કોમેડિયન કપિલ શર્માના ઘર પર ફાયરિંગ

Kapil Sharma House Firing Amritsar: મનોરંજન જગતના પ્રખ્યાત કોમેડિયન અને એક્ટર કપિલ શર્માના પંજાબના અમૃતસર સ્થિત ઘરની બહાર સોમવારે બે રાઉન્ડ અંધાધૂંધ ફાયરિંગ થતાં સનસનાટી મચી ગઈ છે. પ્રાથમિક તપાસ અનુસાર, હુમલાખોરો મોટરસાઇકલ પર આવ્યા હતા અને ગોળીબાર કરીને ફરાર થઈ ગયા હતા. જોકે, રાહતના સમાચાર એ છે કે ફાયરિંગ સમયે કપિલ શર્મા તેમના પરિવાર સાથે મુંબઈમાં હતા, જેથી કોઈ જાનહાનિ થઈ નથી. હજુ સુધી કોઈ ગેંગ અથવા સંગઠને આ હુમલાની જવાબદારી લીધી નથી.

પોશ વિસ્તાર હોલી સિટી સીલ: સીસીટીવી ફૂટેજ કબજે
આ ઘટના અમૃતસરના અત્યંત પોશ ગણાતા 'હોલી સિટી' વિસ્તારમાં બની છે, જ્યાં કપિલ શર્માનું આલીશાન ઘર આવેલું છે. હુમલાની માહિતી મળતા જ પોલીસનો કાફલો ઘટનાસ્થળે દોડી ગયો હતો અને સમગ્ર વિસ્તારને સીલ કરી દીધો હતો. પોલીસે હુમલાખોરોની ઓળખ કરવા અને તેમના ભાગવાના રૂટની માહિતી મેળવવા માટે કપિલ શર્માના ઘર તેમજ આસપાસના અન્ય વીઆઈપી (VIP) મકાનોની બહાર લાગેલા સીસીટીવી (CCTV) કેમેરાના ફૂટેજ પોતાના કબજામાં લીધા છે. આ સાથે જ આસપાસના પાડોશીઓના નિવેદન નોંધવાની પ્રક્રિયા પણ શરૂ કરાઈ છે.

પોલીસ કમિશનરની અપીલ: અફવાઓ પર ધ્યાન ન આપો
અમૃતસરના પોલીસ કમિશનર ગુરપ્રીત સિંહ ભુલ્લરે આ મામલે સત્તાવાર માહિતી આપતા જણાવ્યું છે કે, આ ઘટનાને લઈને સોશિયલ મીડિયા કે અન્ય પ્લેટફોર્મ પર કેટલાક બિનજવાબદાર તત્વો દ્વારા ખોટી અફવાઓ ફેલાવવામાં આવી રહી છે. તેમણે જનતાને અપીલ કરી છે કે આવી કોઈ પણ અફવાઓ પર વિશ્વાસ ન કરવો. પોલીસ ટૂંક સમયમાં જ સમગ્ર હકીકત સામે લાવવા માટે એક સત્તાવાર વીડિયો નિવેદન જાહેર કરશે.

કેનેડા કનેક્શનની આશંકા: કેફે પર પણ થઈ ચૂક્યો છે હુમલો
પોલીસ આ મામલાને ખૂબ જ ગંભીરતાથી લઈ રહી છે, કારણ કે કપિલ શર્મા સાથે જોડાયેલી આ પહેલી ઘટના નથી. કેનેડાના સરે (Surrey) શહેરમાં સ્થિત કપિલ શર્માના 'કેપ્સ કેફે' (Kap's Cafe) ની બહાર પણ ભૂતકાળમાં બે વાર ગોળીબાર થઈ ચૂક્યો છે, જેની જવાબદારી કેટલાક ખાલિસ્તાની સમર્થક સંગઠનોએ લીધી હતી. નોંધનીય છે કે હજુ 22 દિવસ પહેલાં જ કેનેડામાં આ કેફેની નજીક ફરી ફાયરિંગ થયું હતું. આ સંજોગોમાં અમૃતસર પોલીસ એ દિશામાં પણ તપાસ ચલાવી રહી છે કે શું આ આંતરરાષ્ટ્રીય ખંડણી, કોઈ ચોક્કસ જૂથની ધમકી અથવા કેનેડા કનેક્શન સાથે જોડાયેલો મામલો છે કે નહીં.