ફિલ્મ 'નઝરિયા' ના નામે 40 લાખ પડાવ્યા હોવાનો આરોપ :&nbsp;
સંગીતકાર અને ફિલ્મ નિર્માતા પલાશ મુચ્છલની મુશ્કેલીઓમાં સતત વધારો થઈ રહ્યો છે. મહારાષ્ટ્રના સાંગલી શહેરમાં એક ફિલ્મ ફાઈનાન્સર સાથે લાખો રૂપિયાની છેતરપિંડી કરવાના મામલે પલાશ વિરુદ્ધ પોલીસ ફરિયાદ નોંધવામાં આવી છે. સાંગલીના રહેવાસી વૈભવ માનેએ પલાશ પર આરોપ લગાવ્યો છે કે નવી ફિલ્મ બનાવવાના બહાને તેની પાસેથી કુલ 40 લાખ રૂપિયા લેવામાં આવ્યા હતા, જે હજુ સુધી પરત કરવામાં આવ્યા નથી.
સ્મૃતિ મંધાનાના પિતા દ્વારા થઈ હતી મુલાકાત :&nbsp;
ફરિયાદી વૈભવ માને ભારતીય મહિલા ક્રિકેટર સ્મૃતિ મંધાનાનો ખાસ મિત્ર છે. જ્યારે પલાશ મુચ્છલ સાંગલી પ્રવાસે આવ્યો હતો, ત્યારે સ્મૃતિના પિતા શ્રીનિવાસ મંધાનાએ વૈભવની મુલાકાત પલાશ સાથે કરાવી હતી. આ બેઠક દરમિયાન જ એક નવા ફિલ્મ પ્રોજેક્ટમાં રોકાણ કરવા અંગે ચર્ચાઓ થઈ હતી.
OTT પર રિલીઝ અને નફાનું આપ્યું હતું આશ્વાસન :&nbsp;
પલાશ મુચ્છલે વૈભવને નઝરિયા નામની આગામી ફિલ્મમાં નાણાં રોકવાની ઓફર કરી હતી. તેણે દાવો કર્યો હતો કે આ ફિલ્મનું શૂટિંગ ઝડપથી પૂર્ણ કરી તેને સીધી OTT પ્લેટફોર્મ પર રિલીઝ કરવામાં આવશે, જેનાથી રોકાણકારોને મોટો નફો મળશે. પલાશની વાતોમાં આવીને વૈભવે વિવિધ હપ્તે રોકડ અને ડિજિટલ ટ્રાન્ઝેક્શન દ્વારા 40 લાખ રૂપિયા ચૂકવ્યા હતા.
સંપર્ક તોડી નાખતા મામલો પોલીસ સ્ટેશને પહોંચ્યો :&nbsp;
ઘણો સમય વીત્યા પછી પણ ફિલ્મનું કામ આગળ વધ્યું નહીં. જ્યારે વૈભવે પોતાના નાણાં પાછા માંગ્યા ત્યારે પલાશ પહેલા વાયદા કરતો રહ્યો અને બાદમાં તેનો ફોન ઉપાડવાનું પણ બંધ કરી દીધું હતું. અંતે પલાશે વૈભવનો નંબર બ્લોક કરી દેતા છેતરપિંડીનો અહેસાસ થતા વૈભવે સાંગલી પોલીસનો સંપર્ક કર્યો છે.
પોલીસ કાર્યવાહી અને વ્યક્તિગત વિવાદ :&nbsp;
સાંગલી પોલીસે આ મામલે પ્રાથમિક તપાસ શરૂ કરી દીધી છે. વૈભવ માને દ્વારા રજૂ કરવામાં આવેલા બેંક સ્ટેટમેન્ટ્સ અને અન્ય પુરાવાઓની હાલ ચકાસણી ચાલી રહી છે. નોંધનીય છે કે પલાશ મુચ્છલ તાજેતરમાં સ્મૃતિ મંધાના સાથેના તેના સંબંધોને લઈને પણ ચર્ચામાં હતો. હવે આ કાયદેસરની ગૂંચવણને કારણે તેની કારકિર્દી પર પણ સંકટના વાદળો ઘેરાયા છે.
&nbsp;

ફિલ્મ ફાઈનાન્સર વૈભવ માનેએ પલાશ મુચ્છલ પર ફિલ્મ બનાવવાના બહાને નાણાં હડપવાનો ગંભીર આક્ષેપ

January 23, 2026 | 13:44 IST