Saif Ali Khan Threat : બોલિવૂડ અભિનેતા સૈફ અલી ખાનને કથિત જાનથી મારી નાખવાની ધમકી મળ્યા બાદ ફિલ્મ ઇન્ડસ્ટ્રીમાં સેલિબ્રિટીઓની સુરક્ષાનો મુદ્દો ફરી ચર્ચામાં આવ્યો છે. ઓલ ઇન્ડિયન સિને વર્કર્સ એસોસિએશન (AICWA)એ મહારાષ્ટ્રના મુખ્યમંત્રી દેવેન્દ્ર ફડણવીસને પત્ર લખીને સૈફ અલી ખાન, અમિતાભ બચ્ચન, અભિષેક બચ્ચન અને તેમના પરિવારોની સુરક્ષા વધારવાની માંગ કરી છે. સંગઠને ફિલ્મી હસ્તીઓની સાથે ફિલ્મ નિર્માતાઓ, ટેકનિશિયનો અને શૂટિંગ સાથે સંકળાયેલા કર્મચારીઓની સુરક્ષા માટે પણ તાત્કાલિક પગલાં લેવાની અપીલ કરી છે.
સૈફ અલી ખાનને મળેલી ધમકીથી બોલિવૂડમાં ચિંતા
AICWAના પ્રમુખ સુરેશ શ્યામલાલ ગુપ્તા દ્વારા લખાયેલા પત્રમાં સૈફ અલી ખાનને મળેલી કથિત ધમકીનો ઉલ્લેખ કરવામાં આવ્યો છે. અહેવાલો અનુસાર, અભિનેતાને તેમના ફોન પર વોઈસ મેસેજ મળ્યો હતો, જેમાં ધમકી આપનાર વ્યક્તિએ તેમનું પણ બાબા સિદ્દીકી જેવું થઈ શકે તેવી ચેતવણી આપી હતી. મુંબઈ પોલીસ આ મામલે ધમકીની સત્યતા અને તેની ગંભીરતાની તપાસ કરી રહી છે. આ પહેલાં અમિતાભ બચ્ચન અને અભિષેક બચ્ચનને પણ ધમકીઓ મળ્યાના અહેવાલો સામે આવ્યા હતા. આવી ઘટનાઓને કારણે ફિલ્મ ઇન્ડસ્ટ્રીમાં સુરક્ષા વ્યવસ્થા અંગે ચિંતા વધી છે.
AICWAએ સરકાર સમક્ષ મૂકી 5 મોટી માંગણીઓ
મુખ્યમંત્રી દેવેન્દ્ર ફડણવીસને લખેલા પત્રમાં સંગઠને પાંચ મુખ્ય માંગણીઓ રજૂ કરી છે.
-
સેલિબ્રિટીઓની સુરક્ષા: સૈફ અલી ખાન, અમિતાભ બચ્ચન, અભિષેક બચ્ચન અને તેમના પરિવારજનોની સુરક્ષા વધારવામાં આવે.
-
ફિલ્મી હસ્તીઓને સુરક્ષા: મુંબઈમાં ફિલ્મ કલાકારો અને નિર્માતાઓ માટે સુરક્ષાની યોગ્ય વ્યવસ્થા કરવામાં આવે.
-
શૂટિંગ સ્થળોએ પોલીસ બંદોબસ્ત: ફિલ્મના સેટ, સ્ટુડિયો અને શૂટિંગ સ્થળોએ પૂરતા પોલીસ કર્મચારીઓ તૈનાત કરવામાં આવે.
-
ગેંગસ્ટરો સામે કાર્યવાહી: ધમકીઓ આપતા ગુનેગારો અને તેમના નેટવર્ક સામે કાયદા મુજબ કડક પગલાં લેવામાં આવે.
-
જાહેર કાર્યક્રમોમાં દેખરેખ: પ્રેસ કોન્ફરન્સ, ફિલ્મ પ્રમોશન અને સેલિબ્રિટીઓ હાજર હોય તેવા કાર્યક્રમોમાં સુરક્ષા મજબૂત કરવામાં આવે.
આ પત્રની નકલ મુંબઈ પોલીસ કમિશનર દેવેને ભારતીને પણ મોકલવામાં આવી હોવાનું જણાવાયું છે.
ફિલ્મ ઇન્ડસ્ટ્રીની રોજગારી પર અસરની ચિંતા
AICWAએ ફિલ્મ ઉદ્યોગ સાથે સંકળાયેલા લાખો કામદારોની રોજગારી અંગે પણ ચિંતા વ્યક્ત કરી છે. સંગઠનના જણાવ્યા અનુસાર, જો ધમકીઓ અને સુરક્ષાની સમસ્યાઓને કારણે શૂટિંગ અટકે, તો કલાકારોની સાથે ટેકનિશિયનો, કેમેરા કર્મચારીઓ, મેકઅપ આર્ટિસ્ટ અને અન્ય ક્રૂ મેમ્બર્સને પણ આર્થિક નુકસાન થઈ શકે છે. પત્રમાં અગાઉ જુહુ વિસ્તારમાં ટાઇગર શ્રોફ સાથે જોડાયેલી ગોળીબારની ઘટનાનો પણ ઉલ્લેખ કરવામાં આવ્યો છે.
હવે પોલીસ તપાસ પર નજર
AICWAએ માંગ કરી છે કે બોલિવૂડ સાથે જોડાયેલા લોકો મુંબઈમાં કોઈપણ ભય વિના ફરી શકે અને કામ કરી શકે તેવું સુરક્ષિત વાતાવરણ ઊભું કરવામાં આવે. સૈફ અલી ખાનને મળેલી કથિત ધમકીની તપાસ વચ્ચે હવે પોલીસ અને મહારાષ્ટ્ર સરકાર આ મામલે શું પગલાં લે છે તેના પર સૌની નજર છે.