ગોવિંદાની પત્ની સુનિતા આહૂજાએ બિગ બોસની ઓફર ઠુકરાવી, મને પૈસાની કોઈ કમી નથી

સુનિતા આહૂજાએ બિગ બોસમાં ભાગ લેવાની ઓફરનો ઇનકાર કર્યો છે. સુનિતા, જે જાણીતા ફિલ્મ અભિનેતા ગોવિંદાની પત્ની છે, તેણીએ જાહેરમાં જણાવ્યું છે કે, તેમને સલમાન ખાનના રિયાલિટી શો ‘બિગ બોસ’માંથી આમંત્રણ મળ્યું હતું, પરંતુ તેમણે આ તક સાફ નકારી દીધી.  

તેઓએ એક ઇન્ટરવ્યૂમાં કહ્યું કે, "હું એ શોમાં નથી જઈ રહી. ત્યાં જઈને બાથરૂમ કોણ સાફ કરશે? એ મારું કામ નથી. મને પૈસાની એટલી લાલચ નથી કે હું બિગ બોસ જઉં."  

તેઓએ વધુમાં ઉમેર્યું કે "મારા માટે ગૌરવ મહત્વપૂર્ણ છે અને મને ખબર છે કે, ત્યાં મારે કોઈ સાથે નહીં બને." તેઓએ સ્પષ્ટ કર્યું કે, જો કોઈ ડાન્સ અથવા ટોક શો હોય અને તેમને જજ કે હોસ્ટ તરીકે બોલાવવામાં આવે, તો તેઓ એવા પ્રોજેક્ટનો ભાગ બનશે.

સુનિતાએ કહ્યું કે "હું ગોવિંદાની પત્ની છું, મને કોઈની આગળ પડતી કરવાની જરૂર નથી. હું કોઈ શો માટે ક્યારેય સંપર્ક કરતી નથી. જો મારા નસીબમાં હશે તો તેઓ મને બોલાવશે."

સુનિતાએ વધુ ખુલાસો કર્યો કે, "ગોવિંદા સાથે લગ્ન કરતા પહેલાં પણ મને એક્ટિંગની ઓફર મળી હતી, પરંતુ મારી માતાએ મને ગોવિંદા સાથે ઘર વસાવવાની સલાહ આપી અને મેં અભિનયનો વિચાર ત્યજી દીધો."  

ગત દિવસોમાં સુનિતા અને ગોવિંદાની અલગાવની અટકળો ચાલી રહી હતી, જેને સુનિતાએ ખોટી ગણાવી હતી અને જણાવ્યું હતું કે "હું ગોવિંદાથી ખુશ છું અને અમે છૂટાછેડા નથી લઈ રહ્યા."