Aamir Khan Marriage Controversy: બોલિવૂડના 'મિસ્ટર પરફેક્શનિસ્ટ' તરીકે જાણીતા સુપરસ્ટાર આમિર ખાને તાજેતરમાં 61 વર્ષની વયે ઉદ્યોગપતિ ગૌરી સ્પ્રેટ સાથે લગ્ન કરીને ફરી એકવાર ચર્ચાનું કેન્દ્ર બન્યા છે. 5 જુલાઈ, 2026 ના રોજ મુંબઈના બાંદ્રા ખાતે યોજાયેલા એક ખાનગી સમારોહમાં આમિર અને ગૌરીએ સિવિલ મેરેજ દ્વારા લગ્ન કર્યા હતા. આ આમિર ખાનના જીવનના ત્રીજા લગ્ન છે. જોકે, લગ્નના થોડા જ દિવસોમાં આ મામલો સોશિયલ મીડિયાથી લઈને ધાર્મિક મંચો સુધી ગરમાયો છે. બજરંગ દળ સહિતના અનેક સંગઠનોએ આ લગ્નને 'લવ જેહાદ' ગણાવી આમિર ખાનને તેના "બ્રાન્ડ એમ્બેસેડર" તરીકે સંબોધ્યા છે. એટલું જ નહીં, ઉત્તર પ્રદેશના અલીગઢમાં દારુલ ઇફ્તાના શાહી મુખ્ય મુફ્તી મૌલાના ચૌધરી ઇફરાહીમ હુસૈને આમિર વિરુદ્ધ ફતવો પણ જારી કર્યો છે.
'લવ જેહાદ'ના આરોપો પર આમિર ખાનનો સ્પષ્ટ જવાબ વિવિધ સ્તરેથી થઈ રહેલી ટીકાઓ અને આરોપો વચ્ચે આમિર ખાને એક મુલાકાત દરમિયાન પોતાનું મૌન તોડ્યું છે. આમિરે આ તમામ આક્ષેપોને પાયાવિહોણા ગણાવતા કહ્યું કે, તેમનો પરિવાર હંમેશા વિવિધ ધર્મો અને સંસ્કૃતિઓનો આદર કરનારો અને સમાવેશી રહ્યો છે. પોતાની પત્નીઓ અને પરિવારના સભ્યોના લગ્નજીવન વિશે વાત કરતા તેમણે ભારપૂર્વક જણાવ્યું કે, તેમના પરિવારમાં ક્યારેય ધર્મ પરિવર્તનને પ્રોત્સાહન આપવામાં આવ્યું નથી. આમિર ખાને કહ્યું, "સત્ય એ છે કે અમારો પરિવાર ખૂબ જ મૈત્રીપૂર્ણ અને સમાવેશી છે. મારી બંને બહેનોએ હિન્દુ ધર્મમાં લગ્ન કર્યા છે અને મારી પુત્રી આયરાના લગ્ન પણ હિન્દુ ધર્મમાં થયા છે. મારા પિતરાઈ ભાઈ મન્સૂરના લગ્ન એક ખ્રિસ્તી સ્ત્રી સાથે થયા છે. આ રીતે અમારો પરિવાર એક નાનકડું ભારત છે જ્યાં તમામ ધર્મોનું સન્માન થાય છે."
સિવિલ મેરેજ અને ધર્મ પરિવર્તનનો મુદ્દો ધર્મ પરિવર્તનના આરોપોને નકારી કાઢતા આમિરે સ્પષ્ટતા કરી હતી કે, તેમની કોઈપણ પત્નીએ લગ્ન માટે પોતાનો ધર્મ બદલ્યો નથી. તેમણે જણાવ્યું, "ગૌરી, રીના કે કિરણમાંથી કોઈએ મારી સાથે લગ્ન કર્યા ત્યારે મારો ધર્મ સ્વીકાર્યો ન હતો, કારણ કે અમારા લગ્ન સિવિલ મેરેજ હતા. આ લગ્ન કાયદાકીય પદ્ધતિથી થયા છે, ધાર્મિક વિધિઓથી નહીં." પોતાની ત્રીજી પત્ની ગૌરી સ્પ્રેટ વિશે વાત કરતા આમિરે વધુમાં ઉમેર્યું કે, "ગૌરી હિન્દુ નથી, તે ખ્રિસ્તી છે. તે પણ એવી વ્યક્તિ છે જે ધાર્મિક પરંપરાઓનું કડકપણે પાલન કરતી નથી. અમારા સંબંધોમાં વ્યક્તિગત સ્વતંત્રતાને પ્રાધાન્ય આપવામાં આવ્યું છે."
