ગુજરાતમાં ગત વર્ષની સરખામણીએ હજુ પણ 155 મીમી વરસાદની ઘટ

સૌરાષ્ટ્ર બાદ દક્ષિણ અને મધ્ય ગુજરાતમાં મુશળધાર વરસાદ વરસી રહ્યો છે. જેના કારણે અનેક નદીઓમાં ઘોડાપૂર આવ્યા છે. તેમ છતાં ગત વર્ષની સરખામણીએ હજુ પણ 155 મીમી વરસાદની ઘટ છે.

ગત વર્ષે 26 જુલાઈ સુધીમાં 636 મીમી વરસાદની તુલાનામાં આ વર્ષે 480 મીમી વરસાદ વરસ્યો છે. ટકાવારીની વાત કરીએ ગત વર્ષની તુલનામાં હજુ પણ 18.11 ટકા વરસાદની ઘટ છે. ગત વર્ષના 72.57 ટકા વરસાદની તુલનામાં આ વર્ષે 54.46 ટકા વરસાદ વરસ્યો છે. 

ગુજરાતમાં હાલ ચોમાસુ બરાબરનું જામ્યુ છે. સૌરાષ્ટ્રમાં ભારે તારાજી સર્જ્યા બાદ છેલ્લાં પાંચ દિવસથી દક્ષિણ અને મધ્ય ગુજરાતમાં મુશળધાર વરસાદના પગલે નુકસાનીના અહેવાલ છે.

જ્યારે ઉત્તર ગુજરાતમાં પણ વાદળછાયુ વાતાવરણ થતાં ખેડૂતોમાં સારા વરસાદની આશા બંધાઈ છે. ગુજરાતમાં ઝોન મુજબ વરસાદની વાત કરીએ તો અત્યાર સુધીમાં કચ્છમાં 366 મીમી(75 ટકા), ઉત્તર ગુજરાતમાં 215 મીમી(29.55 ટકા), મધ્ય ગુજરાતમાં 269 મીમી(33.29 ટકા), સૌરાષ્ટ્રમાં 542 મીમી(73.57 ટકા) અને દક્ષિણ ગુજરાતમાં 985 મીમી(54.46 ટકા) વરસાદ વરસ્યો છે.

સમગ્ર રાજ્યની વાત કરીએ તો સરેરાશ 480 મીમી એટલે કે 54.46 ટકા વરસાદ પડી ચૂક્યો છે. તેમ છતા ગત વર્ષની સરખામણીએ હજુ પણ 155 મીમી એટલે કે 18.11 ટકા વરસાદની ઘટ છે.

ગત વર્ષે 636 મીમી એટલે કે 72.57 ટકા વરસાદ વરસ્યો હતો. જ્યારે વર્ષ 2022માં 26 જુલાઈ સુધીમાં 576 મીમી એટલે કે 67.84 ટકા વરસાદ વરસ્યો હતો. છેલ્લાં 3 વર્ષની તુલનામાં આ વર્ષે ઓછો વરસાદ નોંધાયો છે. ઉત્તર ગુજરાત ઝોનમાં ગત વર્ષની સરખામણીએ હજુ પણ 32 ટકા વરસાદની ઘટ છે. 

10 વર્ષમાં 26 જુલાઈ સુધીમાં સરેરાશ 48 ટકા વરસાદ નોંધાયો :

ગુજરાતમાં છેલ્લાં 10 વર્ષ દરમિયાન 26 જુલાઈ સુધીમાં પડેલા વરસાદના આંકડા જોઈએ તો સરેરાશ 48 ટકા વરસાદ વરસ્યો છે.

2015માં 270 મીમી(33.94 ટકા), 2016માં 211 મીમી(26.52 ટકા), 2017માં 555 મીમી(68.52 ટકા), 2018માં 449 મીમી(54.10 ટકા), 2019માં 250 મીમી(30.74 ટકા), 2020માં 329 મીમી(39.66 ટકા), 2021માં 273 મીમી(32.58 ટકા), 2022માં 576 મીમી(67.84 ટકા), 2023માં 636 મીમી(72.57 ટકા) અને 2024માં 480 મીમી(54.46 ટકા) વરસાદ વરસ્યો છે.