ટીપાં પીવડાવવા આંગણવાડીમાં ગઈ હતી. ત્યાં હાજર સ્વાસ્થ્ય કાર્યકર બહેને સગીરાને જોઈ તેણી ગર્ભવતી હોવાની શંકા વ્યક્ત કરી હતી. ત્યારબાદ પ્રેગ્નન્સી કીટથી ટેસ્ટ કરતાં સગીરા ગર્ભવતી હોવાનું સામે આવ્યું હતું. બાદમાં સગીરાની મોટી બહેન તેણીને ડોક્ટર પાસે લઈ ગઈ હતી. સોનોગ્રાફી કરતાં તેણીને 7 મહિનાથી વધુનો ગર્ભ હોવાનું સામે આવ્યું હતું. આ સંદર્ભે ડોક્ટરે પોલીસને જાણ કરી હતી.

આરોપી ભાઈની ધરપકડ
ડોક્ટરે પોલીસને જાણ કરતાં પોલીસ સગીરાના ઘરે ગઈ હતી. પરંતુ ત્યાં કોઈ હાજર નહોતું. ત્યારબાદ પોલીસ ફરિયાદી મોટી બહેનના ઘરે આવી હતી. પરંતુ સગીરાના માતા-પિતા હાજર નહીં હોવાથી અને સગીરાના બાળકના પિતા કોણ હોવાની જાણ નહીં હોવાથી પોતે જાતે આવીને ફરિયાદ નોંધાવી જશે તેમ પોલીસને જણાવ્યું હતું. બાદમાં મોટી બહેન સગીરાને લઈને પોલીસ ફરિયાદ નોંધાવવા ગઈ હતી. સગીરાની પૂછપરછ દરમિયાન તેણી પર પોતાના સગા મોટા ભાઈએ દુષ્કર્મ આચર્યું હોવાનું જણાવ્યું હતું. તેથી મોટી બહેને બીલીમોરા પોલીસ મથકે ફરિયાદ નોંધાવી હતી. પોલીસે આરોપી સામે પોક્સો એક્ટ હેઠળ ગુનો નોંધીને આરોપી ભાઈની ધરપકડ કરી જેલમાં મોકલી દીધો છે.

સગીરાના સ્વાસ્થ્યના જોખમ
આ કેસમાં એડવોકેટ દ્વારા સગીરાના ગર્ભપાત માટે હાઈકોર્ટમાં દાદ માંગવામાં આવી હતી. કોર્ટના આદેશથી સુરત સિવિલ હોસ્પિટલની મેડિકલ ટીમે તપાસ કરી અહેવાલ આપ્યો હતો કે, આશરે 34 અઠવાડિયાનો ગર્ભ છે અને ભ્રુણ સંપૂર્ણ જીવંત તેમજ 2 કિલોથી વધુ વજન ધરાવે છે. આ તબક્કે ગર્ભપાત કરવાથી પીડિતાના સ્વાસ્થ્ય અને ભવિષ્યમાં ગર્ભાવસ્થાની સુરક્ષા સામે ગંભીર જોખમ ઊભું થઈ શકે તેમ હોવાથી ડોક્ટરોએ ગર્ભપાત ન કરવાની અને કુદરતી પ્રસૂતિ સુધી ગર્ભાવસ્થા ચાલુ રાખવાની સલાહ આપી હતી.ડોક્ટરોએ આપેલી સલાહને હાઈકોર્ટે ગ્રાહ્ય રાખી છે.

તમામ ખર્ચ રાજ્ય સરકાર ભોગવશે
મેડિકલ રિપોર્ટ અનુસાર હાઈકોર્ટે સગીરાના ગર્ભપાતની મંજૂરી આપી નથી. હાઈકોર્ટે હુકમ પસાર કરતા નિર્દેશ આપ્યા છે કે, મેડિકલ સુપ્રિટેન્ડેન્ટ સિવિલ હોસ્પિટલ સુરત પીડિતાની પ્રસૂતિ થાય ત્યાં સુધી તેના સ્વાસ્થ્યની યોગ્ય દેખરેખ રાખે. આ સાથે જ નવજાત બાળકના સારા વિકાસ અને સ્વાસ્થ્ય માટે જરૂરી નવજાત શિશુ સંભાળ સહિતની ખાસ સારવાર પૂરી પાડે. તબીબી નિષ્ણાતો દ્વારા સગીર પીડિતા અને નવજાત બાળકનું સમયાંતરે હેલ્થ ચેક-અપ કરવામાં આવે.

બાળક દત્તક સંસ્થાને સોંપવામાં આવશે
સગીર પીડિતાની ઈચ્છા અને નવજાત બાળકની શારીરિક સ્થિતિની ખાતરી કર્યા પછી બાળ કલ્યાણ સમિતિની દેખરેખ હેઠળ બાળકનો કબજો સુરતની માન્યતા પ્રાપ્ત દત્તક સંસ્થાને સોંપવામાં આવશે. રાજ્ય સરકાર પીડિતાની પ્રસૂતિનો તમામ તબીબી ખર્ચ, પીડિતા અને નવજાત બાળકની સારવાર અને પોષણનો ખર્ચ તેમજ પ્રસૂતિ પછીના 6 મહિના સુધીનો તમામ ખર્ચ ભોગવશે.

પીડિતાને વળતર ચૂકવવા આદેશ
જિલ્લા કાનૂની સેવા સત્તા મંડળને પીડિત વળતર યોજના હેઠળ યોગ્ય પ્રક્રિયા પૂર્ણ કરી પીડિતાને વહેલી તકે વચગાળાનું વળતર ચૂકવવા હાઈકોર્ટે આદેશ કર્યો છે. જિલ્લા કાનૂની સેવા સત્તા મંડળના સેક્રેટરીને આદેશ આપવામાં આવ્યો છે કે, તેઓ પીડિતાની પ્રસૂતિ થાય અને બાળકને સુરતની દત્તક સંસ્થાને સોંપવામાં ન આવે ત્યાં સુધી આ તમામ નિર્દેશોના પાલન પર સીધી દેખરેખ રાખે.