PVC Aadhaar Card: સરકારે 10 મહિનામાં 60 કરોડની કમાણી

તમારામાંથી ઘણા લોકો પાસે પીવીસી આધાર કાર્ડ હશે. ઘણા લોકોએ તેનો ઓર્ડર પણ આપ્યો હશે. પીવીસી આધાર કાર્ડની ખાસિયત એ છે કે તે પ્લાસ્ટિકથી બનેલું છે અને પાણીથી તેને નુકસાન થશે નહીં. આ સિવાય તે કાગળની જેમ ફાટશે નહીં.સરકાર PVC આધાર કાર્ડ મંગાવવા માટે આધાર કાર્ડ ધારકો પાસેથી 50 રૂપિયા વસૂલ કરે છે. ઓર્ડર આપ્યાના થોડા દિવસોમાં, પીવીસી આધાર લોકો દ્વારા આપવામાં આવેલા સરનામે પહોંચાડવામાં આવે છે. હવે આ પીવીસી આધાર કાર્ડ અંગે એક મોટો ખુલાસો થયો છે.

RTI થી મળેલી માહિતી
RTI કાર્યકર્તાએ એક RTI દાખલ કરીને પૂછ્યું હતું કે PVC આધાર કાર્ડથી સરકારને કેટલી આવક થાય છે, જેના જવાબમાં યુનિક આઇડેન્ટિફિકેશન ઓથોરિટી ઓફ ઇન્ડિયા (UIDAI) એ માહિતી આપી હતી કે 01.04.2024 થી 28.02.2025 વચ્ચે કુલ 1,20,29,756 PVC આધાર કાર્ડ જારી કરવામાં આવ્યા છે, જેમાંથી સરકારને 60,14,87,800 રૂપિયાની આવક થઈ છે.

સરકારે દરેક વર્ષનો ડેટા આપ્યો નથી પરંતુ આ ડેટાના આધારે કહી શકાય કે છેલ્લા પાંચ વર્ષમાં સરકારે ફક્ત પીવીસી આધાર કાર્ડથી જ 300 કરોડ રૂપિયાથી વધુની કમાણી કરી છે. આરટીઆઈ કાર્યકર્તાએ સરકાર પાસે પીવીસી આધાર કાર્ડ મફતમાં બનાવવાની માંગ કરી છે. આ ઉપરાંત, તેમણે વધુ આધાર કેન્દ્રો ખોલવાની પણ માંગ કરી છે.

પીવીસી આધાર કાર્ડ 2020 માં કરવામાં આવ્યું હતું લોન્ચ
તમને જણાવી દઈએ કે UIDAI એ ઓક્ટોબર 2020 માં PVC આધાર કાર્ડ લોન્ચ કર્યું હતું. તે એક પ્લાસ્ટિક કાર્ડ છે જે આધાર કાર્ડની માહિતી સાથે આવે છે, જે ATM કાર્ડ જેવું જ દેખાય છે. તમે UIDAI ની સત્તાવાર વેબસાઇટ પરથી 50 રૂપિયામાં ઓર્ડર કરીને તમારા ઘરે PVC આધાર કાર્ડ પહોંચાડી શકો છો. PVC આધાર કાર્ડ પણ સામાન્ય આધાર કાર્ડની જેમ સંપૂર્ણપણે માન્ય છે.