બિહારની રાજનીતિમાં આગામી ચૂંટણી અને વહીવટી સુધારાઓને લઈને નેતાઓ દ્વારા મહત્વપૂર્ણ નિવેદનો આપવામાં આવ્યા છે. કેન્દ્રીય મંત્રી ચિરાગ પાસવાને રાજ્યના લોકોને છઠ્ઠ પર્વની શુભેચ્છાઓ પાઠવી હતી અને સાથે જ બિહારમાં NDAની જીતનો દાવો કર્યો હતો. ચિરાગ પાસવાને આશા વ્યક્ત કરી કે, છઠ્ઠી મૈયાના આશીર્વાદથી તેઓ વડાપ્રધાન નરેન્દ્ર મોદી અને તેમના દ્વારા કલ્પના કરાયેલી તમામ વિકસિત સુવિધાઓ બિહારને અપાવી શકશે. તેમણે વિશ્વાસ વ્યક્ત કર્યો કે, બિહારના નાગરિકોએ મન બનાવી લીધું છે અને આ વખતે એક મોટી જીત સાથે NDA રાજ્યમાં સરકાર બનાવશે.
સમગ્ર દેશમાં SIR લાગુ કરવાની જાહેરાત
બીજી તરફ, ભાજપના રાષ્ટ્રીય પ્રવક્તા સૈયદ શાહનવાઝ હુસૈને ચૂંટણી પંચ દ્વારા સમગ્ર દેશમાં SIR લાગુ કરવાની જાહેરાત પર સંતોષ વ્યક્ત કર્યો હતો. તેમણે જણાવ્યું કે, જ્યારે બિહારમાં SIR લાગુ કરવામાં આવ્યું હતું, ત્યારે રાહુલ ગાંધી, તેજસ્વી યાદવ અને અન્ય પક્ષોએ તેનો ઉગ્ર વિરોધ કર્યો હતો અને જનતાને ગેરમાર્ગે દોરવાનો પ્રયાસ કર્યો હતો, પરંતુ આ પ્રક્રિયા સફળ રહી. શાહનવાઝે માંગ કરી કે, વોટર લિસ્ટમાં પારદર્શિતા અને શુદ્ધતા જાળવવા માટે આ SIR પ્રક્રિયા સમગ્ર દેશમાં લાગુ થવી જોઈએ.
આ પણ વાંચો: <a href="https://www.benefitnews24.com/gujarati/india/will-not-join-any-other-alliance-as-long-as-pm-modi-is-there-chirag-paswan/12171" target="_blank" rel="noopener">જ્યાં સુધી PM મોદી છે ત્યાં સુધી બીજા કોઇ ગઠબંધનમાં નહીં જોડાઉઃ ચિરાગ પાસવાન</a>
વોટર લિસ્ટમાં પારદર્શિતા ખૂબ જ જરૂરી
કેન્દ્રીય મંત્રી જીતન રામ માંઝી એ પણ શાહનવાઝના સૂર પુરાવતા જણાવ્યું કે તેઓ અગાઉથી જ કહેતા હતા કે, SIRની જાહેરાત માત્ર એક રાજ્ય પૂરતી મર્યાદિત ન રહેતા સમગ્ર દેશ માટે થવી જોઈએ. માંઝીના મતે, વોટર લિસ્ટમાં પારદર્શિતાની ખૂબ જ જરૂર છે કારણ કે, ઘણા મૃતકોના નામ હજુ પણ યાદીમાં છે, ઘણા લોકોના નામ 2-2 જગ્યાએ છે અને ઘણા એવા લોકો પણ છે જેઓ ભારતની બહારથી આવ્યા હોવા છતાં તેમના નામ વોટર લિસ્ટમાં છે. માંઝીએ ભારપૂર્વક જણાવ્યું કે, બંધારણ મુજબ ભારતમાં જન્મેલા વ્યક્તિનું જ નામ વોટર લિસ્ટમાં હોવું જોઈએ અને લિસ્ટની શુચી અને શુદ્ધતા માટે SIR અત્યંત જરૂરી છે.
કર્પૂરી ઠાકુર અને જયપ્રકાશ નારાયણનું આપ્યું ઉદાહરણ&nbsp;
ભાજપના અન્ય એક નેતા ઋતુરાજ સિન્હા એ આગામી બિહાર વિધાનસભા ચૂંટણી 2025ના સંદર્ભમાં રાજકીય ટિપ્પણી કરી હતી. તેમણે કહ્યું કે, લોકનાયક જેવી પદવીઓ મહેનત અને લોકોના યોગદાનના આધારે જનતા દ્વારા આપવામાં આવે છે, તે 'અર્જિત' કરવી પડે છે. તેમણે કર્પૂરી ઠાકુર અને જયપ્રકાશ નારાયણનું ઉદાહરણ આપ્યું, જેમને તેમના કામને કારણે જ આ ઉપાધિઓ મળી હતી. સિન્હાએ રાહુલ ગાંધી અને તેજસ્વી યાદવ પર કટાક્ષ કરતા કહ્યું કે, કોંગ્રેસનો આજનો ટ્રેન્ડ છે કે તેઓ જાતે જ પોતાને લોકનાયક જાહેર કરી દે છે, જે સમજણની કમી દર્શાવે છે અને બિહાર જેવા રાજકીય રીતે સજાગ રાજ્યમાં આ વલણ તેમના માટે ઘાતક સાબિત થશે.

કેન્દ્રીય મંત્રી ચિરાગ પાસવાનએ બિહારમાં NDAની મોટી જીતનો દાવો કર્યો છે

October 28, 2025 | 12:16 IST