અજય દેવગણની ફિલ્મ "ચૌહાણ" વિવાદોના વમળમાં

Chauhaan Movie Controversy: બોલિવૂડના સુપરસ્ટાર અજય દેવગણની નવી ફિલ્મ "ચૌહાણ" ની સત્તાવાર જાહેરાત તાજેતરમાં જ કરવામાં આવી હતી. આ જાહેરાતની સાથે જ ફિલ્મનું સત્તાવાર ટીઝર પણ દર્શકો માટે રિલીઝ કરવામાં આવ્યું હતું, જેનું નિર્દેશન જાણીતા ડાયરેક્ટર નીરજ યાદવ દ્વારા કરવામાં આવ્યું છે. જોકે, ટીઝર લોન્ચ થતાંની સાથે જ આ ફિલ્મ મોટા વિવાદમાં ફસાઈ ગઈ છે. રાજપૂત સમાજના હિતોનું પ્રતિનિધિત્વ કરતા અગ્રણી સંગઠન ક્ષત્રિય પરિષદે આ ટીઝરમાં દર્શાવવામાં આવેલા કેટલાક ચોક્કસ ડાયલોગ્સ અને રાજપૂત ઇતિહાસને જે પદ્ધતિથી રજૂ કરવામાં આવ્યો છે તેની સામે સખત વાંધો ઉઠાવ્યો છે. સંગઠનનો આરોપ છે કે ફિલ્મમાં ઐતિહાસિક તથ્યોને તોડી-મરોડીને રજૂ કરવાનો પ્રયાસ કરવામાં આવ્યો છે, જેના કારણે સામાજિક અને રાજકીય સ્તરે નવો વિવાદ ઉભો થયો છે.

 

We strongly condemn the attempt by Neeraj Yadav and Ajay Devgn's upcoming film Chauhaan to appropriate the Chauhan clan name for contemporary communal politics.

Rajput history is not a political prop. The legacy of the Chauhans belongs to Rajput history , not to electoral… pic.twitter.com/nDRRKoikv4

— Kshatriya Parishad (@kshatriya_org) June 29, 2026

 

રાજપૂત ઓળખને રાજકીય અને વૈચારિક હથિયાર બનાવવાની ગતિવિધિઓની સખત નિંદા
ક્ષત્રિય પરિષદ (KSP) દ્વારા તેના સત્તાવાર X-એકાઉન્ટ પર સોશિયલ મીડિયાના માધ્યમથી એક વિગતવાર નિવેદન જાહેર કરવામાં આવ્યું છે. આ નિવેદનમાં સંગઠને સ્પષ્ટ શબ્દોમાં જણાવ્યું છે કે, નીરજ યાદવ અને અજય દેવગણની આગામી ફિલ્મ "ચૌહાણ" માં વર્તમાન સમયના સાંપ્રદાયિક રાજકારણને ચમકાવવા માટે ગૌરવશાળી ચૌહાણ કુળના નામનો દુરુપયોગ કરવાનો જે પ્રયાસ થઈ રહ્યો છે, તેની તેઓ સખત શબ્દોમાં નિંદા કરે છે. સંગઠનનું માનવું છે કે રાજપૂત ઇતિહાસ કોઈ રાજકીય હથિયાર નથી. ચૌહાણ વારસો એ સમગ્ર રાજપૂત ઇતિહાસનો એક અત્યંત મહત્વનો અને પવિત્ર ભાગ છે, તેને કોઈ ચૂંટણીલક્ષી કથા કે બહારના લોકો દ્વારા પોતાના સ્વાર્થ માટે ઉભા કરવામાં આવેલા વિવાદો સુધી મર્યાદિત ન કરી શકાય. પોતાના વૈચારિક હેતુઓ સિદ્ધ કરવા માટે રાજપૂત ઓળખને હથિયાર બનાવવાના કોઈપણ પ્રયાસને ક્ષત્રિય સમાજ ક્યારેય સ્વીકારશે નહીં.

