સિંગર બાદશાહની ધરપકડના આદેશ, પાસપોર્ટ જપ્ત થશે

હરિયાણા મહિલા આયોગે ‘ટટીરી’ સોંગમાં વપરાયેલા વાંધાજનક શબ્દો અને છોકરીઓના ફિલ્માંકન મામલે સિંગર બાદશાહને સમન્સ જારી કર્યું હતું. જોકે, શુક્રવારે બાદશાહ વ્યક્તિગત રીતે હાજર થયા નહોતા. તેમના વકીલોએ વ્યાવસાયિક વ્યસ્તતાનું કારણ આપી વધારાનો સમય માંગ્યો હતો, પરંતુ આયોગના અધ્યક્ષ રેણુ ભાટિયાએ આ દલીલ ફગાવી દીધી હતી.

કડક કાર્યવાહીના આદેશો : 

મહિલા આયોગના અધ્યક્ષે સ્પષ્ટ કર્યું છે કે મહિલાઓ અને દીકરીઓના સન્માન સાથે સમાધાન કરવામાં આવશે નહીં. તેમણે પાણીપત અને પંચકુલાના એસપીને નિર્દેશ આપ્યા છે કે બાદશાહની તાત્કાલિક ધરપકડ કરવામાં આવે અને તેઓ દેશ છોડીને ભાગી ન શકે તે માટે તેમનો પાસપોર્ટ જપ્ત કરવામાં આવે. અગાઉ બાદશાહે સુરક્ષાના કારણોસર વીડિયો કોન્ફરન્સિંગ દ્વારા પક્ષ રજૂ કરવાની પરવાનગી માંગી હતી, જે આયોગે નકારી કાઢી હતી.

શું છે સમગ્ર વિવાદ ?

1 માર્ચના રોજ રિલીઝ થયેલા ‘ટટીરી’ સોંગના રેપ વર્ઝનમાં કેટલાક વિવાદાસ્પદ શબ્દોનો પ્રયોગ થયો છે. ગીતમાં શાળાની વિદ્યાર્થિનીઓને દફતર ફેંકતી બતાવવા અને હરિયાણા રોડવેઝની બસોના ઉપયોગ સાથેના ફિલ્માંકનને લઈને સામાજિક સંગઠનોએ વાંધો ઉઠાવ્યો હતો. આ બાબતે પંચકુલામાં એફઆઈઆર પણ નોંધવામાં આવી છે, જેના પગલે યુટ્યુબ પરથી આ ગીત હટાવી દેવામાં આવ્યું છે. ઉલ્લેખનીય છે કે હટાવતા પહેલા આ ગીતને 40 મિલિયનથી વધુ લોકો જોઈ ચૂક્યા હતા.

કેસની મહત્વની ઘટનાઓ : 

1 માર્ચ: ‘ટટીરી’ સોંગનું રેપ વર્ઝન રિલીઝ થયું

4 માર્ચ: વિવાદાસ્પદ શબ્દો અને દ્રશ્યો સામે વિરોધ શરૂ થયો

6 માર્ચ: પંચકુલામાં એફઆઈઆર નોંધાઈ અને બાદશાહને સમન્સ જારી કરાયું

7 માર્ચ: પોલીસ કાર્યવાહી બાદ યુટ્યુબ પરથી સોંગ હટાવી દેવાયું

13 માર્ચ: બાદશાહ હાજર ન રહેતા આયોગે ધરપકડનો આદેશ આપ્યો

વિવાદ વધતા બાદશાહે એક વીડિયો સંદેશ દ્વારા માફી પણ માંગી હતી. તેમણે જણાવ્યું હતું કે તેઓ પોતે હરિયાણાના વતની છે અને જો કોઈની લાગણી દુભાઈ હોય તો તેઓ ક્ષમાપ્રાર્થી છે. જોકે, મહિલા આયોગે હવે આ મામલાને ગંભીરતાથી લઈને કાયદાકીય પ્રક્રિયા તેજ કરી છે.