સલમાનની 'ગલવાન'નું નામ બદલાયુ; નવું પોસ્ટર રિલીઝ

બોલિવૂડના સુલતાન સલમાન ખાને પોતાની આગામી વોર-ડ્રામા ફિલ્મ 'બેટલ ઓફ ગલવાન' ના ટાઇટલમાં મોટો ફેરફાર કરીને ચાહકોને ચોંકાવી દીધા છે. સોમવારે ઇન્સ્ટાગ્રામ પર એક પોસ્ટ શેર કરતા સલમાને સ્પષ્ટ કર્યું કે હવે આ ફિલ્મ 'માતૃભૂમિ' (Maatrubhumi) તરીકે ઓળખાશે. આ ફેરફાર પાછળનો મુખ્ય હેતુ વિશ્વભરમાં વધી રહેલા સંઘર્ષો વચ્ચે શાંતિનો સંદેશ ફેલાવવાનો હોવાનું મનાય છે.

શું છે નવા પોસ્ટરમાં?

સલમાને શેર કરેલા નવા પોસ્ટરમાં તે એક લડાયક સૈનિકના અવતારમાં જોવા મળે છે. તેના ચહેરા પર સંઘર્ષની પીડા અને આંખોમાં માતૃભૂમિ માટે રક્ષણની ભાવના સ્પષ્ટ દેખાય છે. પોસ્ટરમાં સલમાન એક દુશ્મનના હથિયારને રોકતો જોવા મળે છે. આ ફિલ્મ વર્ષ ૨૦૨૦ માં લદ્દાખની ગલવાન વેલીમાં ભારતીય અને ચીની સૈનિકો વચ્ચે થયેલી હિંસક અથડામણ પર આધારિત છે, જ્યાં હથિયારો વિના પથ્થરો અને લાકડીઓથી જંગ ખેલાયો હતો.

          View this post on Instagram                      

A post shared by Salman Khan (@beingsalmankhan)

હિમેશ રેશમિયાનું સંગીત

રસપ્રદ વાત એ છે કે ફિલ્મનું પ્રથમ ગીત 'માતૃભૂમિ' જે અગાઉ રિલીઝ કરવામાં આવ્યું હતું, તે જ હવે ફિલ્મનું સત્તાવાર ટાઇટલ બની ગયું છે. આ દેશભક્તિના ગીતને હિમેશ રેશમિયાએ કમ્પોઝ કર્યું છે. ફિલ્મના ડાયરેક્ટર અપૂર્વ લાખિયા છે, જેઓ એક્શન અને રિયલ-લાઇફ સ્ટોરીઝ માટે જાણીતા છે. ફિલ્મમાં સલમાનની સાથે ચિત્રાંગદા સિંહ પણ મહત્વની ભૂમિકામાં જોવા મળશે.

શાંતિ માટે ટાઇટલમાં ફેરફાર

રિપોર્ટ્સ અનુસાર, રશિયા-યુક્રેન અને મધ્ય પૂર્વમાં ચાલી રહેલા તણાવને ધ્યાનમાં રાખીને મેકર્સે નક્કી કર્યું કે યુદ્ધના મહિમા કરતા 'શાંતિ' અને 'માતૃભૂમિ' પ્રત્યેનો પ્રેમ વધુ અગત્યનો છે. તેથી જ સલમાને કેપ્શનમાં લખ્યું છે, "May War Rest In Peace" (યુદ્ધ હવે શાંત થાય). આ ફિલ્મ ૨૦૨૬ ના મધ્યમાં રિલીઝ થવાની શક્યતા છે. લદ્દાખના દુર્ગમ વિસ્તારોમાં ફિલ્મના ઘણા મહત્વના દ્રશ્યો શૂટ કરવામાં આવ્યા છે.