સની દેઓલની 'જાટ' જોવા જેવી કે નહી? આ રહ્યા દર્શકોના રિવ્યુ

પોતાના 'ઢાઈ કિલો કા હાથ'થી વિલનના છક્કા છોડાવનાર સની દેઓલ ફરી એક વાર એક્શન મોડમાં જોવા મળ્યો છે. તેમની નવી એક્શન મૂવી જાટ' આજે દેશભરના સિનેમાઘરોમાં રિલીઝ થઈ ગઈ છે. આ ફિલ્મનું દિગ્દર્શન પ્રખ્યાત તેલુગુ સિનેમા નિર્દેશક ગોપીચંદ માલીનેની દ્વારા કરવામાં આવ્યું છે. આ તેમની પહેલી હિન્દી ફિલ્મ છે. ફિલ્મમાં સની દેઓલ ઉપરાંત રેજીના કેસાન્ડ્રા, સૈયામી ખેર, સ્વરૂપા ઘોષ અને વિનીત કુમાર સિંહ જોવા મળશે.

ઉપરાંત, હિન્દી સિનેમાના શક્તિશાળી અભિનેતા રણદીપ હુડ્ડા ફિલ્મમાં વિલનની ભૂમિકામાં જોવા મળે છે. સની દેઓલની આ ફિલ્મ અંગે સોશિયલ મીડિયા પર પણ સમીક્ષાઓ આવવા લાગી છે. આ એક બ્લોકબસ્ટર એક્શન ફિલ્મ છે. આ પહેલા સની દેઓલ 2023માં 'ગદર 2'માં જોવા મળ્યો હતો, જેણે બોક્સ ઓફિસ પર બ્લોકબસ્ટર કલેક્શન કર્યું હતું. આવી સ્થિતિમાં, મોટાભાગના ચાહકોના મનમાં એક જ પ્રશ્ન ઉભો થઈ રહ્યો છે કે શું આ ફિલ્મ 'ગદર 2' સાથે ચર્ચા અને કમાણીની દ્રષ્ટિએ સ્પર્ધા કરી શકશે?

આવો જોઇએ જનતાનો શું રિવ્યું છે??
એક યુઝરે ફિલ્મની પ્રશંસા કરી અને લખ્યું, 'જાટ એક શાનદાર ફિલ્મ છે જે રેકોર્ડ તોડવા જઈ રહી છે.' પહેલો ભાગ એક્શન અને લાગણીઓથી ભરેલો છે, જ્યારે બીજો ભાગ સાહસથી ભરેલો છે. તેમાં ભારતીય સિનેમાના કેટલાક સૌથી શાનદાર એક્શન સિક્વન્સ છે અને ઘણી બધી લાગણીઓ પણ છે.

બીજા એક યુઝરે પણ ફિલ્મની પ્રશંસા કરી અને લખ્યું, 'આ સની દેઓલની શ્રેષ્ઠ એક્શન ફિલ્મોમાંની એક છે.' રોમાંચક એન્ટ્રી સિક્વન્સ, બીચ પર શાનદાર પીછો અને ઇન્ટરવલ બ્લોક તમારા રુવાંડા ઉડાડી દેશે. બીજા ભાગમાં વિનાશનું દ્રશ્ય વધુ ડરામણું છે, તે જોવું જ જોઈએ.

બીજા એક નેટીઝને ફિલ્મની પ્રશંસા કરી, તેને 5 માંથી 5 રેટિંગ આપ્યું અને લખ્યું, 'મોટા પ્રેક્ષકો માટે એક શાનદાર અનુભવ!'

શાહિદ કપૂર અને કૃતિ સેનન અભિનીત ફિલ્મ 'તેરી બાત મેં ઐસા ઉલઝા જિયા'ના દિગ્દર્શક અમિત જોશીએ પણ ફિલ્મના પ્રીમિયર પછી લખ્યું, 'મેં ફિલ્મ 'જાટ' જોઈ, તે શાનદાર હતી, પૈસાની કિંમત અને સંપૂર્ણપણે મનોરંજક હતી!' જો તમને 'ઘાયલ', 'દામિની' કે 'ઘાતક' જેવી ફિલ્મો ગમે છે, તો આ તેને એક નવા સ્તરે લઈ જાય છે.

જોકે, કેટલાક યુઝર્સ એવા હતા જેમને ફિલ્મ બહુ પસંદ ન આવી. જેમ કે એક યુઝરે ફિલ્મને નિરાશાજનક કહી. તેમણે લખ્યું, 'સની દેઓલનું પ્રદર્શન ખૂબ જ નિરાશાજનક હતું. સ્ટોરી ખરાબ હતી અને દિગ્દર્શન પણ નબળું હતું. તેમાં ઘણા બધા બિનજરૂરી એક્શન દ્રશ્યો હતા. સની દેઓલે હવે નિવૃત્તિ લઈ લેવી જોઈએ.

'જાટ' એડવાન્સ બુકિંગથી ઘણી કમાણી કરી
સેકેનિલ્કના અહેવાલ મુજબ, ફિલ્મે બોક્સ-ઓફિસ પર શાનદાર શરૂઆત કરી છે. પહેલા દિવસના એડવાન્સ બુકિંગથી ₹2.37 કરોડની કમાણી થઈ. આ ઉપરાંત, ૧.૧૩ લાખ ટિકિટો વેચાઈ ચૂકી છે અને ભારતભરમાં લગભગ ૧૪,૨૦૦ શોનું આયોજન કરવામાં આવ્યું છે. આ આંકડાઓ સાબિત કરે છે કે ફિલ્મ પ્રત્યે ભારે ઉત્સાહ છે.