અલ્લૂઅર્જુનની આગામી ફિલ્મ શક્તિમાન હોવા પર અટકળ

અલ્લુ અર્જુને તાજેતરમાં મલયાલમ દિગ્દર્શક જોસેફ બેસલી સાથે એક ફિલ્મ સાઇન કરી છે, અને એવી ચર્ચા છે કે તે આ ફિલ્મમાં શક્તિમાનના આઇકોનિક રોલમાં જોવા મળશે.

અગાઉ આ ભૂમિકા માટે રણવીર સિંહનું નામ ચર્ચામાં હતું, પરંતુ મુકેશ ખન્નાને લાગ્યું કે રણવીર આ રોલ માટે યોગ્ય નથી અને તેમણે અલ્લુ અર્જુનનું નામ સૂચવ્યું.

જોકે, અલ્લુ અર્જુન શક્તિમાનનો રોલ કરવાનો છે તેની સત્તાવાર પુષ્ટિ થઈ નથી. અભિનેતા એક સુપરહીરો ફિલ્મની તૈયારી કરી રહ્યો હોવાથી આ અટકળો વહેતી થઈ છે. બીજી એક શક્યતા એવી પણ છે કે અલ્લુ અર્જુન શક્તિમાન નહીં, પરંતુ કોઈ અન્ય સુપરહીરોની ભૂમિકાની તૈયારી કરી રહ્યો છે.

અલ્લુ અર્જુન શક્તિમાનનો રોલ કરશે કે કેમ તે તો સમય જ કહેશે, પરંતુ આ સમાચારે તેના ચાહકોમાં ઉત્સાહ જગાવ્યો છે. ચાહકો માને છે કે અલ્લુ અર્જુન જ આ પાત્રને સંપૂર્ણ ન્યાય આપી શકે છે. ઉલ્લેખનીય છે કે, અલ્લુ અર્જુન ઘણા સમયથી સુપરહીરોના પાત્રને લઈને ચર્ચામાં છે, અને અગાઉ એવી પણ વાતો હતી કે તેની સુપરહીરો ફિલ્મનું નિર્માણ સોની પિક્ચર્સ કરવા જઈ રહ્યું છે.