નોરા ફતેહી સામે ફતવો:'કેડી' ફિલ્મના ગીત પર વિવાદ

સંજય દત્ત અને નોરા ફતેહીની આગામી ફિલ્મ ‘કેડી: ધ ડેવિલ’ રિલીઝ પહેલા જ મોટા વિવાદમાં ફસાઈ ગઈ છે. આ ફિલ્મના ગીત 'સરકે ચુનર તેરી સરકે' માં નોરા ફતેહીના ડાન્સ અને દ્રશ્યો સામે ધાર્મિક અને સામાજિક સંગઠનોએ ભારે વિરોધ નોંધાવ્યો છે. ઉત્તર પ્રદેશના અલીગઢથી નોરા ફતેહી વિરુદ્ધ ફતવો પણ જાહેર કરવામાં આવ્યો છે.

ધાર્મિક નેતાઓનો વિરોધ અને ફતવો : 

મુસ્લિમ પર્સનલ દારુલ ઇફ્તાના શાહી ચીફ મુફ્તી મૌલાના ચૌધરી ઇફરાહીમ હુસૈને આ ગીતને અશ્લીલ ગણાવીને કડક શબ્દોમાં નિંદા કરી છે. તેમના મતે, મુસ્લિમ પૃષ્ઠભૂમિ ધરાવતી વ્યક્તિએ આવા અશ્લીલ ગીતનો ભાગ બનવું તે ધાર્મિક દૃષ્ટિએ મોટું પાપ છે. તેમણે ઇસ્લામિક શિક્ષણનો ઉલ્લેખ કરતા જણાવ્યું કે સમાજમાં અનૈતિકતા ફેલાવવી એ દંડનીય અપરાધ છે અને આવા કૃત્યો કરનારને ગંભીર પરિણામો ભોગવવા પડી શકે છે. તેમણે કલાકારોને માત્ર મર્યાદિત અને સભ્ય કન્ટેન્ટ રજૂ કરવા અપીલ કરી છે.

રાષ્ટ્રીય મહિલા આયોગની કડક કાર્યવાહી : 

આ વિવાદ માત્ર ધાર્મિક સ્તર સુધી મર્યાદિત રહ્યો નથી. રાષ્ટ્રીય મહિલા આયોગ (NCW) એ આ ગીતના શબ્દો અને ફિલ્માંકનને વાંધાજનક ગણીને સ્વયં સંજ્ઞાન લીધું છે. આયોગે નોરા ફતેહી, સંજય દત્ત, ગીતકાર રકીબ આલમ અને નિર્માતા-નિર્દેશક સહિતની આખી ટીમને નોટિસ ફટકારી છે. તમામ પક્ષોને 24 માર્ચના રોજ આયોગ સમક્ષ હાજર થવા આદેશ આપવામાં આવ્યો છે. જો તેઓ નિર્ધારિત સમયે હાજર નહીં રહે તો તેમની સામે કાયદેસરની કાર્યવાહી કરવાની પણ ચેતવણી અપાઈ છે.

ડિજિટલ પ્લેટફોર્મ પરથી ગીત હટાવાયું : 

રાષ્ટ્રીય માનવાધિકાર આયોગ પાસે ફરિયાદ પહોંચતા જ તેમણે સેન્સર બોર્ડ અને ગૂગલ ઇન્ડિયા સહિતના મંત્રાલયો પાસે જવાબ માંગ્યો હતો. વધતા જતા દબાણને જોતા નિર્માતાઓએ આ ગીતને યુટ્યુબ અને અન્ય ડિજિટલ પ્લેટફોર્મ પરથી હટાવી દીધું છે.

સમાજ અને પ્રશાસન માટે અપીલ : 

આ વિવાદ વચ્ચે મુફ્તીએ ત્રણ મુખ્ય બાબતો પર ભાર મૂક્યો છે:

સરકારે અશ્લીલતા ફેલાવતા કન્ટેન્ટ પર કડક નિયંત્રણ રાખવું જોઈએ

ફિલ્મ ઇન્ડસ્ટ્રીએ સમાજહિતને ધ્યાનમાં રાખીને ફિલ્મો બનાવવી જોઈએ

સામાન્ય જનતાએ આવા વિવાદાસ્પદ કન્ટેન્ટનો બહિષ્કાર કરવો જોઈએ જેથી નવી પેઢી પર તેની ખોટી અસર ન પડે