એક જ પરિવાર, ચાર સભ્યો અને ચાર અલગ ઘર!

Shraddha Kapoor Family Living Separately: બોલિવૂડની જાણીતી અભિનેત્રી શ્રદ્ધા કપૂર હાલમાં તેની આગામી બાયોપિક ફિલ્મ ‘ઈથા’ ને લઈને ચર્ચામાં છે. મરાઠી લોક કલાકાર વિઠાબાઈ નારાયણગાંવકરના જીવન પર આધારિત આ ફિલ્મનું ટીઝર તાજેતરમાં ‘કોકટેલ 2’ ની સાથે રિલીઝ કરવામાં આવ્યું હતું, જેણે સોશિયલ મીડિયા પર ધૂમ મચાવી દીધી છે. ફિલ્મ નિર્માણના અંતિમ તબક્કામાં છે અને આ વર્ષે ઓગસ્ટમાં રિલીઝ થવાની તૈયારીમાં છે. જોકે, શ્રદ્ધા કપૂર માત્ર પોતાની પ્રોફેશનલ લાઈફ જ નહીં, પણ અંગત જીવન અને પરિવારને લઈને પણ અચાનક લાઈમલાઈટમાં આવી ગઈ છે. અહેવાલો અનુસાર, કપૂર પરિવારના ચારેય સભ્યો હવે એકબીજાથી અલગ, જુદા-જુદા ઘરોમાં પોતાનું જીવન વિતાવી રહ્યા છે. આ સમાચાર સામે આવતા જ ચાહકોમાં આશ્ચર્ય અને ચિંતાનો માહોલ જોવા મળી રહ્યો છે.

'સ્ત્રી 2' ની સફળતા પછી હૃતિક રોશનનું આલીશાન ઘર લીધું ભાડે
અહેવાલો અનુસાર, શ્રદ્ધા કપૂર હાલમાં જુહુના એક હાઈ-પ્રોફાઈલ વિસ્તારમાં આવેલા સી-ફેસિંગ આલીશાન એપાર્ટમેન્ટમાં એકલી રહે છે. આ એ જ ઘર છે જે તેણે પોતાની બ્લોકબસ્ટર ફિલ્મ ‘સ્ત્રી 2’ ની ઐતિહાસિક સફળતા પછી સુપરસ્ટાર હૃતિક રોશન પાસેથી ભાડે લીધું હતું. આ હાઈ-પ્રોફાઈલ સોસાયટીમાં અક્ષય કુમાર અને સાજિદ નડિયાદવાલા જેવા દિગ્ગજ બોલિવૂડ સ્ટાર્સ પણ રહે છે. શ્રદ્ધાના આ નવા આલીશાન ઘરમાં તેનો કથિત બોયફ્રેન્ડ અને જાણીતો લેખક રાહુલ મોદી વારંવાર મુલાકાત લેતો જોવા મળે છે. શ્રદ્ધાને આ ઘરને પોતાની પસંદગી મુજબ સજાવવામાં મહિનાઓનો સમય લાગ્યો હતો, કારણ કે ફિટનેસ ફ્રીક હૃતિક રોશને આ ઘરમાં દિવાલો તોડીને જિમ માટે સ્પેશિયલ જગ્યા બનાવી હતી, જ્યારે શ્રદ્ધાનો ટેસ્ટ તેનાથી તદ્દન અલગ હતો.

2020 પછી કપૂર પરિવારની દુનિયા કેવી રીતે બદલાઈ ગઈ?
એક સમય એવો હતો જ્યારે બોલિવૂડના પોપ્યુલર વિલન અને કોમેડી કિંગ શક્તિ કપૂરનો આખો પરિવાર - પત્ની શિવાંગી કપૂર, પુત્રી શ્રદ્ધા કપૂર અને પુત્ર સિદ્ધાંત કપૂર - જુહુના એક જ લક્ઝુરિયસ એપાર્ટમેન્ટમાં સાથે રહેતા હતા. વર્ષ 2020 સુધી બધું બરાબર ચાલતું હતું, પરંતુ COVID-19 મહામારી પછી પરિસ્થિતિ સંપૂર્ણપણે બદલાઈ ગઈ. લોકડાઉન અને રોગચાળાના ગાળા બાદ પરિવારના સભ્યોએ પોતાની સ્વતંત્રતા અને સ્પેસને મહત્વ આપવાનું શરૂ કર્યું.

