એલ્વિશ Vs. મુનવ્વર: NGO સ્કેમના આક્ષેપોથી ખળભળાટ

સોશિયલ મીડિયાના બે મોટા ચર્ચિત ચહેરા, એલ્વિશ યાદવ અને મુનવ્વર ફારુકી ફરી એકવાર સામસામે આવી ગયા છે. આ વખતે વિવાદ કોઈ રમત કે શો બાબતે નહીં, પરંતુ ગંભીર ગણાતા 'NGO સ્કેમ' અને ડોનેશન કેમ્પેઈન બાબતે છે.

એલ્વિશ યાદવે તાજેતરમાં એક બીમાર બાળકની સારવાર માટે ભંડોળ એકત્ર કરવાની અપીલ કરી હતી, જેના જવાબમાં મુનવ્વરે આડકતરી રીતે આ પ્રકારના પ્રમોશનને કૌભાંડ ગણાવતા વિવાદ વકર્યો છે.

સમગ્ર મામલો

 શુક્રવારે બિગ બોસ OTT વિજેતા એલ્વિશ યાદવે એક વિડિયો પોસ્ટ કરીને Spinal Muscular Atrophy (SMA)થી પીડાતા એક માસૂમ બાળકની મદદ માટે અપીલ કરી હતી. આ બાળકની સારવાર માટે અમેરિકાથી ₹9 કરોડનું મોંઘું ઇન્જેક્શન મંગાવવાનું હતું. એલ્વિશે તેના ચાહકોને આ નેક કાર્યમાં ડોનેશન આપવા વિનંતી કરી હતી.

જોકે, થોડા જ સમયમાં મુનવ્વર ફારુકીએ તેની ઇન્સ્ટાગ્રામ સ્ટોરીમાં એક ખુલાસો કર્યો કે કેટલીક કંપનીઓ અને NGO ઇન્ફ્લુએન્સર્સને આવી ભાવનાત્મક અપીલ કરવા માટે તગડી રકમ આપે છે. મુનવ્વરે દાવો કર્યો કે તેને પણ આવી જ એક ઓફર મળી હતી, જેને તેણે ઠુકરાવી દીધી હતી.

એલ્વિશ યાદવનો વળતો પ્રહાર મુનવ્વરના આ ગર્ભિત આક્ષેપ બાદ એલ્વિશ યાદવે શનિવારે એક વિડિયો જારી કરીને પોતાની સફાઈ આપી હતી. એલ્વિશે રોષે ભરાઈને કહ્યું કે, "ભગવાનની દયાથી મારી પાસે પૂરતા પૈસા છે, મારે કોઈની મદદ કરવાના બદલામાં કમિશન લેવાની જરૂર નથી. જે લોકો મદદ માટે ભીખ માંગતા હોય, તેમની પાસે પૈસા કેવી રીતે માંગી શકાય?"

 એલ્વિશે વધુમાં સ્પષ્ટતા કરી કે આ કેમ્પેઈન પારદર્શક છે અને Milaap ફાઉન્ડેશન જેવા વિશ્વસનીય પ્લેટફોર્મ પર રજીસ્ટર્ડ છે. તેણે ડૉક્ટરોના કાગળો પણ જોયા હોવાનો દાવો કર્યો હતો.

વ્યક્તિગત પ્રહાર

એલ્વિશે તેના વિડિયોમાં મુનવ્વરનું નામ લીધા વગર કહ્યું કે, કેટલાક લોકોને માત્ર બીજાને નીચે દેખાડવામાં જ રસ હોય છે. બીજી તરફ, મુનવ્વરે પોતાની એમ્સ્ટરડેમ ટુરનો ઉલ્લેખ કરીને સમજાવ્યું કે કેવી રીતે તેને રિલ્સ પ્રમોટ કરવા માટે પૈસા ઓફર કરવામાં આવ્યા હતા.

આ વિવાદે હવે 'ચેરિટી બિઝનેસ' પર નવી ચર્ચા છેડી દીધી છે. સોશિયલ મીડિયા પર ચાહકો પણ બે ભાગમાં વહેંચાઈ ગયા છે; કેટલાક એલ્વિશની ઉદારતાને ટેકો આપી રહ્યા છે, તો કેટલાક મુનવ્વરની સતર્કતાની પ્રશંસા કરી રહ્યા છે.