મહેમદાવાદમાં ભાજપનો દબદબો જોવા મળી રહ્યો છે. દેવકી વણસોલ બેઠક પર અજીતસિંહ ડાભી અને કનીજ બેઠક પર મિતુલ રાઠોડ બિનહરીફ જાહેર થયા છે.
સ્થાનિક સ્વરાજની ચૂંટણીના મતદાન પહેલા જ મહેમદાવાદમાં ભારતીય જનતા પાર્ટીએ ભવ્ય સફળતા મેળવી છે. મહેમદાવાદ તાલુકાની બે મહત્વની અમદાવાદ જિલ્લા પંચાયત બેઠકો પર ભાજપના ઉમેદવારો બિનહરીફ વિજેતા જાહેર થયા છે. કોંગ્રેસના ઉમેદવારોએ અંતિમ ઘડીએ મેદાન છોડી દેતા ભાજપનો વિજય માર્ગ મોકળો બન્યો છે.
 કોણ બન્યા બિનહરીફ વિજેતા? મળતી માહિતી મુજબ, દેવકી વણસોલ જિલ્લા પંચાયત બેઠક પર ભાજપના ઉમેદવાર અજીતસિંહ ડાભી બિનહરીફ ચૂંટાઈ આવ્યા છે. જ્યારે કનીજ જિલ્લા પંચાયત બેઠક પર ભાજપના ઉમેદવાર મિતુલ રાઠોડ બિનહરીફ વિજેતા થયા છે. આ બંને બેઠકો પર કોંગ્રેસના ઉમેદવારોએ પોતાના નામાંકન પત્રો પરત ખેંચી લેતા ચૂંટણી અધિકારી દ્વારા તેમને વિધિવત રીતે બિનહરીફ જાહેર કરવામાં આવ્યા છે.
ધારાસભ્યએ પાઠવ્યા અભિનંદન ચૂંટણી પહેલા જ આ મોટી જીત મળતા ભાજપના કાર્યકરોમાં ભારે ઉત્સાહ જોવા મળી રહ્યો છે. મહેમદાવાદના ધારાસભ્ય અર્જુનસિંહ ચૌહાણે બંને વિજેતા ઉમેદવારોને રૂબરૂ મળીને અભિનંદન પાઠવ્યા હતા અને પક્ષના સંગઠનની શક્તિને બિરદાવી હતી. નોંધનીય છે કે, મહેમદાવાદમાં ભાજપની આ જીતથી જિલ્લા પંચાયતમાં પક્ષનું સંખ્યાબળ અને પકડ વધુ મજબૂત બની છે. હવે આગામી મતદાનના દિવસે અન્ય બેઠકો પર પણ આ વિજયી લહેરની અસર જોવા મળે તેવી શક્યતા છે.

મહેમદાવાદમાં બે જિલ્લા પંચાયત બેઠકો બિનહરીફ  જાહેર

April 15, 2026 | 16:19 IST