રણવીર સિંહની ફિલ્મ 'ધુરંધર' વિવાદોના વમળમાં

બોલિવૂડ સુપરસ્ટાર રણવીર સિંહની લેટેસ્ટ ફિલ્મ 'ધુરંધર: ધ રીવેન્જ' બોક્સ ઓફિસ પર ધૂમ મચાવી રહી છે, પરંતુ તેની સફળતાની સાથે હવે કાયદાકીય વિવાદો પણ શરૂ થઈ ગયા છે. 19 માર્ચે સિનેમાઘરોમાં રિલીઝ થયેલી આ ફિલ્મે પ્રથમ દિવસે જ 100 કરોડ રૂપિયાનો આંકડો પાર કરીને ઈતિહાસ રચ્યો હતો. જોકે, રિલીઝના ચાર દિવસ બાદ જ ફિલ્મ સામે શીખ સમુદાયે મોરચો માંડ્યો છે.

મુંબઈના મુલુંડમાં ફરિયાદ દાખલ : 

ફિલ્મના અમુક દ્રશ્યો સામે વાંધો ઉઠાવતા શીખ સમુદાયે મુંબઈના મુલુંડ પોલીસ સ્ટેશનમાં ફિલ્મ નિર્માતા અને અભિનેતા રણવીર સિંહ વિરુદ્ધ સત્તાવાર ફરિયાદ નોંધાવી છે. મહારાષ્ટ્રમાં શીખ સંગઠનના પ્રમુખ અને શિવસેના નેતા ગુર્જ્યોત કીરે આ મામલે આગેવાની લીધી છે. તેમનો આરોપ છે કે ફિલ્મમાં દર્શાવવામાં આવેલા અમુક દ્રશ્યો શીખ ધર્મની મર્યાદાનું ઉલ્લંઘન કરે છે.

શા માટે થઈ રહ્યો છે વિરોધ ?

આ વિવાદના કેન્દ્રમાં રણવીર સિંહનો લૂક અને ફિલ્મના અંતિમ દ્રશ્યો છે. ફિલ્મમાં રણવીર સિંહ પંજાબના એક ગામના રહેવાસી જસકીરત સિંહ રંગીની ભૂમિકા ભજવી રહ્યો છે. શીખ સમુદાયના મતે:

ફિલ્મના અંતિમ દ્રશ્યોમાં રણવીર સિંહને પાઘડી, દાઢી અને હાથમાં કડા સાથે જે રીતે રજૂ કરવામાં આવ્યો છે, તે ધાર્મિક પરંપરાઓનું અપમાન કરે છે.

પ્રદર્શનકારીઓનું કહેવું છે કે આ ફિલ્મ દ્વારા શીખ ગુરુઓ અને સમુદાયની છબી ખરડવાનો પ્રયાસ થયો છે.

અગાઉ ફિલ્મ રિલીઝ થાય તે પહેલા પણ પાઘડીવાળા દેખાવ સામે વાંધો ઉઠાવવામાં આવ્યો હતો.

માફીની માંગ અને આંદોલનની ચીમકી : 

ફરિયાદમાં સ્પષ્ટપણે જણાવવામાં આવ્યું છે કે ફિલ્મનું પ્રોડક્શન હાઉસ આ ભૂલ બદલ વહેલી તકે જાહેર માફી માંગે. જો નિર્માતાઓ દ્વારા આ બાબતે યોગ્ય સ્પષ્ટતા કરવામાં નહીં આવે અથવા માફી માંગવામાં નહીં આવે, તો આગામી દિવસોમાં ફિલ્મ વિરુદ્ધ ઉગ્ર વિરોધ પ્રદર્શન કરવાની ચીમકી પણ આપવામાં આવી છે.

બોક્સ ઓફિસ પર અસરની શક્યતા : 

એકતરફ વિવેચકો ફિલ્મના વખાણ કરી રહ્યા છે અને કમાણીના નવા રેકોર્ડ બની રહ્યા છે, ત્યારે બીજી તરફ આ પ્રકારના વિવાદો ફિલ્મના બિઝનેસ પર કેવી અસર પાડે છે તે જોવું રહ્યું. હાલમાં પોલીસે ફરિયાદના આધારે તપાસ શરૂ કરી છે અને ફિલ્મમાં કયા દ્રશ્યો વાંધાજનક છે તેની કાયદાકીય સમીક્ષા કરવામાં આવી રહી છે.