સની, યશ અને ઇમરાન હાશ્મી વચ્ચે ત્રિપાંખીયો જંગ

Box Office Clash: 'KGF' ફેમ કન્નડ સુપરસ્ટાર યશની આગામી મોસ્ટ અવેટેડ ફિલ્મ "ટોક્સિક" ને લઈને છેલ્લા ઘણા સમયથી ચાલી રહેલી અનિશ્ચિતતાઓ હવે એક અત્યંત રસપ્રદ વળાંક પર પહોંચી ગઈ છે. ફિલ્મ ક્યારે રિલીઝ થશે તે અંગે ચાહકોમાં ચાલી રહેલી મૂંઝવણ વચ્ચે હવે મોટા સમાચાર સામે આવ્યા છે. અહેવાલો મુજબ, નિર્માતાઓ હવે આ ફિલ્મને ભારતીય બોક્સ ઓફિસ પર એક એવા ખાસ અવસરે રિલીઝ કરવાની યોજના બનાવી રહ્યા છે, જે હિન્દી સિનેમા જગતમાં અત્યાર સુધીની સૌથી મોટી ટક્કર લાવી શકે છે. 'ટોક્સિક' ના મેકર્સ હવે વર્ષ 2026 ના સ્વાતંત્ર્ય દિન (15 ઓગસ્ટ) ના લોન્ગ વીકેન્ડ પર નજર રાખી રહ્યા છે. રસપ્રદ વાત એ છે કે આ વીકેન્ડ પર બોલિવૂડની બે મોટી ફિલ્મો પહેલાથી જ બુક થઈ ચૂકી છે, જેથી પાન-ઇન્ડિયા સ્તરે રિલીઝ થનારી યશની ફિલ્મ બોક્સ ઓફિસ પર મોટો ધમાકો કરે તે નિશ્ચિત માનવામાં આવે છે.

આંતરરાષ્ટ્રીય બજાર અને વૈશ્વિક મહત્વાકાંક્ષાઓના કારણે ફિલ્મ પાછી ઠેલાઈ
અગાઉ 'ટોક્સિક' ની રિલીઝ ડેટ 19 માર્ચ નક્કી કરવામાં આવી હતી, પરંતુ તે જ સમયે બોક્સ ઓફિસ પર અન્ય એક મોટી ફિલ્મ 'ધુરંધર 2' પણ રિલીઝ થઈ હતી. આ ઉપરાંત મધ્ય પૂર્વ (મિડલ ઈસ્ટ) માં અચાનક યુદ્ધની સ્થિતિ વધુ વણસી ગઈ હતી. 'ટોક્સિક' જેવા અતિ વિશાળ બજેટના પ્રોજેક્ટ માટે ઓવરસીઝ એટલે કે વૈશ્વિક બજારમાંથી આવક મેળવવી ખૂબ જ મહત્વપૂર્ણ હોવાથી નિર્માતાઓએ જોખમ ન લેતા ફિલ્મને મુલતવી રાખીને 4 જૂન પર શેડ્યૂલ કરી હતી. જોકે, એપ્રિલ મહિનાના અંતમાં સુપરસ્ટાર યશે પોતે ચાહકોને એક વિશેષ નોંધ લખીને જણાવ્યું હતું કે, તે 'ટોક્સિક' ને માત્ર એક પ્રાદેશિક કે રાષ્ટ્રીય ફિલ્મ નહીં પરંતુ વૈશ્વિક સ્તરની બ્લોકબસ્ટર બનાવવા માંગે છે. આંતરરાષ્ટ્રીય બજારોમાં ફિલ્મને એકસાથે મોટા પાયે રિલીઝ કરવા માટે થોડો વધુ સમયની જરૂર હોવાથી 4 જૂનની તારીખ પણ રદ કરવામાં આવી હતી. હવે ફિલ્મફેરના તાજા અહેવાલમાં ખુલાસો થયો છે કે નિર્માતાઓ તમામ તૈયારીઓ સાથે ઓગસ્ટ 2026 ના સ્વાતંત્ર્ય દિનના સપ્તાહના અંતને ટાર્ગેટ કરી રહ્યા છે.

