ફરજ પર જઇ રહેલા BSF જવાનોને ગંદી ટ્રેન આપનારા રેલવેના 4 અધિકારી સસ્પેન્ડ

ફરજ પર જઇ રહેલા બીએસએફ જવાનોને ગંદી અને ખસ્તાહાલ ટ્રેન આપવાના કેસમાં 4 રેલવે અધિકારીઓને સસ્પેન્ડ કરવામાં આવ્યા છે. આ કેસમાં, રેલવેએ પ્રાથમિક તપાસ બાદ બેદરકારીના આરોપસર આ અધિકારીઓને સસ્પેન્ડ કર્યા છે. આ કાર્યવાહી એ ફરિયાદ બાદ કરવામાં આવી છે જેમાં બીએસએફે રેલવે પર 'ગંદા અને જર્જરિત' કોચવાળી ટ્રેન મોકલવાનો અને સૈનિકોની અવરજવરમાં 72 કલાક વિલંબ કરવાનો આરોપ લગાવ્યો હતો. બીએસએફે અગરતલા સ્ટેશન મેનેજરને ઔપચારિક ફરિયાદ પણ મોકલી હતી. તેમાં નોર્થઈસ્ટ ફ્રન્ટીયર રેલ્વે (NFR) દ્વારા ખાસ ટ્રેન પૂરી પાડવામાં 'અક્ષમ્ય વિલંબ'નો ઉલ્લેખ કરવામાં આવ્યો હતો.

અમરનાથ યાત્રા 2025 ની ફરજ માટે લગભગ 1200 બોર્ડર સિક્યુરિટી ફોર્સ (BSF) કર્મચારીઓ ગુવાહાટીથી કાશ્મીર જવાના હતા. આ માટે રેલવે પાસેથી એક ખાસ ટ્રેનની માંગ કરવામાં આવી હતી. બીએસએફએ બે એસી-2 કોચ, બે એસી-3 કોચ, 16 સ્લીપર કોચ અને 4 GS/SLR (જનરલ સ્લીપર / SSLR) કોચની માંગણી કરી હતી. જોકે, તેમને ઉપલબ્ધ કરાવવામાં આવેલી ટ્રેનની સ્થિતિ ખૂબ જ ખરાબ હતી.

 

સોશિયલ મીડિયા પર વાયરલ થયેલા વીડિયોમાં જોવા મળ્યું હતું કે ટ્રેનની બારીઓ તૂટેલી હતી. દરવાજા જામ હતા. શૌચાલય ખૂબ જ ગંદા હતા. સીટો ફાટેલી હતી (જેમાંથી લોખંડના સળિયા દેખાતા હતા). ઘણા કોચમાં કોઈ વિદ્યુત જોડાણ નહોતું. કેટલાક અહેવાલો અનુસાર, ટ્રેનમાં વંદો પણ ફરતા હતા.

જવાનોએ આવી જર્જરિત ટ્રેનમાં મુસાફરી કરવાનો ઇનકાર કર્યો હતો. BSF એ આ બાબત રેલ્વેના ઉચ્ચ અધિકારીઓના ધ્યાન પર લાવી હતી. BSF ની ફરિયાદ બાદ, રેલ્વેએ તાત્કાલિક કાર્યવાહી કરી અને ટ્રેન બદલી. હવે BSF જવાનો ત્રિપુરાના ઉદયપુરથી નવી ટ્રેન લઈને અમરનાથ યાત્રાની સુરક્ષા માટે રવાના થયા છે.