બી પ્રાક પાસે 10 કરોડની ખંડણી: બિશ્નોઈ ગેંગની ધમકી

પંજાબી અને બોલિવૂડ મ્યુઝિક ઈન્ડસ્ટ્રીના જાણીતા સિંગર બી પ્રાકને જાનથી મારી નાખવાની અને ખંડણીની ધમકી મળતા ચકચાર મચી ગઈ છે. લોરેન્સ બિશ્નોઈ ગેંગના સભ્ય હોવાનો દાવો કરનાર વ્યક્તિએ બી પ્રાક પાસેથી 10 કરોડ રૂપિયાની માંગણી કરી છે. આ સમગ્ર મામલે પંજાબી સિંગર દિલનૂર દ્વારા પોલીસ ફરિયાદ નોંધાવવામાં આવી છે.

ધમકીભર્યો ઓડિયો મેસેજ અને ખંડણી : 

આ ઘટનાની શરૂઆત 5 જાન્યુઆરીએ થઈ હતી જ્યારે સિંગર દિલનૂરને વિદેશી નંબર પરથી કોલ્સ આવ્યા હતા. શરૂઆતમાં ફોન ન ઉપાડ્યા બાદ 6 જાન્યુઆરીએ થયેલી વાતચીત દરમિયાન સામે પક્ષે શંકાસ્પદ વાત કરતા દિલનૂરે કોલ કાપી નાખ્યો હતો. ત્યારબાદ તેને એક વોઈસ મેસેજ મોકલવામાં આવ્યો હતો. આ મેસેજમાં આરઝૂ બિશ્નોઈ નામના વ્યક્તિએ પોતાની ઓળખ બિશ્નોઈ ગેંગના સભ્ય તરીકે આપી હતી. તેણે સ્પષ્ટ શબ્દોમાં જણાવ્યું હતું કે બી પ્રાક સુધી આ સંદેશ પહોંચાડી દેવો કે એક સપ્તાહમાં 10 કરોડ રૂપિયાની વ્યવસ્થા કરે

વિદેશથી મળ્યો મેસેજ, પોલીસ એક્શનમાં : 

ધમકી આપનાર વ્યક્તિએ એવી ચેતવણી પણ આપી છે કે બી પ્રાક દુનિયાના કોઈપણ ખૂણે જતો રહે તો પણ તેની સાથે સંકળાયેલા લોકોને નુકસાન પહોંચાડવામાં આવશે. આ બાબતને ગંભીરતાથી લઈને સિંગર દિલનૂરે મોહાલી એસએસપીને લેખિતમાં જાણ કરી છે. પંજાબ પોલીસ હાલ આ વિદેશી નંબર અને આરઝૂ બિશ્નોઈના કનેક્શન અંગે ટેકનિકલ તપાસ કરી રહી છે. સિંગરની સુરક્ષા વધારવા અંગે પણ વિચારણા ચાલી રહી છે.

મ્યુઝિક ઈન્ડસ્ટ્રીમાં ભયનો માહોલ : 

'તેરી મિટ્ટી' અને 'મનભર્યા' જેવા લોકપ્રિય ગીતો આપનાર બી પ્રાક હાલમાં ટોચના કલાકારોમાં ગણાય છે. અગાઉ પણ અનેક પંજાબી સિંગર્સ લોરેન્સ બિશ્નોઈ ગેંગના નિશાને રહ્યા છે, જેના કારણે ઈન્ડસ્ટ્રીમાં સુરક્ષાને લઈને ચિંતા વધી ગઈ છે. હાલમાં પોલીસ આરોપી સુધી પહોંચવા માટે સાયબર સેલની મદદ લઈ રહી છે.