આમિર ખાનનું લગ્નજીવન: ભૂતકાળથી વર્તમાન સુધી આમિર ખાનના લગ્નજીવન પર નજર કરીએ તો, તેના પ્રથમ લગ્ન 1986 માં રીના દત્તા સાથે થયા હતા, જે 16 વર્ષ સુધી ચાલ્યા હતા અને 2002 માં બંને અલગ થયા હતા. તેને આ લગ્નથી પુત્ર જુનૈદ અને પુત્રી આયરા છે. ત્યારબાદ 2005 માં તેણે ફિલ્મ નિર્માતા કિરણ રાવ સાથે લગ્ન કર્યા હતા, જેની સાથે તેને એક પુત્ર આઝાદ છે. 2021 માં આમિર અને કિરણ રાવ વચ્ચે છૂટાછેડા થયા હતા. વર્તમાન પત્ની ગૌરી સ્પ્રેટ સાથેના સંબંધ વિશે આમિરે જણાવ્યું કે, તેઓ એકબીજાને લગભગ 25 વર્ષથી ઓળખે છે, પરંતુ 2 વર્ષ પહેલાં બેંગલુરુમાં તેની પિતરાઈ બહેન નુઝહત ખાન દ્વારા તેઓ ફરી નજીક આવ્યા હતા. ગૌરી પણ છૂટાછેડા લઈ ચૂકી છે અને તેને પહેલા લગ્નથી 7 વર્ષનો એક પુત્ર છે. આમિર ખાને ગત વર્ષે માર્ચમાં પોતાના 60મા જન્મદિવસની આસપાસ મીડિયા સામે ગૌરીનો પરિચય કરાવ્યો હતો.
મુફ્તીનો ફતવો અને ધાર્મિક વિવાદ આમિર ખાન વિરુદ્ધ જારી કરવામાં આવેલા ફતવા અંગે શાહી મુખ્ય મુફ્તી મૌલાના ચૌધરી ઇફરાહીમ હુસૈને વીડિયો દ્વારા પોતાનો પક્ષ રજૂ કર્યો છે. તેમણે કહ્યું કે, "ઇસ્લામિક નિયમો મુજબ, મુસ્લિમ પુરુષોએ આસ્થાવાન મુસ્લિમ સ્ત્રીઓ સાથે જ લગ્ન કરવા જોઈએ. આમિર ખાને ત્રીજી વખત બિન-મુસ્લિમ મહિલા સાથે લગ્ન કરીને ઇસ્લામના નિયમોનું ઉલ્લંઘન કર્યું છે." તેમણે ઉમેર્યું કે જો કોઈ મુસ્લિમ પુરુષ એવી સ્ત્રી સાથે લગ્ન કરે જે પોતાના અગાઉના ધર્મ પ્રત્યે વફાદાર હોય, તો તે ઇસ્લામિક કાયદા મુજબ ગેરકાયદેસર છે.
મલ્ટી-જનરેશનલ સ્કાયવિલા પણ ચર્ચામાં લગ્નજીવન ઉપરાંત, આમિર ખાનના બાંદ્રા વેસ્ટના પાલી હિલમાં 100 કરોડ રૂપિયાના મલ્ટી-જનરેશનલ સ્કાયવિલાના નિર્માણ અંગેના અહેવાલો પણ ચર્ચામાં હતા. આ વિશે વાત કરતા આમિરે કહ્યું કે, આ સમાચારમાં કોઈ સત્યતા નથી કે તે માત્ર તેમનો પ્રોજેક્ટ છે. તેમણે કહ્યું, "અમારું એપાર્ટમેન્ટ કોમ્પ્લેક્સ અન્ય બિલ્ડિંગોની જેમ ફરીથી વિકસાવવામાં આવી રહ્યું છે. આ અમારી હાઉસિંગ સોસાયટીનો સામૂહિક નિર્ણય છે જેમાં મારા સહિત 24 સભ્યો સામેલ છે. તેમાં એક બિલ્ડર પણ છે જેમણે મોટી સંખ્યામાં ફ્લેટ ખરીદ્યા હોવાથી તેઓ બિલ્ડિંગનો મોટો હિસ્સો ધરાવે છે."
આમિર ખાન વિવાદો વચ્ચે પોતાના વલણ પર મક્કમ આમિર ખાન આ વિવાદો વચ્ચે પણ પોતાના વલણ પર મક્કમ છે. જ્યાં એક તરફ ધાર્મિક સંગઠનો તેમના અંગત જીવન અને લગ્નને ધાર્મિક ચશ્માથી જોઈ રહ્યા છે, ત્યાં બીજી તરફ આમિર ખાનનું કહેવું છે કે વ્યક્તિગત સ્તરે ધર્મ કરતાં માનવીય સંબંધો વધુ મહત્વના છે. તેમના માટે આ સિવિલ મેરેજ બે વ્યક્તિઓ વચ્ચેનો પરસ્પર સમજૂતીનો નિર્ણય છે. જોકે, ફતવા અને 'લવ જેહાદ'ના આક્ષેપો વચ્ચે આ મામલો હજુ પણ લાંબો ખેંચાય તેવા એંધાણ દેખાઈ રહ્યા છે. આમિર ખાનના સમર્થકો અને ટીકાકારો વચ્ચેનું આ યુદ્ધ અત્યારે બોલિવૂડ અને દેશના સામાજિક વાતાવરણમાં ચર્ચાનો મુખ્ય વિષય બન્યું છે.

'લવ જેહાદ'ના આરોપો અને ફતવા વચ્ચે અભિનેતાએ તોડ્યું મૌન

July 15, 2026 | 14:58 IST