સની દેઓલ, યશ અને ઇમરાન હાશ્મી વચ્ચે ત્રિપાંખીયો જંગ
સ્વાતંત્ર્ય દિન 2026 ના વીકેન્ડ પર યશની એન્ટ્રીથી હવે બોક્સ ઓફિસ પર યશ વિરુદ્ધ સની દેઓલ વિરુદ્ધ ઇમરાન હાશ્મીનો રોમાંચક માહોલ જોવા મળશે. સની દેઓલની ફિલ્મ 'બટવારા 1947' આ વીકેન્ડની સૌથી મોટી બોલિવૂડ ફિલ્મ માનવામાં આવે છે. ટ્રેડ એનાલિસ્ટ્સના મતે, આ ફિલ્મ 13 ઓગસ્ટના રોજ રિલીઝ થઈ શકે છે જેથી રાષ્ટ્રીય રજાના સપ્તાહનો પૂરેપૂરો લાભ મળી શકે. 'ગદર 2', 'જાટ' અને 'બોર્ડર 2' જેવી ઐતિહાસિક સક્સેસ મેળવી ચૂકેલા સની દેઓલ હાલ કરિયરના સર્વશ્રેષ્ઠ ફોર્મમાં છે. આ ફિલ્મના પ્રોડ્યુસર આમિર ખાન છે અને તેઓ ફિલ્મમાં ખાસ કેમિયો પણ કરવાના છે. જ્યારે તેનું નિર્દેશન રાજકુમાર સંતોષી કરી રહ્યા છે, જેમણે અગાઉ સની સાથે 'ઘાયલ', 'ઘાતક' અને 'દામિની' જેવી કલ્ટ ક્લાસિક ફિલ્મો આપી છે. સની દેઓલની ફિલ્મની જાહેરાત બાદ તરત જ ઇમરાન હાશ્મીની મોસ્ટ અવેટેડ સિક્વલ 'આવારાપાન 2' ની રિલીઝ ડેટ પણ 14 ઓગસ્ટ જાહેર કરી દેવામાં આવી છે. આ એક એવી સિક્વલ છે જેની સિનેમાપ્રેમીઓ વર્ષોથી રાહ જોઈ રહ્યા હતા, તેથી આ ફિલ્મ પણ બોક્સ ઓફિસ પર જોરદાર પ્રદર્શન કરવા સક્ષમ છે.

'KGF' ના ક્રેઝ પછી યશની અગ્નિપરીક્ષા
'KGF' ચેપ્ટર 2 ની અભૂતપૂર્વ સફળતાએ કન્નડ અભિનેતા યશને હિન્દી બેલ્ટ સહિત સમગ્ર દેશમાં એક ટોચનો સુપરસ્ટાર બનાવી દીધો છે. તે પોતાની છેલ્લી બ્લોકબસ્ટર ફિલ્મના લગભગ ચાર વર્ષ બાદ સિલ્વર સ્ક્રીન પર પરત ફરી રહ્યો છે. જોકે, વારંવાર ફિલ્મ પાછી ઠેલાવાને કારણે ચાહકોમાં બઝ થોડો પ્રભાવિત થયો હતો, પરંતુ 'ટોક્સિક' નું કન્ટેન્ટ અને યશનો માસ અપીલ હિન્દી ઓડિયન્સમાં અત્યંત મજબૂત છે. આ સંજોગોમાં, જો 'ટોક્સિક' સ્વાતંત્ર્ય દિને સિનેમાઘરોમાં ટકરાશે, તો તે સની દેઓલની 'બટવારા 1947' અને ઇમરાન હાશ્મીની 'આવારાપાન 2' બંનેના બિઝનેસ માટે મોટો પડકાર અને જોખમ ઊભું કરશે તેમાં કોઈ શંકા નથી.