અફઘાન અને રાજપૂતોની સંયુક્ત લડાઈના ઐતિહાસિક ઉદાહરણો આપીને ફિલ્મની અજ્ઞાનતા છતી કરી
ક્ષત્રિય પરિષદે ફિલ્મ નિર્માતાઓની વિચારસરણી સામે સવાલો ઉઠાવતા જણાવ્યું છે કે આવા વિભાજનકારી નિવેદનો અને દ્રશ્યો ભારતીય ઇતિહાસ તેમજ ભારતીય ઉપખંડના ગૌરવશાળી ભૂતકાળ પ્રત્યેની ઘોર અજ્ઞાનતા દર્શાવે છે. ઇતિહાસની જટિલતાઓને સામાન્ય સાંપ્રદાયિક વિભાજનના દ્રષ્ટિકોણ સુધી ક્યારેય ઘટાડી શકાય નહીં. પોતાના મુદ્દાને મજબૂતાઈથી રજૂ કરવા માટે સંગઠને ઇતિહાસના એવા અણમોલ પ્રસંગોના ઉદાહરણો આપ્યા છે જ્યારે અફઘાન અને રાજપૂત યોદ્ધાઓ એક જ ધ્વજ હેઠળ સાથે મળીને લડ્યા હતા. સંગઠને યાદ અપાવ્યું કે ખાનવાના ઐતિહાસિક યુદ્ધમાં મહમુદ લોદી પોતે મહારાણા સાંગાના નેતૃત્વ હેઠળ લડ્યા હતા. આ જ રીતે, હલ્દીઘાટીના પ્રખ્યાત યુદ્ધમાં હકીમ ખાને સૈન્યની એક મહત્વની ટુકડીનું નેતૃત્વ કર્યું હતું. આ સિવાય, ફરીદ ખાન જે પાછળથી શેર શાહ સુરી તરીકે ઓળખાયા, તેમણે પોતાના પ્રારંભિક દિવસોમાં રાજા રૈસલ શેખાવત હેઠળ લશ્કરી સેવા આપી હતી અને મહારાજા વિક્રમાદિત્ય તોમર પાણીપતના પ્રથમ યુદ્ધમાં લોદી સૈન્ય તરફથી લડતા લડતા શહીદ થયા હતા.

'પઠાણોને કહો કે ચૌહાણ આવી રહ્યા છે' ડાયલોગ સામે વાંધો
આ સમગ્ર વિવાદના મૂળમાં ફિલ્મનો એક ચોક્કસ ડાયલોગ છે, જેમાં ભારે આક્રમકતા સાથે બોલવામાં આવ્યું છે કે, 'પઠાણોને કહો કે ચૌહાણ આવી રહ્યા છે'. આ ફિલ્મના કથાબીજને કાશ્મીરના બેકગ્રાઉન્ડ પર સેટ કરવામાં આવ્યું છે, તેથી આ ડાયલોગ કાશ્મીરી નાગરિકોને પઠાણો તરીકે દર્શાવવાના ખોટા પ્રયાસના સંદર્ભમાં પણ જોવામાં આવી રહ્યો છે, જેના લીધે વિરોધ વધુ ઉગ્ર બન્યો છે. ક્ષત્રિય પરિષદે ફિલ્મના નિર્માતાઓ અને રાજકીય વ્યક્તિઓને નમ્ર અપીલ કરતા લખ્યું છે કે ઐતિહાસિક ક્ષણોને ક્યારેય સાંપ્રદાયિક હિંસા કે નફરત ફેલાવવાનું માધ્યમ ન બનાવવી જોઈએ. ભારતના સમૃદ્ધ ઇતિહાસને વ્યાપક અને જવાબદારીપૂર્વક સમજવાની જરૂર છે. ફિલ્મ ઉદ્યોગે ઐતિહાસિક જટિલતાઓ અને વિવિધ સમુદાયોના આદરનું સન્માન કરવું જોઈએ અને માત્ર નફાખોરી કે વિભાજનકારી રાજકીય ચર્ચાઓ માટે રાજપૂત વારસાનો ઉપયોગ કરવાનું બંધ કરવું જોઈએ.