ગુજરાતમાં ‘દાના’ની આફત!: ત્રણ દિવસમાં બંગાળની ખાડીમાં વાવાઝોડું સર્જાવાની ભીતિ

ભારતીય હવામાન વિભાગ દ્વારા બંગાળની ખાડીમાં વાવાઝોડું સક્રિય થઈ શકે છે એવી આગાહી વ્યક્ત કરવામાં આવી છે. એક તરફ અરબસાગરની લો પ્રેશર સિસ્ટમને કારણે ચોમાસાની વિદાય બાદ પણ ગુજરાતના કેટલાક ભાગોમાં ભારે વરસાદ વરસી રહ્યો છે ત્યાં આગામી ત્રણ દિવસમાં બંગાળની ખાડીમાં વાવાઝોડું સર્જાઇને ઓરિસ્સા અને પશ્ચિમ બંગાળના દરિયાકાંઠાના ભાગોમાં ટકરાય એવી શક્યતાઓ છે. અત્રે ઉલ્લેખનીય છે કે, આ સિસ્ટમ પશ્ચિમ અને ઉત્તર-પશ્ચિમ દિશા તરફ ગતિ કરી રહ્યું છે. જેને કારણે ગુજરાતના કેટલાક ભાગોમાં તેની હળવી અસર વર્તાઈ શકે છે.

પૂર્વ મધ્ય બંગાળની ખાડીમાં અંદમાન નિકોબાર પાસે એક લો પ્રેશર સિસ્ટમ સક્રિય છે. જે 22 ઓક્ટોબર, 2024ની સવારે ડિપ્રેશનમાં પરિવર્તિત થાય એવી સંપૂર્ણ શક્યતાઓ છે. ત્યારબાદ તે વધુ ને વધુ સક્રિય થઈને પશ્ચિમ અને ઉત્તર-પશ્ચિમ દિશા તરફ આગળ વધતા 24 તારીખ સુધીમાં સાયક્લોનિક સ્ટોર્મના સ્વરૂપે સક્રિય થઈ શકે છે એટલે કે આ ડિપ્રેશન 24 ઓક્ટોબરના રોજ વાવાઝોડામાં પરિવર્તિત થઈને ઓરિસ્સા અને પશ્ચિમ બંગાળના દરિયાકાંઠા તરફ આગળ વધશે. આ વાવાઝોડાને કતર દેશ તરફથી 'દાના' નામ આપવામાં આવ્યું છે, જેનો અરેબિક ભાષામાં અર્થ ઉદારતા થાય છે. આ વાવાઝોડું 25 ઓક્ટોબર, 2024ના રોજ ઓરિસ્સામાં પ્રવેશ કરીને તારાજી સર્જી શકે છે તથા ઓરિસ્સાની આસપાસના રાજ્યમાં પણ તેની અસર વર્તાશે. અત્રે ઉલ્લેખનીય છે કે, ગુજરાત દેશના પશ્ચિમ છેડે આવેલું છે તેથી, રાજ્યમાં દાના વાવાઝોડાની અસરો ખૂબ જ ઓછા પ્રમાણમાં થાય એવી શક્યતાઓ છે.

મહત્ત્વનું છે કે, ‘દાના’ વાવાઝોડા પહેલા બંગાળની ખાડીમાંથી જ એક સિસ્ટમ સંપૂર્ણ દેશને પાર કરીને ગુજરાત તરફ આવ્યું હતું. પૂર્વથી પશ્ચિમ સુધી આવીને આસના વાવાઝોડા એ ગુજરાતમાં અત્યંત ભારે વરસાદ વરસાવીને તારાજી સર્જી હતી પરંતુ, દાના વાવાઝોડું પૂર્વ મધ્ય બંગાળની ખાડીમાં સક્રિય થયા બાદ તે પશ્ચિમ અને ઉત્તર પશ્ચિમ દિશા તરફ ગતિ કરીને ઓરિસ્સા અને પશ્ચિમ બંગાળના દરિયાકાંઠાના વિસ્તારોમાં ટકરાશે, જેને કારણે આગામી 22થી 25 ઓક્ટોબર દરમિયાન ઓરિસ્સા, પશ્ચિમ બંગાળ, ઝારખંડ સહિતના રાજ્યમાં વરસાદી માહોલ રહેશે તથા ભારતીય હવામાન વિભાગની આગાહી મુજબ જ્યારે વાવાઝોડું જમીનથી નજીક આવશે ત્યારે 100થી 110 કિલોમીટર પ્રતિ કલાકની ઝડપે પવન પણ ફૂંકાશે.

હવામાન વિભાગ દ્વારા આગામી દિવસોમાં ‘દાના’ વાવાઝોડાની ગુજરાત પર કેટલા પ્રમાણમાં અસર વર્તાશે? તેની ચોક્કસ માહિતી જાહેર કરવામાં આવી નથી પરંતુ, જો આ વાવાઝોડું જમીન પર પહોંચ્યા બાદ પણ સક્રિય રહેશે તો ગુજરાતના દક્ષિણ ભાગમાં અને પૂર્વ ભાગના જિલ્લાઓમાં એટલે કે મધ્યપ્રદેશ તરફના જિલ્લાઓમાં તેની થોડા અંશે અસર રહી શકે છે.