કાંતારા વિવાદ: રણવીર સિંહ હાઈકોર્ટમાં માંગશે માફી

બોલિવૂડ અભિનેતા રણવીર સિંહ ફરી એકવાર ચર્ચામાં છે, પરંતુ આ વખતે કોઈ ફિલ્મ માટે નહીં પણ કાયદાકીય મામલાને કારણે. ફિલ્મ 'કાંતારા'ના આઇકોનિક દૈવા સીનની મજાક ઉડાવવાના આરોપમાં રણવીર સિંહ આગામી 10 એપ્રિલે કર્ણાટક હાઈકોર્ટમાં બિનશરતી માફી માંગતું સોગંદનામું દાખલ કરવા જઈ રહ્યો છે. કન્નડ સમુદાયની ધાર્મિક અને સાંસ્કૃતિક ભાવનાઓને ઠેસ પહોંચાડવા બદલ તેની સામે FIR નોંધવામાં આવી હતી.

મૈસુર જઈને વ્યક્તિગત માફી માંગવાની તૈયારી : 

કોર્ટની સુનાવણી દરમિયાન રણવીર સિંહના કાયદાકીય પ્રતિનિધિઓએ એક મહત્વનો પ્રસ્તાવ મૂક્યો છે. અભિનેતાએ સ્વેચ્છાએ જણાવ્યું છે કે તે પોતે મૈસુરના પ્રખ્યાત ચામુંડી મંદિરે જઈને વ્યક્તિગત રીતે માફી માંગવા તૈયાર છે. અગાઉ ફેબ્રુઆરી મહિનામાં હાઈકોર્ટે રણવીર વિરુદ્ધ તાત્કાલિક કડક કાર્યવાહી ન કરવાનો આદેશ આપીને થોડી રાહત આપી હતી, પરંતુ હવે મામલો પતાવવા માટે રણવીર લેખિત અને વ્યક્તિગત માફી તરફ આગળ વધી રહ્યો છે.

વિવાદનું મૂળ: ગોવા ફિલ્મ ફેસ્ટિવલની ઘટના 

આ સમગ્ર વિવાદની શરૂઆત નવેમ્બર 2025માં ગોવા ખાતે યોજાયેલા ઇન્ટરનેશનલ ફિલ્મ ફેસ્ટિવલ ઓફ ઇન્ડિયા (IFFI) દરમિયાન થઈ હતી. મંચ પર રણવીર સિંહે ફિલ્મ 'કાંતારા'ના મુખ્ય પાત્ર અને તેમાં દર્શાવવામાં આવેલી પરંપરાગત આસ્થાની મિમિક્રી કરી હતી. વીડિયોમાં જોઈ શકાય છે કે રણવીરે ફિલ્મના ડિરેક્ટર ઋષભ શેટ્ટીની હાજરીમાં જ તે ગંભીર દ્રશ્યની નકલ કરીને મજાક કરી હતી. જોકે ઋષભ શેટ્ટીએ તેને ઈશારાથી રોકવાનો પ્રયત્ન કર્યો હતો, તેમ છતાં રણવીરે મિમિક્રી ચાલુ રાખી હતી, જેનો વીડિયો સોશિયલ મીડિયા પર વાયરલ થતા કન્નડ સમુદાયમાં ભારે રોષ જોવા મળ્યો હતો.

સોશિયલ મીડિયા પરની માફી અપૂરતી ગણાઈ : 

રણવીર સિંહે અગાઉ ઇન્સ્ટાગ્રામ પર એક પોસ્ટ દ્વારા સ્પષ્ટતા કરી હતી કે તેનો ઈરાદો કોઈની આસ્થાને ઠેસ પહોંચાડવાનો નહોતો અને તે માત્ર ઋષભ શેટ્ટીના પર્ફોર્મન્સની પ્રશંસા કરવા માંગતો હતો. જોકે, ફરિયાદી પક્ષે આ માફીને માત્ર દેખાડો ગણાવી છે. એડવોકેટ પ્રશાંત મેથલની દલીલ છે કે ડિજિટલ પ્લેટફોર્મ પર માફી માંગવી અને કોર્ટમાં રૂબરૂ આવીને પસ્તાવો વ્યક્ત કરવો એ બંને અલગ બાબતો છે. કન્નડ સમુદાય માટે આ આસ્થાનો વિષય હોવાથી તેઓ કડક વલણ અપનાવી રહ્યા છે.

હવે સૌની નજર 10 એપ્રિલ પર છે, જ્યારે રણવીર સિંહ હાઈકોર્ટમાં પોતાનું સોગંદનામું રજૂ કરશે. આ ઘટના બોલિવૂડ કલાકારો માટે એક બોધપાઠ સમાન છે કે પ્રાદેશિક સંસ્કૃતિ અને આસ્થા સાથે જોડાયેલા વિષયો પર મજાક કરવી ભારે પડી શકે છે.