અભિનેતા ધર્મેન્દ્રનું 89 વર્ષની વયે નિધન

હિન્દી સિનેમાના દિગ્ગજ અને લોકપ્રિય અભિનેતા ધર્મેન્દ્રનું 89 વર્ષની વયે લાંબી બીમારી બાદ નિધન થયું. લાંબી બીમારી બાદ 89 વર્ષની વયે તેમણે મુંબઈમાં અંતિમ શ્વાસ લીધા. છેલ્લા કેટલાક સમયથી ધર્મેન્દ્ર શ્વાસ લેવામાં તકલીફ અને સતત બગડતા સ્વાસ્થ્યની સમસ્યાનો સામનો કરી રહ્યા હતા. નિયમિત તપાસ અને સારવાર માટે તેમને મુંબઈની બ્રીચ કેન્ડી હોસ્પિટલમાં દાખલ કરવામાં આવ્યા હતા. હોસ્પિટલમાં થોડા દિવસોની સારવાર બાદ તેમની તબિયતમાં થોડો સુધારો થયો, જેના કારણે પરિવારના સભ્યોની વચ્ચે તેમની વધુ સારવાર કરી શકાય તે હેતુથી તેમને ઘરે લાવવામાં આવ્યા હતા.

સમગ્ર ફિલ્મ જગતમાં શોકની લહેર

તેમના ઘરે તેમની સંભાળ માટે ખાસ વ્યવસ્થા કરવામાં આવી હતી, પરંતુ તેમનું સ્વાસ્થ્ય સતત નબળું પડતું ગયું. શ્વાસ લેવામાં મુશ્કેલી સિવાય ધર્મેન્દ્ર (Dharmendra) ને ઉંમર સંબંધિત અન્ય ઘણી સમસ્યાઓ પણ હતી. હોસ્પિટલ અને ઘરે સતત સારવાર અને દેખરેખ હોવા છતાં તેમની હાલત ગંભીર રહી. અભિનેતાના પરિવારના સભ્યો તેમની સંભાળમાં સતત વ્યસ્ત રહ્યા હતા. કોઈપણ કટોકટીની સ્થિતિમાં તાત્કાલિક મદદ મળી રહે તે માટે ધર્મેન્દ્રના ઘરે એમ્બ્યુલન્સ અને ડૉકટરોની ટીમની વ્યવસ્થા પણ કરવામાં આવી હતી. તેમના ચાહકો અને ફિલ્મ ઈન્ડસ્ટ્રીના લોકો સતત તેમના સ્વાસ્થ્ય વિશે માહિતી મેળવતા હતા. સલમાન ખાન, શાહરૂખ ખાન અને ગોવિંદા સહિતની ઘણી જાણીતી હસ્તીઓએ હોસ્પિટલ અને ઘરે જઈને ધર્મેન્દ્રના ખબર-અંતર પૂછ્યા હતા. તેમના નિધનના સમાચાર સાંભળતા જ સમગ્ર ફિલ્મ જગતમાં શોકની લહેર ફરી વળી હતી.

હિન્દી સિનેમામાં ધર્મેન્દ્રનો શાનદાર વારસો

ધર્મેન્દ્ર (Dharmendra) ની કારકિર્દી હિન્દી સિનેમામાં લગભગ છ દાયકા લાંબી રહી છે. તેમને પ્રેમથી બોલિવૂડના 'હી-મેન' તરીકે ઓળખવામાં આવતા હતા. તેમણે 1960માં આવેલી ફિલ્મ 'દિલ ભી તેરા હમ ભી તેરે' થી પોતાની કારકિર્દીની શરૂઆત કરી. ત્યારબાદ તેમણે 'શોલા ઔર શબનમ', 'અનપઢ', 'બંદિની', 'પૂજા કે ફૂલ', 'હકીકત', 'ફૂલ ઔર પથ્થર', 'અનુપમા', 'ખામોશી', 'પ્યાર હી પ્યાર', 'તુમ હસીન મૈં જવાન', 'સીતા ઔર ગીતા', 'યાદોં કી બારાત' અને સિનેમાની આઇકોનિક ફિલ્મ 'શોલે' જેવી અનેક યાદગાર ફિલ્મોમાં કામ કર્યું. તેમના દમદાર અભિનયના કારણે તેમણે લાખો દર્શકોના દિલમાં એક ખાસ સ્થાન બનાવ્યું હતું. 

2012માં ભારત સરકાર દ્વારા  'પદ્મ ભૂષણ'

તેમની કારકિર્દીમાં તેમણે ઘણા પુરસ્કારો જીત્યા હતા, જેમાં વર્ષ 2012માં ભારત સરકાર દ્વારા આપવામાં આવેલો ત્રીજો સર્વોચ્ચ નાગરિક સન્માન 'પદ્મ ભૂષણ' પણ સામેલ છે. આ ઉપરાંત, તેમણે અનેક ફિલ્મફેર પુરસ્કારો પણ મેળવ્યા હતા અને વિવેચકો તેમજ દર્શકો તરફથી ખૂબ પ્રશંસા મેળવી હતી. હિન્દી સિનેમામાં તેમના અમૂલ્ય યોગદાનને કારણે તેમને બોલિવૂડના સૌથી મહાન અને પ્રતિષ્ઠિત અભિનેતાઓમાં ગણવામાં આવે છે.