‘મૈયરમાં મનડું નથી લાગતું’ 25 વર્ષ બાદ ફરી રિલીઝ

સુપરહિટ ગુજરાતી ફિલ્મ 'મૈયરમાં મનડું નથી લાગતું' ફરી સિનેમાઘરોમાં રિલીઝ થશે, જાણો કઈ તારીખે

અમદાવાદ: ગુજરાતી સિનેમાની સુપરહિટ ફિલ્મ 'મૈયરમાં મનડું નથી લાગતું'ના ચાહકો માટે એક સારા સમાચાર સામે આવ્યા છે. અભિનેતા હિતેન કુમાર અને આનંદી ત્રિપાઠી અભિનીત આ ક્લાસિક ફિલ્મ તેના રિલીઝના 25 વર્ષ પછી ફરી એકવાર સિનેમાઘરોમાં રજૂ થવા જઈ રહી છે. આ ફિલ્મના ચાહકોને ફરી એકવાર રામ અને રતનની સુપરહિટ જોડીને મોટા પડદા પર જોવાની તક મળશે.

હિતેન કુમારે પોતાના ફેસબુક એકાઉન્ટ પર એક પોસ્ટ શેર કરીને આ અંગેની માહિતી આપી હતી. તેમણે જણાવ્યું હતું કે, "મૈયરમાં મનડું નથી લાગતું"ને રજૂ થયાને 25 વર્ષ વીતી ગયા હોવા છતાં, તે આજે પણ આપણા સૌના હૃદયમાં એટલી જ તાજી છે. આ સાથે તેમણે આનંદી ત્રિપાઠી સાથેની તસવીરો અને ફિલ્મના પોસ્ટર પણ શેર કર્યા હતા. આ ફિલ્મ 5 સપ્ટેમ્બરના રોજ સિનેમાઘરોમાં રિલીઝ થશે.

વર્ષ 2001માં રિલીઝ થયેલી આ ફિલ્મે તે સમયે જબરદસ્ત સફળતા મેળવી હતી. રામ અને રતનની જોડીએ પ્રેક્ષકોના દિલ જીતી લીધા હતા. ગુજરાતી ફિલ્મ ઇન્ડસ્ટ્રીના ઇતિહાસમાં આ પહેલી ફિલ્મ હતી જેની સિક્વલ બનાવવામાં આવી હતી. નોંધનીય છે કે, ફિલ્મમાં રતનનું પાત્ર ભજવનારી અભિનેત્રી આનંદી ત્રિપાઠી મૂળ ગુજરાતી નથી, તેમ છતાં તેમણે આ પાત્રને અદભુત રીતે ભજવીને લોકોના મનમાં સ્થાન બનાવ્યું હતું.

આ ફિલ્મનું ફરી રિલીઝ થવું ગુજરાતી સિનેમાના સુવર્ણકાળને યાદ કરાવશે અને નવી પેઢીને પણ આ સુપરહિટ ફિલ્મ જોવાનો અવસર આપશે.