શૂટિંગ દરમિયાન ઇમરાન હાશ્મીને ગંભીર ઈજા

બોલીવુડ અભિનેતા ઇમરાન હાશ્મી તેમની આગામી ફિલ્મ ‘આવારાપન 2’ના શૂટિંગ દરમિયાન ગંભીર ઈજા પામ્યા છે. એક તીવ્ર એક્શન સીન દરમિયાન તેમના પેટના ટિશ્યૂ ફાટી ગયા હતા, જેના કારણે તેમને તાત્કાલિક સર્જરી કરાવવી પડી. ડોક્ટરોએ તેમને પૂર્ણ આરામની સલાહ આપી હતી, પરંતુ ઇમરાને ફિલ્મના શેડ્યૂલને અસર ન પડે તે માટે શૂટિંગ ચાલુ રાખવાનો નિર્ણય લીધો છે. 

હાલમાં રાજસ્થાનમાં ચાલી રહેલા શૂટિંગમાં તેઓ મર્યાદિત એક્શન સાથે કામ કરી રહ્યા છે, અને તેમની તબીયત પર તબીબી ટીમ સતત નજર રાખી રહી છે.

આ ઘટના એક જોખમી સ્ટન્ટ દરમિયાન બની હતી, અને ઈજા એટલી ગંભીર હતી કે તરત જ ઓપરેશન કરવું પડ્યું. સર્જરી સફળ રહી છે, પરંતુ તેમને સંપૂર્ણ સ્વસ્થ થવા માટે સમયની જરૂર છે. તેમ છતાં, ઇમરાનની પ્રોફેશનલ કમિટમેન્ટને કારણે તેઓ શૂટ અટકાવવા તૈયાર નથી. ફેન્સમાં આ સમાચારથી ચિંતા વ્યાપી છે, પરંતુ તેમની હિંમત અને ઇચ્છાશક્તિએ સૌને પ્રભાવિત કર્યા છે.

‘આવારાપન 2’ 2007ની ફિલ્મ ‘આવારાપન’નું સીક્વલ છે, જેને મોહિત સૂરીએ ડિરેક્ટ કર્યું હતું. આ ફિલ્મમાં ઇમરાનનું ‘શિવમ પંડિત’ પાત્ર ખૂબ પસંદ કરવામાં આવ્યું હતું, અને સીક્વલમાં પણ ઇમોશનલ અને એક્શનથી ભરપૂર સ્ટોરીની અપેક્ષા છે. ફિલ્મ એપ્રિલ 2026માં રિલીઝ થવાની છે.

ઇમરાન હાશ્મી તાજેતરમાં ફિલ્મ ‘હક’માં જોવા મળ્યા હતા, જે 7 નવેમ્બર 2025ના રોજ રિલીઝ થઈ હતી. તેમાં તેમની સાથે યામી ગૌતમ મુખ્ય ભૂમિકામાં હતી. આ ઉપરાંત, તેઓ આગામી વેબ સીરિઝ ‘તસ્કરી: ધ સ્મગ્લર્સ વેબ’માં પણ નજર આવશે.