કર્ણાટકની રાજનીતિમાં 2023ની વિધાનસભા ચૂંટણી દરમિયાન આલંદ મતવિસ્તારમાં થયેલા કથિત વોટ ચોરી કાંડ પરથી હવે રહસ્યના પડદા ઊંચકાઈ રહ્યા છે. કર્ણાટક પોલીસની સ્પેશિયલ ઈન્વેસ્ટિગેશન ટીમ એ આ વોટ ચોરી કાંડની તપાસમાં મહત્વના પુરાવા મેળવ્યા છે, જે દર્શાવે છે કે હજારો મતદારોના નામ મતદાર યાદીમાંથી હટાવવાનું એક સુઆયોજિત ષડયંત્ર રચાયું હતું. SITએ 6 શંકાસ્પદ વ્યક્તિઓની ઓળખ કરી છે અને 6,000થી વધુ મતો ખોટી રીતે હટાવવામાં આવ્યા હોવાના પુરાવા એકત્રિત કર્યા છે.
ચૂંટણી પંચના પોર્ટલ પર 6,994 મત હટાવ્યા
આ ગેરરીતિ માટે આલંદના એક સાયબર સેન્ટરમાં ઓપરેટરોને દરેક નકલી ડિલીટ અરજી માટે 80ની ચૂકવણી કરવામાં આવી હતી. SITના સૂત્રો મુજબ, આ 'વોટર ડિલીશન ઓપરેશન' માટે લગભગ 4.8 લાખ ચૂકવવામાં આવ્યા હતા. તપાસમાં બહાર આવ્યું છે કે, ડિસેમ્બર 2022થી ફેબ્રુઆરી 2023 વચ્ચે VoIP (Voice Over Internet Protocol)નો ઉપયોગ કરીને ચૂંટણી પંચના પોર્ટલ પર કુલ 6,994 મત હટાવવા માટેની અરજીઓ મોકલવામાં આવી હતી.
આ પણ વાંચો: <a href="https://www.benefitnews24.com/gujarati/politics/jmm-out-of-bihar-elections-grand-alliance-breaks-down/21218" target="_blank" rel="noopener">JMM બિહાર ચૂંટણીમાંથી બહાર: મહાગઠબંધન તૂટ્યું</a>
ચૂંટણી અધિકારી એ ડિલીશન પર રોક લગાવી
આમાંથી મોટાભાગની અરજીઓ નકલી હોવાનું જણાયું હતું અને ખાસ કરીને દલિત તથા લઘુમતી મતદારોને લક્ષ્ય બનાવવામાં આવ્યા હતા. આ ગેરરીતિઓનો ખુલાસો થતાં જ મુખ્ય ચૂંટણી અધિકારી એ તાત્કાલિક તમામ ડિલીશન પર રોક લગાવી દીધી હતી અને સ્ટેટસ ક્વો જાળવી રાખવાનો આદેશ આપ્યો હતો. SIT હવે એ વાત પર ધ્યાન કેન્દ્રિત કરી રહી છે કે, સાયબર સેન્ટરને ચૂંટણી પંચના પોર્ટલ સુધી કેવી રીતે પહોંચ મળી અને આટલી મોટી સંખ્યામાં નકલી અરજીઓ કેવી રીતે જમા થઈ.
મુખ્ય આરોપીને શોધવા માટેની તપાસ શરૂ
આ વોટ ચોરી કાંડના મુખ્ય આરોપી મોહમ્મદ અશફાકને શોધવા માટે તપાસ એજન્સીએ પ્રક્રિયા શરૂ કરી દીધી છે. અશફાક, જેની ફેબ્રુઆરી 2023માં પૂછપરછ કરાયા બાદ તેને છોડી દેવાયો હતો, તે હાલમાં દુબઈમાં રહે છે. તેને શોધવા અને તેની ધરપકડ કરવા માટે બ્લૂ કોર્નર નોટિસ જાહેર કરવાની પ્રક્રિયા શરૂ કરવામાં આવી છે. આ સમગ્ર મામલો ત્યારે રાજકીય બન્યો જ્યારે આલંદના કોંગ્રેસના ધારાસભ્ય બી. આર. પાટીલ અને મંત્રી પ્રિયંક ખડગેએ સૌપ્રથમ મુખ્ય ચૂંટણી અધિકારીને ફરિયાદ કરી. ત્યારબાદ કોંગ્રેસ સરકારે ADGP બી. કે. સિંહના નેતૃત્વમાં SITની રચના કરી.
6000થી વધુ મતદારોના નામ પૈસા લઈને હટાવાયા
કોંગ્રેસ અધ્યક્ષ મલ્લિકાર્જુન ખડગેના ગઢ ગણાતા આ વિસ્તારમાં રાહુલ ગાંધી એ પણ 'વોટ ચોરી'ના આક્ષેપો ઉઠાવ્યા હતા. SITના રિપોર્ટ બાદ મંત્રી પ્રિયંક ખડગેએ સોશિયલ મીડિયા પ્લેટફોર્મ 'X' પર ભાજપ પર આકરા પ્રહાર કરતાં કહ્યું કે, 'આલંદમાં માત્ર 80માં લોકતંત્ર વેચાયું.' તેમણે દાવો કર્યો કે, SITની તપાસથી સાબિત થયું કે 6000થી વધુ વાસ્તવિક મતદારોના નામ પૈસા લઈને હટાવાયા હતા, જે કલબુર્ગીથી સંચાલિત એક ડેટા સેન્ટર દ્વારા થયું હતું. તેમણે આને લોકતંત્ર સાથે છેડછાડ ગણાવીને ચેતવણી આપી કે, BJPની '#VoteChori'ની દરેક ચાલનો પર્દાફાશ થશે અને દોષિતોને જેલમાં મોકલાશે.
7 લેપટોપ અને ઘણા ફોન જપ્ત કર્યા
17 ઑક્ટોબરે SIT એ પૂર્વ BJPના ધારાસભ્ય સુભાષ ગુટ્ટેદાર, તેમના પુત્રો અને CA મલ્લિકાર્જુન મહંતગોલના ઘરો પર દરોડા પાડી 7 લેપટોપ અને ઘણા મોબાઇલ ફોન જપ્ત કર્યા હતા. કોંગ્રેસે SITની આ કાર્યવાહીને 'લોકતંત્ર પર હુમલો' ગણાવીને કહ્યું કે, 'BJPની વોટ ચોરીનું સત્ય બહાર આવ્યું છે, જ્યાં એક મત હટાવવાની કિંમત 80 રૂપિયા હતી,' અને આને ગરીબો અને વંચિતોના અધિકારો છીનવતો લોકતંત્ર પરનો સીધો હુમલો ગણાવ્યો હતો. આલંદના ધારાસભ્ય બી. આર. પાટીલે તપાસની દિશા પર સંતોષ વ્યક્ત કર્યો છે.

વોટ ચોરી કાંડની તપાસમાં ખુલાસો થયો કે, 6000થી વધુ મતદારોના નામ ખોટી રીતે હટાવવામાં આવ્યા

October 24, 2025 | 14:07 IST