પંજાબ અને હરિયાણા હાઈકોર્ટે પ્રખ્યાત રેપર અને સિંગર બાદશાહને મોટી રાહત આપી છે. 'ટટીરી' ગીતને લઈને ચાલી રહેલા વિવાદમાં હરિયાણા મહિલા આયોગ દ્વારા આપવામાં આવેલા ધરપકડના આદેશ પર હાઈકોર્ટે રોક લગાવી દીધી છે. જોકે, અદાલતે સ્પષ્ટ કર્યું છે કે બાદશાહે પોલીસ તપાસમાં સંપૂર્ણ સહયોગ આપવો પડશે અને જરૂર પડ્યે હાજર થવું પડશે.
કેવી રીતે શરૂ થયો વિવાદ ?
બાદશાહનું હરિયાણવી ફોક સ્ટાઈલનું રેપ સોંગ 'ટટીરી' 1 માર્ચના રોજ રિલીઝ થયું હતું. આ ગીત રિલીઝ થતાની સાથે જ તેના બોલ અને વીડિયોમાં દર્શાવવામાં આવેલા દ્રશ્યો સામે સામાજિક સંગઠનોએ મોરચો માંડ્યો હતો. વિવાદ વધતા પંચકુલા પોલીસે આ ગીતને યુટ્યુબ પરથી હટાવી દીધું હતું. અત્યાર સુધીમાં આ મામલે જીંદ અને પંચકુલામાં એફઆઈઆર પણ નોંધાઈ ચુકી છે.
ગીત સામેના મુખ્ય વાંધાઓ :&nbsp;
આ ગીત વિવાદોમાં આવવા પાછળ મુખ્ય ત્રણ કારણો જવાબદાર ગણવામાં આવી રહ્યા છે:
મહિલાઓનું અપમાન: હરિયાણા રાજ્ય મહિલા આયોગના જણાવ્યા અનુસાર, ગીતના શબ્દો અસભ્ય છે અને તે સ્ત્રીઓને માત્ર એક વસ્તુ તરીકે રજૂ કરે છે.
પરવાનગી વિના શૂટિંગ: ગીતના વીડિયોમાં જીંદ રોડવેઝની બસ અને સરકારી શાળાનો ઉપયોગ કરવામાં આવ્યો છે. આરોપ છે કે આ માટે શિક્ષણ વિભાગ કે પરિવહન વિભાગની કોઈ પૂર્વ મંજૂરી લેવામાં આવી ન હતી.
નકારાત્મક સંદેશ: વીડિયોમાં સ્કૂલ ડ્રેસ પહેરેલી વિદ્યાર્થિનીઓ બેગ ફેંકતી અને બસ ઉપર ઉભી રહીને ડાન્સ કરતી જોવા મળે છે, જે વિદ્યાર્થીઓ પર ખોટી અસર પાડી શકે છે તેમ સામાજિક સંગઠનોનું માનવું છે.
ધરપકડના આદેશથી હાઈકોર્ટ સુધીની સફર :&nbsp;
13 માર્ચે મહિલા આયોગે બાદશાહને પાણીપત ખાતે હાજર થવા સમન પાઠવ્યું હતું. બાદશાહ પોતે હાજર ન રહેતા અને માત્ર વકીલોને મોકલતા આયોગે આકરો નિર્ણય લીધો હતો. આયોગના અધ્યક્ષ રેણુ ભાટિયાએ પોલીસને બાદશાહની ધરપકડ કરવા અને તેમનો પાસપોર્ટ જપ્ત કરવા સૂચના આપી હતી. આ આદેશ સામે બાદશાહે હાઈકોર્ટના દ્વાર ખટખટાવ્યા હતા, જ્યાંથી તેમને કામચલાઉ રાહત મળી છે.
સિમરન જાગલાન અને બાદશાહનું જોડાણ :&nbsp;
આ ગીતમાં બાદશાહની સાથે 20 વર્ષીય સિમરન જાગલાને અવાજ આપ્યો છે. સિમરને આ લોકગીત ત્રણ વર્ષ પહેલા ગાયું હતું, જે બાદશાહને પસંદ આવતા તેમણે તેને નવા અંદાજમાં રેકોર્ડ કરાવ્યું હતું. ગીત હિટ પણ રહ્યું હતું અને યુટ્યુબ પર 40 મિલિયનથી વધુ વ્યૂઝ મેળવ્યા હતા, પરંતુ કાયદાકીય ગૂંચવણોને કારણે હવે તે ઓનલાઇન ઉપલબ્ધ નથી.&nbsp;

બાદશાહ ટટીરી સોંગ વિવાદ

ટટીરી સોંગ વિવાદમાં બાદશાહની ધરપકડ પર સ્ટે, પણ તપાસમાં સહયોગ આપવાની કોર્ટે મૂકી શરત

March 20, 2026 | 14:22 IST