હાલમાં શક્તિ કપૂર મુંબઈના ઉપનગરીય વિસ્તારમાં આવેલા એક અલગ ફ્લેટમાં રહે છે. જ્યારે શ્રદ્ધાની માતા શિવાંગી કપૂરે ગોવામાં એક સુંદર અને મોટું એપાર્ટમેન્ટ ખરીદ્યું છે. કોવિડ પછી તે પોતાનો મોટાભાગનો સમય ગોવાના આ ઘરમાં વિતાવે છે, જ્યાં તેની બહેનો પદ્મિની કોલ્હાપુરે અને તેજસ્વિની કોલ્હાપુરે પણ વારંવાર ગેટ-ટુગેધર માટે આવે છે. બીજી તરફ, શ્રદ્ધાનો મોટો ભાઈ સિદ્ધાંત કપૂર પણ ગોવામાં દરિયા કિનારે આવેલા એક રો-હાઉસ શૈલીના ઘરમાં રહે છે. જ્યારે તેનું શૂટિંગ ન હોય ત્યારે તે ગોવામાં જ રમતગમત અને પ્રકૃતિનો આનંદ માણે છે.

શું કપૂર પરિવારમાં બધું બરાબર છે?
એક જ પરિવારના ચાર સભ્યો અલગ-અલગ ઘરોમાં રહેતા હોવાના અહેવાલો સોશિયલ મીડિયા પર વાયરલ થતાં જ ફેન્સમાં એવી ચર્ચા શરૂ થઈ ગઈ હતી કે શું પરિવારમાં કોઈ અણબનાવ કે વિવાદ થયો છે? જોકે, આંતરિક સૂત્રોના જણાવ્યા અનુસાર, પરિવારમાં કોઈ ઝઘડો નથી. દરેક સભ્યો હવે ઉંમરના એવા તબક્કે છે જ્યાં તેઓ પોતાની સ્વાયત્તતા અને પ્રાઈવસીને પસંદ કરે છે. આ એક વ્યવહારિક અને શાંતિપૂર્ણ અરેન્જમેન્ટ છે, જેમાં દરેક વ્યક્તિ પોતાની લાઈફસ્ટાઈલ માણી રહી છે. શ્રદ્ધાના ઘરે તેના માતા-પિતા અને ભાઈ અવારનવાર મુલાકાત લેતા રહે છે.

મધ્ય મુંબઈમાં નવું ઘર: માતા-પિતા માટે સ્પેસ અનામત રહેશે
ભલે અત્યારે આખો પરિવાર અલગ રહેતો હોય, પરંતુ ભવિષ્યમાં તેઓ ફરી નજીક આવે તેવી પૂરેપૂરી શક્યતા છે. શ્રદ્ધા કપૂર અને તેના પિતા શક્તિ કપૂરે તાજેતરમાં જ જાન્યુઆરી મહિનામાં દક્ષિણ મુંબઈના પોશ વિસ્તાર ગણાતા મહાલક્ષ્મી રેસકોર્સની બરાબર સામે એક આલીશાન એપાર્ટમેન્ટ સંયુક્ત રીતે ખરીદ્યું છે. આ નવા ઘરના ઈન્ટિરિયર ડિઝાઇનિંગનું કામ શ્રદ્ધાની માતા શિવાંગી કપૂર પોતે સંભાળી રહ્યા છે. શિવાંગી કપૂર પોતાની ઉત્કૃષ્ટ સૌંદર્યલક્ષી સમજથી દીકરી માટે એક સુંદર આશિયાનું તૈયાર કરી રહ્યા છે. આ ઘર તૈયાર થયા પછી શ્રદ્ધા પાસે મધ્ય મુંબઈમાં પોતાનું કાયમી ઘર હશે, જેમાં એક ખાસ હિસ્સો હંમેશા તેના માતા-પિતા માટે અનામત રાખવામાં આવશે. જોકે, તેનો ભાઈ સિદ્ધાંત ગોવાના લાઈફસ્ટાઈલથી ખુશ હોવાથી તે ત્યાં જ રહેવાનું ચાલુ રાખશે.