બોલિવૂડ સ્ટાર્સ સોફ્ટ ટાર્ગેટ? રાજપાલ યાદવની વેદના

પોતાની અનોખી કોમેડી અને અભિનયથી કરોડો પ્રેક્ષકોના દિલ જીતનાર અભિનેતા રાજપાલ યાદવ હાલમાં સમાચારોમાં છે. જોકે, આ વખતે ચર્ચા તેમની કોઈ ફિલ્મની નહીં પણ તેમની અંદર છુપાયેલી પીડા અને આક્રોશની છે. 5 કરોડ રૂપિયાના લોન વિવાદમાં જેલની સજા કાપી ચૂકેલા રાજપાલે તાજેતરમાં આપેલા એક ઇન્ટરવ્યુમાં ફિલ્મ ઉદ્યોગના કલાકારોને "સોફ્ટ ટાર્ગેટ" બનાવનારાઓ પર આકરા પ્રહારો કર્યા છે.

છબી બગાડવાનું સુનિયોજિત કાવતરું : 

રાજપાલ યાદવના જણાવ્યા અનુસાર, આજકાલ સમાજમાં એક એવી નકારાત્મક ધારણા ઘર કરી ગઈ છે કે જો કોઈ વ્યક્તિ બોલિવૂડ સાથે જોડાયેલી છે, તો તે હંમેશા ખોટી જ હશે. તેમણે આરોપ લગાવ્યો કે તેમની ફિલ્મ ‘આતા પતા લપતા’ રિલીઝ થવાની હતી ત્યારે જ જાણી જોઈને વિવાદો ઊભા કરવામાં આવ્યા હતા. જો ફિલ્મ સમયસર રિલીઝ થઈ હોત, તો તમામ લેણદેણ પૂર્ણ થઈ શકી હોત, પરંતુ તેમની કારકિર્દી અને છબીને નુકસાન પહોંચાડવા માટે ફિલ્મની રિલીઝ પહેલા જ તેમને બદનામ કરવામાં આવ્યા.

1500 કરોડ વિરુદ્ધ 5 કરોડનો જંગ : 

ઇન્ટરવ્યુ દરમિયાન રાજપાલે એક ચોંકાવનારો દાવો કર્યો હતો. તેમણે જણાવ્યું કે તેમની સામે ફરિયાદ કરનાર વ્યક્તિ 1500 કરોડ રૂપિયાની સંપત્તિ હોવાનો દાવો કરતી હતી, તેમ છતાં માત્ર 5 કરોડ રૂપિયા માટે રાજપાલની કારકિર્દી ખતમ કરવા પર ઉતરી આવી હતી. અભિનેતાના મતે, તે વ્યક્તિનો હેતુ માત્ર પૈસા વસૂલવાનો જ નહોતો, પરંતુ રાજપાલ યાદવ કામ ન કરી શકે અને ફિલ્મ ઉદ્યોગ તેમનો બહિષ્કાર કરે તેવો હતો.

વર્ષ 2013 થી 2018 દરમિયાન રાજપાલને વારંવાર કાયદાકીય ગુંચવણમાં નાખવાના પ્રયાસો થયા. તેમના પાસપોર્ટ રોકવા અને વિદેશમાં શૂટિંગ પર પ્રતિબંધ મુકવાની કોશિશ પણ કરવામાં આવી હતી, જેથી તેઓ આર્થિક રીતે તૂટી જાય. જોકે, કાયદાકીય પ્રક્રિયાનું પાલન કરીને તેઓ હંમેશા પોતાના કામ પર પરત ફરતા રહ્યા

સિનેમા માટે લોહી અને પરસેવો : 

પોતાની વાતને મજબૂત રીતે રજૂ કરવા માટે રાજપાલે મહાન કલાકાર રાજ કપૂરનું ઉદાહરણ આપ્યું હતું. તેમણે કહ્યું કે બોલિવૂડમાં ફિલ્મો માત્ર નફા માટે નથી બનતી, પરંતુ તેમાં કલાકારનું સર્વસ્વ હોમાયેલું હોય છે. ‘મેરા નામ જોકર’ જેવી ફિલ્મો શરૂઆતમાં આર્થિક રીતે નિષ્ફળ રહી હોવા છતાં પાછળથી માસ્ટરપીસ સાબિત થઈ હતી. વ્યવસાયમાં થતા નુકસાનને ગુનાખોરીનું સ્વરૂપ આપવું તે કલા અને કલાકાર બંનેનું અપમાન છે.

છેલ્લે ભાવુક થતા રાજપાલે જણાવ્યું કે સિનેમા જગત અને તેમના ચાહકોના પ્રેમને કારણે જ તેઓ આજે ફરી બેઠા થઈ શક્યા છે. તેઓ એ સાબિત કરવા માંગે છે કે બોલિવૂડના દરેક વ્યક્તિ વિશેની નકારાત્મક માન્યતા ખોટી છે.